غصه/ آنتووان چئخوف- چئویرن: ش. آغایف

ch
غصه
آنتووان چئخوف- چئویرن: ش. آغایف

     «درديمي كيمه دئييم؟»                                     

                            زبور

   آخشام توران قوووشموشدو. ايري سولو قار پارچالاري يئني يانميش فنرلر، اطرافيندا تنبل- تنبل فيرلاناراق نازيك و يوموشاق لايلارلا داملارين اوستونه، آتلارين بئلينه، آداملارين چييينلرينه و پاپاقلارينا تؤكولور. فايتونچو «ايونا پوتاپوف» باشدان آياغا خيال كيمي آغ- آپباغ‌دير. او جانلي آدامين اييله بيله‎جه‎يينه قده‌ر بئليني ديره‌ك قوزالادا اوتورموش و ترپنمير. بؤيوك بير قار قالاغي بئله اونون اوستونه دوشسه ده يقين كي، يئنه قاري اؤز اوزه‌ريندن سيلكه‌لمه‌يي لازيم بيلمز. اونون آت‌جيغازي دا آغ و حركت‌سيزدير. اؤز حركت‌سيزلييينه و دوم- دوز آياقلاري ايله بو آت‌جيغازلارا اوخشايير. احتيمال كي، آت دوشونجه‌يه دالميشدير. كوتان‌دا عادت ائتميش اولدوغو بوز منظره‌لردن آيريليب، بورايا عجاييب اودلارلا، آراسي كسيلمه‌ين گورولتو و قاچيشان آداملارلا دولو گيردابا دوشن‌لر دوشونمه‌يه بيلمز… «ايونا» و اونون آت‌جيغازي خئيلي واخت‌دير كي، يئرلريندن ترپنمه‌ييبلر.

   اونلار ناهاردان چوخ قاباق حيطدن چيخميشلار، لاكين سيفته وئر‌ن يوخدور كي، يوخدور. بودور شه‌هرين اوزه‌رينه آخشام توراني چؤكور. فنر ايشيقلاري‌نين سولغون رنگي دييشيب، جانلانير. كوچه‌ده حركت، سس- كوي چوخالير. ايونانين قولاغينا سس گلدي:

_ فايتونچو، ووبوروق كوچه‌سينه!… فايتونچو!

 ايونا ديكسينير و قاردان بير- بيرينه ياپيشميش كيرپيك‌لري آراسيندان باشليقلي شينئل گئيميش بير حربي خيدمت‌چي گؤرور.

_ «ووبوروق» كوچه‌سينه دئيه، حربي خيدمت‌چي تيكرار ائدير- سن ياتميسان نه‌دير؟ «ووبوروق» كوچه‌سينه!

   راضي‌ليق علامتي اولاراق ايونا جيلوولاري چكير. آتـين بئليندن و اونون اؤز چييين‌لريندن لوپا- لوپا قار تؤكولور. حربي خيدمت‌چي خيزه‌يه ايله‌شير. فايتونچي دوداقلاريني مارچيلداداراق بوينونو اؤردك كيمي اوزادير. يئرينده ديكه‌لير و احتيياج‌دان داها چوخ، آت‌جيغازدا بوينونو اوزادير. اوزون آغاجا بنز‌ر آياقلاريني ايير و ايستر- ايسته‌مز يئريندن ترپه‌نير…

ايلك آدديم‌لاردان «ايونا» قارانليق و ايره‌لي- گئري حركت ائد‌ن ازدحام ايچه‌ريسيندن سس‌لر ائشيدير:

_‌هارا سورورسن قولئيباني؟ شئيطان سني‌هارا چكير؟ ساغدان گئت!

_ سن سورمك باجارميرسان؟ ساغا سور!- دئيه حربي خيدمت‌چي حيرص‌لنير. هر طرفي اؤرتولو بير فايتونون سوروجوسو دئيينير. يولو کئچرکن چييينيني آتـين باشينا توخونان بير باشقاسي قوللاريندان قاري سيلکه‎له‎يير و حیرصلی- حیرصلی باخير. ايونا اوستونده اوتورموش کيمي قوزالاردا قوردالانير. ديرسک‎لري ايله اطرافيني دومسوک‎له‎يير. بوخار وورموش آدام کيمي گؤزلريني قييير، سانکي‌هارادا اولدوغونو و نه اوچون بورايا دوشدويونو آنلايا بيلمير.

– نه اجلاف‎دير- دئيه حربي خيدمت‎چي اونا سوز آتـير. ائله بيل کي، قصد‎ن سنينله توققوشماغا و يا آتـين آلتـينا دوشمه‎يه چاليشير. يقين ديل بير اولوبلار. ايونا دونوب سرنيشينه باخير و دوداقلاريني ترپه‎دير. بير شئي دئمک ايسته‎دييي گؤرونور آنجاق بوغازيندان خيريلتي‎دان باشقا هئچ نه چيخمير. نه وار؟ دئيه حربي خيدمت‎چي سوروشور.

ايونا گولومسه‎يه‎رک آغزيني ايير، بوغازينا گوج وئره‎رک خيريلدايير.

_ آغا، منيم بو هفته… اوغلوم اولدو.

_ هم… ندن اولدو؟

ايونا بوتون گؤوده‎سي ايله سرنيشينه چئوريله‎رک دئيير:

_ کيم بيلير، يقين کي، قيزديرمادان، اوچ گون خسته‎خانادا ياتدي، سونرا…سونرا اولدو…

ـ آللاهين امري‎دير.

_ دونده‎ر ايبليس- دئيه قارانليقدا سس‎لر ائشيديلدي- يولوندان چيخميسان، نه‎دير؟ قوجا کؤپک- گؤزلريني آچ!

_ سور- سور- دئيه سرنيشين ديلله‎نير- بئله يئريش‎له بيز صاباحا کيمي چاتا بيلمه‎ريک. قوو آتي!

   فايتونچو يئنه بوينونو اوزادير. بير قده‎ر يئريندن قالخير. آغير بير اينجه‎ليکله قامچيسيني يئل‎له‎يير. سونرا بير نئچه دفه دونوب، سرنيشينه باخير، لاکين او گؤزلريني يومموشدور. يقين کي، دينله‎مک هوسينده دئييلدي. ووبوروق کوچه‎سينده سرنيشيني دوشوروب آش‎خانا قاباغيندا فايتونو ساخلايير. قوزالادا اييلير و يئنه ده ترپنمز اولور… سولو قار يئنه ده اونو و آت‎جيغازي آغارتماقدا داوام ائدير. بئله‎جه بير-ايکي… ساآت کئچير. اوچ نفر جاوان اوغلان قالوشلاريني برک‎دن شاپپيلداداراق سويوشه- سويوشه سكي ايله کئچير. اونلارين ايکيسي اوجا بوي و نازيک، اوچونجوسو ايسه بالاجا و قوزبئل‎دير.

_ فايتونچو، پوليس کورپوسونون يانينا!- دئيه. قوزبئل جينگيلتي‎لي سسله چيغيرير:

_ اوچوموزو بير عابباسيئيا!

   ايونا جيلوولاري چکير و آغزيني مارچيلدادير. بير عابباسي او قده‎ر ده موناسيب بير قييمت دئييلدير. آنجاق ايندي او قييمته باخمايير… اونون اوچون ايندي بير ماناتلا بير شاهي‎نين فرقي يوخدور، تکي سرنيشين اولسون… جاوان اوغلانلار بير- بيريني ايته‎ليه- ايته‎ليه و نالاييق سوزلر دئيه- دئيه ياخينلاشير و اوچو ده بيردن خيزه‎يه سوخولور. اوچوندن‌هانسي بيريسي آياق اوسته دورماسي و‌هانسي ايکيسينين ايله‎شمه‎سي مسله‎سي موذاکيره اولماغا باشلاييرلار. اوزون صوحبت‎دن، شيلتاق و مذمتدن سونرا بئله قرارا گلديلر کي، قوزبئل‌هاميدان بالاجا اولدوغو اوچون آياق اوسته دورسون.

_ قوو گوره‎ک.! دئيه، آياق اوسته دوروب نفسيني ايونانين دوز پئيسرينه پوسکورن قوزبئل جينگيلده‎يير. – قامچيلا … آمما پاپاغين لاپ قييمت‎لي‎دير‌ها.

_ قارداش بوتون پئترزبورگ دا بوندان پيسيني تاپانمازسان.

_‌ها..‌ها..- دئيه ايونا قاققيلدايير- اولانيم بودور.

_ من ده، ائي، اولانيم بودور. – آتي قوو. بوتون يولو بئله‎مي سوره‎جکسن.، هه؟ يوخسا پئيسرين يوموروق ايسته‎يير؟…

اوزون بوي‎لاردان بيري:

_ باشيم چاتلايير،- دئيير، دونن دوکماسو گيلده واسکا ايله ايکيميز دورد شوشه کونياک ايچديک.

_ باشا دوشمورم کي، يالان دانيشماغين نه معناسي وارميش!- دئيه- او بيري اوزون بويلو حيرصله‎نير.- حئيوان کيمي يالان دئيير.

_ آللاهين غضبينه گليم کي، دوزدور…

_ بلي… بيتين اوسکورمه‎سي کيمي بير حقيقتدير.

_ هئي- هئي- ايونا هيريلدايير- کئفجيل اوغلاندير.

_ توف سني لعنته گله‎سن- دئيه- قوزبئل اوزوندن چيخير:

_ ائي کافتار آزار توتموش. بير ديء گوروم سوره‎جکسن يا يوخ؟ بئله آت سوره‎رلرمي؟ قامچيلاسانا آتي هئي ايبليس. بيرده… ياخشي- ياخشي وور.

 ايونا قوزبئلين بده‎نينين ييرغالانماسي‎ني و اونون تيتره‎ک سسيني اوز آرخاسيندا حيس ائدير. او اوستونه ياغديريلان سويوشلري ائشيدير. اينسانلاري گؤرور و يالقيزليق حيسّي ياواش- ياواش قلبيندن چکيلمه‎يه باشلايير. قوزبئل او قده‎ر سؤيور کي، آخيردا آلتي مرتبه‎لي دولاشيق بير سؤيوش‎دن بوغازي توتولور. آز قالير کي، اؤسکورک‎دن بوغولسون. اوزون بويلولار ناديژدا پتروونا آدلي کيمينسه باره‎سينده دانيشماغا باشلاييرلار. ايونا دؤنوب اونلارا باخير- بيرآز ساکيت اولمالاريني گؤزله‎يندن سونرا دونوب بيرده باخير.:

_ منيم ده بو هفته بير اوغلوم اولدو- دئيه.، دونقولدايير.

_‌هامي‎ميز اؤله‎جه‎ييک- دئيه، قوزبئل اؤسکورک‎دن سونرا دوداغيني سيليب، آه چکير- دي سور، سور گؤره‎ک! آغالار من داها بئله دؤزه بيلمه‎رم.

_ او بيزي نه واخت آپاريب چاتديراجاقدير؟

_ يونگولجه بير پئيسرينه ايليشديريب اونو بير حرکته گتيرسنه!

_ کافتار آزار توتموش، ائشيديرسنمي؟ قيرارام بوينون‌ها… سيز ائله مخلوق‎سونوز کي، نازينيزي چکمک‎دنسه بير يوللوق پييادا گئتمک ياخشي‎دير.

_ ائشيديرسنمي؟ ايلان وورموش يوخسا بيزيم سوزوموز وئجينه دئييل؟

ايونا پئيسرينه وورولان سيلله‎نين ضربه‎سيني حيسّ ائتمک‎دن آرتـيـق اونون سسيني ائشيدير.

_ هئي- هئي …. کئفجيل آغالار… آللاه سيزي سالامات ائله‎سين.

_ فايتونچو، سن ائولي‎سنمي؟- دئيه اوزونلاردان بيري سوروشور:

_ منيم آرواديم ايندي قارا تورپاقدادير. هئي- هئي… يعني قبيرده‎دير- اوغلو دا تزه اولدو. من ايسه ساغام… قريبه ايشدير:

_ اؤلوم قاپيني دييشيک سالميشدير: منيم يانيما گلمک عوضينه اوغلومون اوستونه گئدير…

   ايونا اوغلونون نئجه اؤلدويونو ناغيل ائتمک اوچون چئوريلير، لاکين او سؤزه باشلاماميش، قوزبئل يونگولجه آه چکير. آللاها شوکور، چاتديقلاريني بيلديلر. ايونا عابباسيني آليب اوزون موددت تا اونلار قارانليق دروازادا گؤزدن ايته‎نه قده‎ر اونلارين دالينجا باخير. او يئنه ده يالقيزدير. اونون اوچون يئني‎دن سوکوت باشلايير. آز موددت اوچون ساکيت اولموش غصه يئني‎دن باش قالديرير و اونون اوره‎ييني داها آرتـيق گميرمه‎يه باشلايير. ايونانين تلاش و اضطيرابلا دولو گؤزلري کوچه‎نين هر ايکي طرفيندن حرکت ائدن ايزديحاما تيکيلير. گؤره‎سن بو مينلرجه آدامين ايچه‎ريسينده اونون درديني دينله‎يه بيله‎جک هئچ اولماسا بير نفر تاپيلارمي؟ لاکين نه او، نه ده اونون غصه‎سي بو قاچيشان آداملارين وئجينه دئييل، اونون غصه‎سي بؤيوک و سونسوزدور. اگر ايونانين سينه‎سي ياريليب، غصه‎سي چؤله تؤکولسه، يقين کي، دونياني دولدورار. آنجاق بونونلا بئله او گؤرونمور، او ائله بير همييت‎سيز قابيغا بورونه‎ بيلميشدير کي، گوندوز چيراقلاردا اونو گؤرمک اولماز…

   ايونا الينده باغلاما اولان دالانداري گؤرور و اونونلا دانيشماغي قرارا آلير.

_ عزيزيم ايندي ساعآت نئچه اولار؟- دئيه سوروشور.

_ اونا ايشله‎يير، بورادا نييه دايانميسان؟ سور گئت.

   ايونا بير نئچه آدديم ايره‎لييه سوردو. بئليني ايير و يئني‎دن غصه‎يه دالير. اينسانلارا بير آغير حيسّ ائد‎ن بير آدام کيمي بئليني دوزلدير. باشيني سيلکه‎له‎يير و جيلوولاري چکير…حالي چوخ خارابدير. او داها تاب گتيره بيلمه‎يير. حيه‎طه دوغرو- دوشونور- حيه‎طه.

   آت‎جيغازدا ائله بيل اونون فيکريني دويموشدور. يورغا قاچماغا باشلايير. ساعآت ياريم کئچندن سونرا ايونا آرتـيق سوبانين يانيندا ايلشميشدير. سوبانين اوستونده دؤشه‎مه سکامييالارين اوستونده جاماعات خورولدايير.‌هاوا چوخ کثيف‎ و بورکودور. ايونا ياتانلارا باخير، باشيني قاشييير و ائله- بئله تئز قاييتماسينا تأسّوف ائدير.

_ يولاف پولو دا چيخارا بيلمه‎ديم.- فيکيرلشير- ائله- بلا بوراسيندادير. البتّه آدام اؤز ايشيني بيلنده، اؤزو ده, آتي دا توخ اولاندا هميشه راحات اولور…

کونج‎لرين بيريندن گنج بير آرپاچي قالخير. يوخولو- يوخولو هيققيلداياراق سو وئدره‎سينه دوغرو يونه‎لير.

_ سو ايچمک‎مي ايسته‎ييرسن؟- دئيه ايونا سوروشور.

_ معلوم ايشدير کي[ايسته‎ييرم].

_ هـ … نوش اولسون… آنجاق قارداش، منيم اوغلوم اؤلوبدور… ائشيديب‎سن‎مي؟ بو هفته خسته‎خانادا… اوزون احوال‎دير. ايونا باخير و سؤزلري‎نين نه جور تأثير باغيشلاديغيني گؤرمک ايسته‎يير. لاکين هئچ بير شئي سئزمير. گنج يورغاني باشينا چکه‎رک يوخويا گئتميشدير. قوجا آه چکير و قاشينير. گنج سو ايچمک ايسته‎دييي کيمي او دا دانيشماق ايسته‎يير. اوغلونون اؤلوموندن  بير هفته کئچير. لاکين او هله هئچ کسه دويونجا دانيشماميشدير. او آغيللي- باشلي، يئرلي- يئرينده دانيشماليدير. اوغلونون نه‎جور خسته‎لندييي، نئجه عذاب چکديييني، جان‎وئرمزدن قاباق نه‎لر سؤيله‎ديييني و نئجه اؤلدويونو ناغيل ائتمک لازيم‎دير. قيزي آنيسييا کندده قالميشدير… اونون دا حاققيندا دانيشمالي‎دير. اونون ايندي او قده‎ر دانيشيلاسي سؤزو واردير کي!… اونا قولاق آسان آه چکمه‎لي، اونا آجيمالي و اونا دوعا اوخومالي‎دير… آروادلارلا دانيشماق داها ياخشي‎دير. اونلار آخماق اولسالار دا، ايکي‎جه کلمه سؤز دئيه‎ن کيمي هؤنکورمه‎يه باشلاييرلار.

