او قادین منم!
سولماز جمالی

چیینینه تؤکولموش داغینیق ساری ساچ‌لاری، باشدان آیاغا قادینی بوروموش قاپ- قارا پالتاری، دیرناقلاری‌نین قیرمیزی بویالاری، دیدرگین بیر قادین تابلوسونو گؤزومده جانلاندیریر. قادین‌لارا اؤزل اولان سس‌سیز گؤز یاشلاری یومولو گؤزلریندن یول تاپیب یاغیش دامجیلاری‌لا بیرگه اوزونو یووور؛ آجی‌لاردان دوغولان، روحون ان درینلیگیندن قایناقلانان داملالار. یئل داغینیق ساچلارین گؤیه قالدیریب اوزونه چیرپیر؛ اونون تیتره‌ین گؤیرمیش دوداق‌لاری گلرکن گؤردوگوم گؤیرمیش بولودلاری خاطیرلادیر منه. دیم دیک دوروشو، سس‌سیزلیگی، کیپریک قیرپمادان باشی‌نین گؤیه ساری اولماسی انساندا درد ،کدر دویغوسونو گئت- گئده اویاندیریب، اوره‌یی‌نین کؤزونو‌هارلاییر. آغ- آپباق اوزونده قیزارمیش یاناقلاری، بورنونون اوجونون قیزارتیسی خیاوانین ساری ایشیق‌لاری آلتیندا داها دا گؤزه چارپیردی.
یولومون آغزیندا یاغیش بیرآز دینسین دئیه اؤزومو بیر کافه‌یه آتدیم؛ ایکینجی تورک قهوه‌می‌ایچرکن یاغیشین آستاجا شئحله‌مسینه گؤز تیکیرم. فینجاندان قالخان بوغ‌لا برابر قهوه‌نین آجی قوخوسو بورنومو دولدورور. باشیمی‌چئویریب پیادا یولونون اورتاسیندا دوران قادینا باخیرام. ال‌لری‌له باشین توتوب، بوتون بدنینی ساغا سولا ترپه‌دیر.
گئت-گئده گل-گئت، سس-صدا، ییغینجاق چوخالیردی. اوردان کئچن‌لر شاشقین گؤزلرین‌ قادینا زیلله‌ییب، سووشانادک دفعه‌لرجه قادینی باشدان آیاغا سوزورلر. گؤزلریم‌له اونو قورویان گؤزلری گزیرم.
جوبلاردان آشیب داشان سولارین شیریلتی سسلری‌له بیرگه ییغیشان انسانلارین پیچیلتی سس‌لری کافه‌نین آچیق قاپیسیندان ایچری سیزیر.
کیمیسی چتیر ال‌لرینده، کیمیسی الی قوینوندا سارماشیق کیمی‌قادینین یان- یؤوره‌سینه ساریریرلار و هیجان دولو خیاوان گؤستریسی‌نین سونونو ماراق‌لا گؤزله‌ییرلر.
ییغینجاق ائدن قادین‌لار، کیشی‌لر باش‌لارین تاسوفله بوللاییرلار؛ اوردان- بوردان بویلانیب اوجالان سس‌لری قولاق‌لار ائشیدیرلر: بی‌آبیر… اوتانماز…
بیری چیغیریر: «بونون اری، دده‌سی یوخدووو؟»
ائشیتدیگیم سؤزلرین ائتگیسی آلتیندا قالاراق بیر داها قادینا دقتله باخیرام. یئل چیینینه دوشموش لئچگی‌نین اوج‌لارین ساری ساچ‌لاری‌لا برابر‌هاوادا اوینادیر، باشدان آیاغا گئیدیگی قاپ- قارا پالتاری جوم- جولوق سو اولوب بدنینه یاپیشیب.
یئنه بیر اوجا سس: «بئله آروادین باشین کسیب سینه‌سی اوسته قویاسان!»
ساغ الین قالدیریب کؤکسونون اوسته قویوب ال‌لری‌له سیخیر. بلکه ده اووجونا آلیر اوره‌یین. او اوره‌ک سینمیشدی، برک سینمیشدی.
اللری‌له اوزونو توتوب، ایکی قات بوکولدو؛ هؤنکوردو اوجادان. او آغلاییردی یانا-یانا، تیتره‌یه- تیتره‌یه. او هؤنکورتوده باشقا سس‌لر ده ائشیدیلیردی. بلکه بیر اوشاغین چیغیرتیسی، بیر کیشی‌نین باغیرمالاری، بیر قارداشین آجی سؤزلری، بیر آتانین یاندیریب کول ائدن داورانیش‌لاری، بیر سئوگیلی‌نین سایمامازلیق‌لاری، بیر ارین آلداتماسی… اوره‌یینی دیدیکله‌ییردی‌لر.
بدنی‌نین بیر بوجاغیندا تام قایناغین تاپا بیلمه‌دیگی بیر یئرده آجی‌لاری حیس ائدیردی. روحون داغیدیب جسمینی ایشکنجه ائدیردی.
سوسور،بیر مدت اؤزونون‌هارادا اولدوغونو آییرد ائله یه بیلمیر،اللری‌له گؤز قاپاقلارینی سیغاللاییر.دوداقلارینین تیتره‌مه یینی اونا زیلله نن گؤزلردن گیزله‌تمه‌یه چالیشیر تام عؤمور بویو گیزلتدیگی کیمی.
هر ایکی الین آچیب یاغیش آلتیندا توتدو،تیترک بارماقلاری آراسیندان داملا داملا سو سوزولوردو.دوداق لاری ترپه نیردی،بلکه ده دانیشیردی،دردینی دئییردی…گؤزله ریمیز کؤر،قولاقلاریمیز کار ایدی…
بلکه ده بیر داها دانیشمایاجاقدی،گولمه یه جک دی،بو خیابان لارا آیاق باسمایاجاقدی،سئودیک لرین گؤرمه یه جک دی،بیر داها هئچ کیم «اوْ»اولمایاجاقدی،بوندان دهشتلی بیر شئی وار می!!!
سه رین یئل اوز گؤزونو،اللرینی،بوتون بدنینی سیغاللاییر.
بیردن‌های_کوی قالخیر،قادینلار چیغیریشیرلار
اوتوراجاغیمی‌گئری چکیب آیاغا قالخیرام، کافه دن چیخیب،اینسانلارین آراسیندان یول تاپیب قادینا ساری گئدیب اونو گؤرمک ایسته ییرم.داغینیق ساری ساچلارین یئرده آخان قیرمیزی بویالی سو ایچینده رقص ائدرک گؤرورم.
اوْ قادین منم
سن‌سن
بیزیک.