آذربايجانيم/ هاشم ترلان‌

LEAD Technologies Inc. V1.01
آذربايجانيم
هاشم ترلان

 اوزون‌ يوللار گودلسه‌ده‌، عؤمروم‌ بويونجا،

 سنسيزله‌ديم‌ گئجه‌-گوندوز آذربايجانيم‌.

 غربت‌ سيخدي‌، سئير ائتمه‌ديم‌ سني‌ دويونجا،

 آغريلاريم‌ اولدو كؤز-كؤز آذربايجانيم‌.

×××

 باشين‌ اوسته‌ قارا يئللر اسنده‌…مغرور

 اوغروندا كي‌ دؤيوشلرده‌ اؤتوب‌ هر آنيم‌.

 سني‌ “اقوام”‌ سايانلارا دئديم‌: دايان‌،دور،

 اؤز خالقيمين‌ طالعیدير آذربايجانيم‌.

×××

 چكيلنده‌ او شوخ‌ آدين‌ قالخديم‌، دايانديم‌،

 ديليم‌ ياساق‌،آديم‌ ياساق‌ نئجه‌ باخيم‌ من‌.

 توپوق‌ ووران‌ ديليمده‌كي‌ رنگه‌ بويانديم‌،

 اي‌ گؤزلري‌ يولدا قالان‌ آذربايجانيم‌.

×××

 صدام‌ چكيب‌ قلينجيني‌ آت‌ اويناداندا،

 اؤن‌ سيرادا آدديملادي‌ دؤيوش‌ كاروانيم‌.

 بوتون‌ ائللر قان‌ گؤلونده‌ اوزن‌ بير آندا،

 هاراي‌ چكدي‌، من‌ ده‌ وارام‌ ،آذربايجانيم‌.

×××

 قانيميزلا امضالانميش‌ اون‌ بئشينجي‌ اصل‌،

 دئيير مني‌ اونوتمايين‌ اؤتور دؤرانيم‌.

 دئسه‌‌هاني‌ “قورقود ديلي‌” صاباح‌ گلن‌ نسل‌،

 نه‌دير جواب‌؟ آنام‌ منيم‌، آذربايجانيم‌.

×××

 عؤمور زيروه‌، كؤنول‌ داردا، كؤلگم‌ ديواردا،

 نوه‌لره‌ “پدر بزرگ”‌ اولوب‌ عنوانيم‌.

 آنا ديليم‌! اولما ملول‌ بير شن‌ بهاردا

 سیغال‌ وئرر تئللرينه‌ آذربايجانيم‌.

×××

 اود اوغلويام‌، آلوولاردان‌، اوددان‌ يارانديم‌،

 بابكيمين‌ قلينجيدير منيم‌ درمانيم‌.

 بير سئودانين‌ داراغيندان‌ كئچيب‌ دارانديم‌،

 اؤز اوغلؤنام‌، دوز اوغلونام‌ آذربايجانيم‌.

×××

 سيز اي‌ وطن‌ دياريندان‌ اسن‌ كولكلر،

 اسين‌! دولون‌، اوره‌ييمه‌ سؤنسون‌ هیجرانيم‌.

 صاباح‌ دوغما شوخ‌ ديليني‌ كسن‌ بيلكلر،

 سجده‌ قيلار شهرتينه‌ آذربايجانيم‌.

×××

 من‌ ترلانام‌، آذربايجان‌ آديم‌، سانيمدير،

 او گولمه‌سه‌، من‌ گولمه‌رم‌، سؤكولمز دانيم‌.

 آنا ديليم‌ بدنيمده‌ آخان‌ قانيمدير،

 بو قان‌ سنين‌، بو جان‌ سنينن‌ آذربايجانيم‌.

Check Also

دیل‌سیزلیین دیلی / ع.ن. چاپار

دیل‌سیزلیین دیلی ع.ن. چاپار منه دیل یوخ، دیل‌سیزلییی اؤیره‌دینیز! منه دئیین معناسینی – اوغرون – ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *