قارا دراپ بالدون
علی تقی‌زاده لاریجان

ایلدن ایله، گوندن گونه، ملتین یاشامی‌چتینلشدیکده، کاسیبلیق خالقی ایاقدان سالدیقدا، جماعات سئچگی زاما‌نی‌نین‌هاوایی وعده‌لریندن مایوس اولوب، ال اوزوب، اؤزلری‌‌نین بیربیرینه یازیغی گلیب و مهربانلیق دیوارین یاراتمیشدیلار. نئچه ایللریدی او کیشی‌گیلین کوچه‌سی‌‌نین ایاغیندا، قوروموش چینار آغاجی‌‌نین آرخاسیندا دیوارا یئکه میسمارلار چالیب و کؤهنه پالتاردان، کیفدن، باشماقدان اوردان آساردیلار. قدیملر کی کاسیبلیق ایندی کیمی‌بیداد ائله‌میردی؛ اوزولموش پالتارلاری آپاران اولمازدی. نئچه گونلر مهربالیق دیواریندان آسیلی قالاردی. ایندی‌هاما گؤز قیرپیمیندا کاسیب، فاغیر ملت دیواردان آسیلانلاری قاپیب آپاریرلار؛ آغینا، بوزونا باخان اولمور. بو حاقدا فیکیرلشه- فیکیرشه کیشی دئدی:
– دئییرم گله‌سن کؤهنه شئی‌لری کوچه ده قویاق. بلکه بیر کسین دردینه دیدی، گؤتوروب آپاردی. خصوصاً منیم قارا بالدونومو.
بالدون اصلینده کؤهنه دئییلدی؛ هئچ اون دفعه گئییلمه‌میشدی. اودور کی بو سؤزلری کیشی چوخ احتیاطلا خانیما دئدی. سونرا منتظر قالدی گؤره نه جواب ائشیده‌جک.
خانیمین باشی خؤرک بیشیرمکله قاریشمیشدی. تاوادا جزیلدایان خؤره‌یین سسی، قویمادی کیشینی ائشیتسین. کیشی بیر آز ویرنیخدی؛ بیر ایکی آددیم آشپزخانایا طرف یئریدی؛ ایسته‌دی بیرده سؤزون تکرار ائله‌سین، پئشمان اولوب سوسدو. قاییدیب کیتابخانادان بیر کیتاب گؤتوروب وارقلاماغا باشلادی. گؤزو کیتابدا اولسایدی دا هئچ نه گؤروب، اوخویا بیلمیردی. فیکری باشقا یئرده‌یدی.
آناسی یادینا دوشموشدو. ۲۰ ایل اولاردی کی آناسی سرطاندان اؤلموشدو. آناسی اؤلندن سورا باجیسی ایله بیرگه، اونون پالتارلارین توپلاییب یوخسوللارا وئرمک ایسته‌میشدیلر. بیردن آناسینا بئش آی اؤلندن قاباخ، آلدیغی کالاغایینی گؤرموشدو. نئجه ده تزه قالمیشدی. کالاغایینی اییله‌ییب.، سس‌سیز آخان گؤز یاشین سیلمک اوچون نئچه آن اوزونه سیخمیشدی. او آندا دوکتوردن آناسی‌نین آغیر ناخوشلوقون و بیر ایلدن آز دیری قالما خبرین خاطیرلامیشدی. اوندا چوخ کدرلنمیشدی.‌هاما ساختا تبسوم‌له مطبدن چیخیب یولا دوشموشدولر. آنا بالا بیربیرینه یاخشی بلد ایدیلر. آنا اوغلونون تبسومو‌نین ساختالیغین بیر باخیشدان آنلاییب، اؤزوده ساختا گولومسه‌میشدی. ایسته‌مه‌میشدی اوغلونون اوره یی سیخیلسین. – قوی اینانسین کی گولوشونه آلداندیم و هر شئی یاخشیدی!!- آناسی جان وئرنده ده، گؤزل کالاغایی باشیندایدی. اوغلو خیسین- خیسین آغلایا- آغلایا دئمیشدی: – «کاش بو کالاغایی قدر عؤمرون اولسایدی آنا!»
بیردن اؤزونه گلدی. گؤزونون نمین الی‌له سیلدی. کیتابی یئرینه قویدو. کوتون اینینه گئییب قارا دراپ بالدونی کمددان چیخاریب قولونون اوستونه آتدی. قاپینی آرام اؤرتوب پله‌دن آشاغی ائندی. بالدون چوخ تمیز هم ده تزه ایدی. خانیمی‌بیر آی قاباخ آد گونو مناسبتینه اونا هدیه آلمیشدی. گئینده چوخ خوشو گلمیشدی. اینینده دوز اوتورموشدو. خانیمدان او باهالی هدیه اوچون چوخ تشکور ائدیب اونو اؤپموشدو. آه، نه شیرین اوقات ا‌یدی او گئجه!! نییه خوش آنلارین عؤمرو چوخ آز اولور آخی؟؟ یئنه گؤزو نملی ا‌یدی. بالدونی قولو ایله یوخاری گتیریب گؤزیاشین اونلا سیلدی. کوچه‌‌نین ایاغیندا قوروموش چینار آغاجی‌‌نین بیر‌هاچاسیندان آسلاییب یولونا داوام وئردی. بیر آز یونگوللشمیشدی.
اؤتن گئجه دوکتور عینکین آلتیندان آزمایش‌لرین جوابین اوخویوب، نتیجه‌نی دقیق آنلاماق نیشانی اولاراق باشینی نئچه دفعه ترپدیب، کیشین‌‌نین اوزونه باخمیشدی. اونو چوخ تمکینلی و جدی گؤردوکده دئمیشدی: سرطان قا‌نینا ایشله‌ییب و اوچ آیدان آرتیق یاشاماق فورصتین یوخدو. کیشی فیکیرلشمیشدی: دئمک او قارا دراپ بالدون قدر عؤمرو اولمایاجاق.!
۱۳۹۷ قئش