Home / حئکایه / آجی طالعین سونو / رحیم خیاوی

آجی طالعین سونو / رحیم خیاوی

آجی طالعین سونو
رحیم خیاوی

آخشام ساعات دوققوزدا یورولوب الدن دوشموشو، ائوه چاتیردی. «موراد» اؤلن گوندن ائوین بوتون ایشلرینه ده اؤزو یئتیشردی. سیجیللیده آدی «خانیم»ایدی، آنجاق هئچ اؤزوده ندنسه‌هامی‌نین اونا «خانیم‌آغا» دئدیگینی بیلمیردی.
حیاتین دؤزولمز شراییطی بئلین اگمیشدی. بیر او قده‌رده یاشی اؤتمه‌میشدی، آمما زمانه جانینا یامانجا سیریق چکمیشدی. آلنینین قیریشیقلاری، اللرینین کوبودلوغو ایللر بویو آغیر ایشلره قول قویدوغونو گؤستریردی.
اؤتن گونلری بوتونلوکله آجیلی و حسرتلی گئچمیشدی. آغیر گونلرینی یادا سالاندا کدره بورونوردو. بئله حال‌لار‌دا عؤمرونون چاخناشان آن‌لاریندان دانیشماق ایسته‌ییردی، آمما سؤزلر سانکی گئجه قوشو تک بئینیندن پیریلداشیب اوچوردولار.
او هئچ زامان اؤز کؤکون، اؤز بینؤوره‌سین ایتیرمه‌میشدی. اونون عالمینده اومودسوز یاشاماق اؤلو یاشاماق کیمی‌دیر. آنجاق، بو فیکیرلر گاهدان دا «خانیم‌آغا»یا هیجوم گتیریردی و – «حیاتین بو قده‌ر آجی‌لیغیندان اوره‌ییم گؤینه‌ییر، اوره‌ییمین قابیغی سویولور. بس نه واخت آرین – آرخایین اوره‌ییمین سؤزلرین سؤیله‌مگه ماجال تاپاجاغام؟ ائله‌بیل من‌له اوره‌گیمین آراسیندا اوزاق زامانلاردان بری بیر دووار چکیلیب.» – دئییردی.
یئنه‌ده خیاللاری گئچمیشلره اوچموشدو:
اوتوز بئشینجی ایللر ایدی. «موراد» تبریزده بیر تیکینتی شیرکتینده جوشکارلیق ائدیردی. دوققوز آیلیق «قودرت» «خانیم‌آغا»نین قوجاغیندایدی. «موراد» بئش قات بینانین هم جوشکاری، هم ده گودوکچوسو ایدی. بونا گوره ده بینانین حیطینده قورولموش بیر چادیردا یاشاییردیلار.
یازین ایکینجی آیی ایدی.‌هاوالار ایستی گئچیردی، آمما گئجه‌دن نارین یاغیش یاغماغا باشلامیشدی. «خانیم‌آغا» اوتوردوغو یئرده «قودرت»ی آیاقلارینین اوستونه اوزادیب، اونا لای لای چالیردی. الینده ده «موراد»ین شالوارینین دیزینه یاماغ سالیردی. دریندن بیر آه چکیب – «چوخ شوکور کرمینه آللاه» – دئدی.
بیر آن دا بینانین هنده‌ورینده‌های- کوی قوپدو. قورخولو حال یاراندی. بئله نظره گلیردی کی شوم بیر حادیثه اوز وئرمیشدیر. «خانیم‌آغا» ایستر ایسته‌مز «قودرت»ی قوجاغینا آلیب، چادیردان ائشیگه چیخمیشدی. ایشچی‌لرین «موراد»ین جوشکارلیق ائتدیگی یئره قاچمالارینی گؤرموشدو.
دونیانین بوتون موصیبتی «خانیم»ین باشینا النمیشدی. نه زامان قوجاغینداکی اوشاق‌لا بیرگه اؤزونو «موراد»ین جانسیز بدنی‌نین اوستونه آتدیغینی هئچ اؤزو ده بیلمه‌میشدی. یاناقلارینی دیرناقلاریلا جیرماقلاییب، باشینا تورپاق سووورموشدو. هؤنکورتوسو جنازه‌نین باشینا ییغیلمیش جاماعاتین‌های کویینده ایتمیشدی. پولیس‌لر گلندن سونرا، بیریسی قولوندان یاپیشیب قالخیزماق ایسته‌میشدی؛ آنجاق «خانیم‌آغا»نین یئریندن دورماغا اینجاری قالمامیشدی. رنگی آغ- آپباغ آغارمیشدی. آیاغا قالخاندا، دایی‌سی «محمد»ی قولوندان یاپیشدیغینی گؤرموشدو. پناهسیز اوشاق کیمی‌هؤنکورتو ایله بیر داها اؤزونو دایی‌سی «محمد»ین قوجاغینا بوراخمیشدی…

***

بیرگون حادثه‌دن سونرا، تیکینتی‌نین مودیری، «خانیم‌آغا»نین اووجونا بیر نئچه اسکناس قویوب، اونو «موراد»ین جنازه سی‌ایله بیرلیکده دوغولدوغو کندلرینه گؤندردی. «خانیم‌آغا» اؤز کندلرینده آناسی‌نین ائوینده اوتراق ائله‌دی. گونلر دالبادالا سووشوردو، آمما «خانیم»ین اوره‌گی اسیر دوشموش قوش اوره‌گی کیمی‌دائیما چیرپینتی‌دایدی. گئجه- گوندوز گؤزلری یاز بولودونا دؤنموشدو. آناسی‌نین بوتون فیکری ذیکری «خانیم‌آغا» اولموشدو. دائیما اونا فیکیرلشیردی؛ هئی اونا – «آی قیز اؤزووه رحمین گلسین. اؤزووه ده رحمین گلمیر، هئچ اولماسا او اوشاغا رحمین گلسین؛ بیر دری، بیرده سوموک اولوب» دئییردی.
«خانیم‌آغا»نین ائله واختلاری اولوردو کی بیر گون موطلق هئچ بیر کیمسه‌ایله دانیشمیردی. یالنیز رؤیالاریندا سئیر ائدیردی و گاهدان دا آغزیندان – «چوخ شوکور اؤز مصلحتینه» – سؤزو چیخیردی…

***

«خانیم‌آغا»نین دایی‌سی «محمد» اون ایله یاخین ایدی تبریزده معاریف ایداره‌سینده، معاوین عونوانیندا ایشله‌ییردی. او اولدوقجا مهربان، قایغی‌کش، اوره‌گی صاف و گؤیلو توخ آدام ایدی. دفعه‌لرله – «قیزیم، بیر تیکه چؤره‌ک تاپیریق، گئچینه‌ریک. گل بیزیمله یاشا»- دئمیشدی. آنجاق «خانیم»ین جاوابی -«یوخ دایی، من ایسته‌میرم بیرینه یوک اولام. گرک اؤزومه بیر ایش تاپام» – اولموشدو.
بئله‌لیکله «محمد» باش مودیرین مساعد نظرینی الده ائتدیکدن سونرا «خانیم‌آغا»یا شهرین قیز مدرسه‌لرینین بیرینده خیدمتچی ایشی تاپمیشدی. ائله او مدرسه‌نین حیطینین کونجونده ده «خانیم‌آغا» و ««قودرت»»ین یاشاماسی اوچون کیجیک بیر اوطاق نظرده آلینمیشدی. «خانیم‌آغا» تعطیل گونلری ده، مدرسه‌نین خانیم مودورونون ائوین، ائشیگین سیلیب، سوپوروب تمیز ائدردی. الی دوز، باشی آشاغا و یورولماز قادین اولدوغوندان، ایستر مودیر و ایسترسه ده حیات یولداشی «علیخان» اوندان چوخ راضی ایدیلر.
بو ایش‌له «خانیم‌آغا»نین حیاتیندا یئنی بیر واراق آچیلمیشدی، آنجاق «موراد»ین اؤلومونون آغیرلیغی هله ده اونا دؤزولمز درد اولموشدو. بو درد اونون ایچه‌ریسینی شمع کیمی‌اریدیردی. اوزون ایللر ««موراد»»ا یاس ساخلادیغیندان باشینا خینا دا قویمامیشدی، ساچلاری ائله آغارمیشدی سانیردین باشینا قار یاغیب. بئله‌لیک‌له ایگیرمی‌ایله یاخین عینی احوال- روحیه‌ایله «خانیم»ین گئجه‌-گوندوزو گئچمیشدی.
«قودرت» داها بویا باشا چاتیب، عالی تحصیله کئچمک واختی گلیب چاتمیشدی. بیر گون آناسیندان سوروشدو:
– آناجان نئچه یاشین وار؟
آناسی دریندن بیر آه چکه‌رک جاواب وئردی:
– اوغلوم، قادین‌لار هئچ اؤزلری ده آغلادیغی گئجه‌-گوندوزلرین سایی حسابینی بیلمیرلر.
«قودرت» آناسی‌نین بو جاوابلاماسینا درین فیکره دالدی. او گؤروردو کی آناسی اونون عالی تحصیله کئچمه‌یی اوچون هر زحمته و چتینلیکلره قاتلاشیر. او بیلمیردی کی آناسی ««موراد»»ین آرزولارینی حیاتا کئچیرمک ایسته‌ییر. ««موراد»» اؤز ساغلیغیندا اوشاغا چوخ ماراق و محبت گؤسته‌رردی. ایش تعطیل اولان گونلرده، «قودرت»له اوشاق کیمی‌اوینایاردی؛ دفعه‌لرله – «آللاه منه او قده‌ر عؤمور وئرسین کی «قودرت»ی اوخودوب، بویا باشا چاتدیریم»- دئیه‌ردی. «موراد»ین بو سؤزلری ایگیرمی‌ایل کئچمه‌یینه رغما هله ده «خانیم‌آغا»نین قولاغیندا سسله‌نیردی…

***

گونلر، آی‌لار سووشور، سونو گؤرونمز ایللره قووشوردولار. «قودرت» عالی تحصیلینی ده بیتیریب، بیر موعللیم کیمی‌ایشه باشلامیشدی. «خانیم‌آغا»نین اوره‌گینده دوگونله‌نن ««موراد»»ین آرزولارینین بیری ده آچیلمیشدی. آنجاق اونون دا عؤمور کیتابی واراقلاندیقجا، ایچریسی ده شوملاییردی. اؤزو ده دامارلاریندا بیر دردین ایلان کیمی‌گزیشمه‌سینی سئزمیشدی، آمما وئجینه ده آلمیردی و گونده‌لیک ایشلرینی لاییقینجه یئرینه یئتیرمگه چالیشیردی.
بیر ایکی آی اؤنجه دوقتورلارین ائتدیکلری قان آنالیزلری خوشا گلمز کودلار گؤسترمیشدی. اونلارین تکلیفی‌ایله «قودرت» آناسینی باشقا دوقتورلارادا آپارمیشدی، آنجاق‌هامی‌بیر سؤز دئمیشدی. آناسینین جانینا ایشله‌میش کانسئر چوخ ایره‌لیله‌میشدی. آناسی «قودرت»ه تکرار دئییردی:
– آی اوغول، منی دوقتورلارین قاپیسینا سورومه! سنین اؤزوونده ایشین گوجون وار. منیم دای اله‌ییم اله‌نیب، قلبیریم گووده فیرلانیر.
بونا رغما، «خانیم‌آغا» اؤز ایچینده دریندن فیکره دالمیشدی. بیر آزدا قورخویا دوشموشدو. اؤز- اؤزونه دئییردی:- «معلوم اولور من نه زاماندیر جانیمدا یووا سالمیش بو ایلان‌لا بیرلیکده عؤمور سورورموشم! قاباقلار دئیه‌ردیم اؤلوم هر زامان گلیرسه گلسین، من حاضیرام. آمما ایندی اونون کؤلگه‌سی باشیمین اوستون آلیب؛ اؤلمک ایسته‌میرم. آخی من هله بالامین تویون گؤرمه‌میشم.»
کانسئرین ائتگیسی «خانیم‌آغا»نین بوتون وجودوندا اؤزونو گؤستریردی. گؤزونون رنگی سولموش، ساری‌یا چالیردی؛ اوزون اوزادیجی باش آغریسیندان اذیت چکیردی؛ گون به گون ضعیفله‌ییر؛ هئیی، حرکتی قالمامیشدی؛ بیر کلمه دانیشماغا حوصله‌سی یوخ‌ایدی؛ گاهدان درین بیر آه چکدیگدن سونرا – «کرمینه چوخ شوکور!»- دئییردی، آمما بوغازیندا بیر قه‌هر دوگونلنمیشدی. گاهدان سولغون گؤزلرینده یاش حالقالاناندا، چارقادینین اوجو ایله اونو سیلر و بیر آه‌لا دئییردی: -««موراد»ین اؤلوموندن سونرا، دونیا منه جهنم اولوب. رحمتلیگین اؤلومو منی باشی کسیک قویدو. تک‌لیک یامان درد دیر…

***

جوما آخشامی‌ «خانیم‌آغا» مدرسه‌نی سولاییب، سوپورندن سونرا، یورغون- آرغین ائوده اوتوروب ایستراحت ائدیردی. ساعات دورد یاریم هنده‌ورینده ایدی. «خانیم‌آغا» دوداقلارینین آلتیندا حزین- حزین میزیلداییردی، بو میزیلداماق گئت به گئت حزین بیر ملودییایا چئوریلیردی. باشیندا «قودرت»ین تویو‌هاواسی دولانیردی. بو آندا دایی‌سی «محمد» باشی آلوولو، هیجانلی حالدا ائوه گیریب، اوزون «خانیم»ا دوتوب سوروشدو:
– «قودرت»‌هاردادی؟ ائوه گلمه‌ییب؟
– نئجه، نه اولوب «قودرت»ه؟ یوخ، بو گون ائوه گلمه‌ییب.
ساغ الین قویدو اوره‌گینین باشینا. سویوق تر آلنیندا مونجوقلاندی. یئریندن دورماغا بئله اینجاری اولمادی. اؤلوم- ظولوم بیر تهر یئریندن دوروب، اؤزونو اله آلدی. دایی‌سی «محمد»ین قارشیندا دوروب سوروشدو:
– نه اولوب، ایراق اولسون بلکه «قودرت»ی ماشین ووروب؟
شاشقین بیر حالدا بره‌لمیش گؤزلرینی دایی‌سینین اوزونه زیلله‌دی.
– یوخ، بونلارین هئچ بیری اولماییب. آنجاق بوگون قارایاخا پولیس‌لر ایدارییه گلیب، بیر نئچه موعللیمین پرونده‌سین گؤتوروب آپاریب‌لار. ائله کی منه دئدیلر «قودرت»ده اونلارین ایچینده‌دیر.
«خانیم‌آغا» دایاندیغی یئرده دووارا سؤیکه‌نیب یاواشجا یئره اوتوردو. رنگی آغ- آپباغ اولدو. اللرین باشینا قویوب:- «موراد»ین دردین چکه بیلمیرم، ایسته‌ییرلر تک اوغلومون دا داغین اوره‌گیمه …؟»-. سؤزونو قورتارمادان گؤزلرینین قاپاغی یاواش- یاواش قاپاندی و آجی طالعی‌نین سون نوقطاسی قویولدو. «محمد» ال- آیاغین ایتیردی. اونون هوشدان گئتدیگینی ظن ائتدی. اوزونه سو آتدی آییلتماق اوچون. آمما «خانیم‌آغا» آییلمادی کی آییلمادی…

***

کندین چیخیش یولوندا بیر چوخ کند اهالیسی و «خانیم‌آغا»نین قوهوم- اقرباسی ییغیشیبدیر. دونن تبریزدن «محمد»ین آچدیغی تلفن «خانیم‌آغا»نین ایگیرمی‌بئش ایلدن سونرا دوغولدوغو کنده قاییتماسیندان خبر وئرمیشدی. اوزاقدان اؤلوم ناله‌سی چکن آمبولانسین سسسی گئت- گئده یاخینلاشیردی. «خانیم‌آغا» «قودرت»سیز وطنه قاییدیردی…

سون

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *