مارالانین مارالي/ عباس بارز

barez 1
مارالانین مارالي
عباس بارز

بير عزيز دوستوملا صؤحبت ائده‌رکن
يار گلدي قارشـيمدان آرالي گـئـتدي
کؤنلوم‌هاراي چکيب مني سسله‌ين
دئدي مارالانـين مارالي گـئـتدي

من اونا باخماميش او منه باخدي
باخـيشي جانـيمي يانديردي ياخدي
کيپرييي‌ نـئشتر تک باغريما تاخدي
قويدو شيکاريني يارالي، گـئـتدي

گوٍل اوزون گؤرجه‌يين چـيرپيندي اوٍرک
وفاسيز سئوگيدن دئدي گل ال چک
باشينا اؤرتموشدو بير ياشيل اؤرپک
گؤزلري سورمه‌دن قارالي گـئـتدي

ايسلاندي دفتريم قان گؤز ياشيمدان
سورشسان حالـيمي سور سيرداشيمدان
ائله چاشدی هوشوم چـيخدي باشيمدان
بيلمه‌ديم کيم گلدي‌هارالي گـئـتدي

«بارز» بير سؤز دئدين آغلاتدين ائلي
اوستونه اسمه‌سين آيريلـيق يـئـلي
اوٍرکدن داشلانان محبّت سئلي
ساراسيز گلميشدي، سارالي گـئـتدي

Check Also

آچین قاپی‌لاری گلن باهاردی! / سخاوت عزتی(عندلیب)

آچین قاپی‌لاری گلن باهاردی! سخاوت عزتی(عندلیب) یئنه داش دیبینده گؤیردی دیشه شاختا دا قورتاردی، قیش ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *