جانینا جان گلدی اوره‌گیم قیزیشدی / حسین خوجالی

جانینا جان گلدی اوره‌گیم قیزیشدی
حسین خوجالی

«عزیزیم یانام سنه
کؤز اولام یانام سنه
قوربانام دور قالخ گئده‌ک
چای قویوب آنام سنه»

پاییز گلدی
سارالدین، سولدون
توتونموشدون بو آغاجا
خیشیلتینی سیزیلداییردین او گئجه
هموگلوبین‌لرین بیر-بیر اومودومو کسیردیلر
میلیون‌لار دفعه اوزو اوسته دوشدوم
سنه تازا ویریلمیش قانین سلول‌لارینا توتونوب، قالخدیم
بو آخشام آیاقلارین شیشمیشدی
و منیم اوره‌گیم آغرییردی
اورمو گؤلونون بوتون باتمیش سولاری اوره‌گیمدن قایناییردی خسته‌خانا یاتاغی‌نین آلتینا
و سن یاتیردین، یاتا بیلمیردین
باغریم اسیردی، جانیم سیلکه‌لنیردی
۳۳نجو ایلین حیکایه‌سی ایدی
بو ایلین سویوغو پاییزدان ائرکن جانیمدا اوتوردو
چیراغینا یاغ تؤکدولر آغ ساققال، سن یاتمیشدین
۱۰ گون یانار دئدیلر بو یاغ
جانینا جان گلدی
اوره‌گیم قیزیشدی
چیراغی سؤندوردوم.

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *