چئویرن: رقیه علیقلیان (لاله)
ترجمه: رقیه علیقلیان (لاله)
رقیه علیقلیان (لاله)

قایناق شخص: رحمتلیک آنام فاطمه سلطان دستوری

زامان گئدیشاتیندا ازل گوندن حایات یاشامیندا قادینلار چتینلیکلره تابلاشیب یاشام سوروبلر. گؤزه‌للیکلر، اینجه‌لیکلر گؤرونمه‌ییب، آغیر دردلره تابلاشیب، اینسانلیقدا بؤیوک دَه‌یر قازانیب‌لار. اؤرنگ اولاراق اسکی زامانلاردا ائولرده آبیاری یوخودو، محله‌لرده آخار چشمه‌لر واریدی؛ آمما هر کیمین ائو و محله‌نین آلچاق طرفینده اولسایدی حیطین اورتاسیندا سککینین آشاغیسیندا اوچ دؤرد پیلله دوشردیلر. چشمه اوردان گئچردی و یومالی‌لاری اوردا یویاردیلار. سحر تئزدن یا گئجه یاریسی دا ایچمه‌لی سو چشمه‌دن گوتورردیلر دولدوراردیلار بارداقلارا. محله یوخاریلاشدیقجا سو درینه دوشردی کی بعضی حیط‌لرده قیرخ آیاق چشمه اولاردی، یعنی قیرخ دانا پیلله یئنردی بیر درین زئرزمی‌یه کی دووارلارینی یئکه داشلارینان آهک‌ایله برکیدردیلر. بئش پیلله‌دن بیر دووارلاردا تاخچا دوزلدیب و او تاخچالارادا فانوس یاندیریب قویاردیلار کی ایشیق اولسون. شئح اولدوغونا گؤره ده قورد- قوش‌دا چوخ اولاردی. ائو قادینلاری سحر دوروب قاب- قاشیغی، پار-پالتارلاری دولدوراردیلار دولچانین ایچینه، آپاریب قارانلیق چشمه‌نین ایچینده یویاردیلار. قورتاراندان سونرا قابلاری ییغاردیلار دولچانین ایچینه. او بیری دولچانی‌دا دولدوراردیلار سویونان ائشیکده ایشلتسینلر.
بیر گون “سونا” آدیندا گلین اؤزوده کی بویلویودو گئدیب چشمه‌ده قاینانانین، قایناتانین پالتارلارین، قاب- قاشیغین یویور دولدورور دولچایا، پیلله‌لری چیخاندا پیلله‌یه دولچانین سوو چارپالانیر یاش اولور، آیاغی زویور دیغیرلانیر دوشور چشمه‌یه. ائو آداملاری گؤرور گلیندن خبر اولمادی. نئچه ساعاتدان سونرا اری گلیر گلینین دالیسیجا. گئدیر چشمه‌یه گورور باشی باتیب سویون ایچینه قورتاریب. یانا- یانا یوخسوللوق قوربانینا بؤیله بایاتی چاغیریر:
گول اکدین درمه‌دین هئــچ
دریــبآن سرمه‌دین هئـــچ
بـــالان بـــاغــرینـدا اؤلـــدو
اوزونو گورمــه‌دیــن هئــچ

سـونـامیـن ساچی ائشمـه
اوره‌گی دئشمه- دئشمـه
بـــویلــه تــزه گـلینـیــن
جانینـی آلــدی چشمــه

بـاغچادا سولدو گوللر
آچیلدی سولدو گوللر
سونامین ایـچ دردینـی
کیملر یازار آی ائـللر؟

سام یئلی گلدی باغا
قارقا قوندو بوداغـــا
اوره‌گیمین پاراسـین
نئجه قویوم تورپاغا؟

ســــولارا آخـان گئتــدی
حــسرتله باخــان گئتـدی
اوره‌گیـمیـــن بــاشینـــی
یاندیریب یاخان گئتدی

اللــری ایشلــی گلیــن
گؤزه‌ل یئـریشلی گلیـن
پیلله‌نی وئران اولســون
اوردان سوروشدو گلین

اوزوگو آلمـاس گلینیـن
گوزگوسو کاس گلینیـن
ایندن بئــله تــوتــاجــاق
اوتــاغــی یـاس گلینـین

ائویمین گـولـو سـولــدو
چور باسدی خزل اولـدو
سنیـن آیریلیــق دردیــن
باغریمـدا قه‌هـر اولـدو
آنا سونام اوشــدی گل
یایلیغی قان یاشدی گل
منی یالقیــز قــویانیـــم
تورپاغا یاراشــدی گل

گؤل دولدی قار یاغاندا
توز قاخدی بورلاغانـدا
چشمه گؤزون باتـایــدی
گلینیمـــی بــوغــانــدا
۱۰/۱۱/۱۳۹۴

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قیرخ آیاق چشمه

رقیه علیقلیان (لاله)
www.ishiq.net

آذربایجان ادبیات و اینجه‌صنعت سایتی

قیرخ آیاق چشمه

رقیه علیقلیان (لاله)
www.ishiq.net

آذربایجان ادبیات و اینجه‌صنعت سایتی

قیرخ آیاق چشمه

رقیه علیقلیان (لاله)
www.ishiq.net

آذربایجان ادبیات و اینجه‌صنعت سایتی