 _ گئديب آتا باخماق لازيم‎دير. سونرادا ياتماق اولار… يوخو قاچمايير کي،… ايونا گئيينيب تؤوله‎يه آتـي‎نين يانينا گئدير. او يولاف حاققيندا، اوت حاقيندا،‌هاوا حاققيندا فيکيرلشير. او تک اولاندا اوغلو حاققيندا دوشونه بيلمير. هميشه اونون باره‎سينده باشقاسي ايله دانيشا بيلر.

   آنجاق اؤزلويونده اونون باره‎سينده فيکيرلشمک، اونون شکيليني اوز خاطيره‎سينده جانلانديرماق قورخونج و دؤزولمز بير دردير.

 _ گؤوشه‎ييرسن؟- دئيه، ايونا آتي‎نين پاريلدايان گؤزلريني گؤرن کيمي سوروشور، گؤوشه، گؤوشه…. اينديکي يولاف پولو قازانا بيلمه‎ديک، اوت يئيه‎ريک…بلي… من قوجالميشام. داها سوره بيلميرم… اوغلومون سورمک واختي ايدي، منيم يوخ… اوندان اصيل فايتونچو چيخاردي… تکي ياشايايدي…

   ايونا بير قده‎ر سوسور. سونرا يئنه داوام ائدير:

 _ بلي منيم عزيزيم، مايدان آت… کوزما اييونيچ داها يوخدور… عؤمورونو بيزه تاپشيردي… ناحاق يئره اؤلدو گئتدي… ايندي فرض ائده‎ک کي، سنين بير دايچان وار و سن اونون دوغما آناسي‎سان. دئيه‎ک کي، بيردن او اؤلدو گئتدي و عؤمورونو سنه باغيشلادي… آخي يازيق‎دير. دئييل‎مي؟

آت‎جيغاز قولاغيني شکله‎ييب، گؤوشه‎يير و نفسي ايله صاحيبي‎نين الين ايسينديريردي. ايونا اؤزونو اونودور و هر شئيي اونا ناغيل ائدير.

ایضاح:

  • آنتون پاولوویچ چِخوف (به روسی: Анто́н Па́влович Че́хов)‏ ‏ (۲۹ ژانویه ۱۸۶۰ – ۱۵ ژوئیه ۱۹۰۴) داستان‌نویس و نمایش‌نامه‌نویس برجستهٔ روس است.هر چند چخوف زندگی کوتاهی داشت و همین زندگی کوتاه همراه با بیماری بود اما بیش از ۷۰۰ اثر ادبی آفرید. او را مهم‌ترین داستان کوتاه‌نویس برمی‌شمارند و در زمینهٔ نمایش‌نامه‌نویسی نیز آثار برجسته‌ای از خود به جا گذاشته‌است و وی را پس از شکسپیر بزرگترین نمایش نامه نویس میدانند. چخوف در چهل و چهار سالگی بر اثر ابتلا به بیماری سل درگذشت.(وک
  • بو حکایه‌نی “ش.آغايف” آذربایجان دیلینه چئویریب و بازیچی “نریمان ناظیم”‌ابسه اونو عرب الیفباسینا کؤچوروبدور.

Check Also

یوخو / نجیب محفوظ – روسجادان چئویرن: خاطره نورگول

یوخو نجیب محفوظ – روسجادان چئویرن: خاطره نورگول بو بویدا توزلو-تورپاقلی حَیَطده جمعی بیرجه پالما ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *