قاپ قارا جییه‌رین سئوگیسی / آغشین یئنی‌سئی(آذربایجان جمهوریسی)


قاپ قارا جییه‌رین سئوگیسی
آغشین یئنی‌سئی(آذربایجان جمهوریسی)

بدنینه توخوندوقجا کدرله‌نیرم،
کدرله‌نیرم کی، بو گؤزللیک بیر گون حیاتدا اولمایاجاق.
اؤله‌جه‌یم‌سه، بو گؤزللییین یئرینی تانریدان سوروشماق اوچون اؤله‌جه‌یم.
تانرییا – اینسانی پالچیقدان، سئوگینی آیریلیقدان،
آیریلیغی اؤلومدن یاراتمیش بو تانریسیزا ثوبوت ائتمک ایسته‌ییرم کی،
سنی تاپماقدان اؤترو، یوخا چیخماقدان بئله قورخمورام.
یاشاییب سنی ایتیرمکدن‌سه،
اؤلوب سنی تاپماقدی سئوگی – منیم اوچون.
من تانرینین یوخ، سنین یوخلوغونون آتئیستی‌یم.
گؤزلرین بوتون قادینلارین گؤزلرینین معلیمه‌سی ایدی
اینسانا نئجه باخماغی اؤیره‌دیردی.
اللرین اوزاقلاشماق درسی کئچیردی.
چونکی بیز
اینسانلاردان اوزاقلاشا-اوزاقلاشا یاخینلاشمیشدیق بیر-بیریمیزه.
سنی‌هامینی ایتیردیییم یئرده تاپمیشدیم، دوقتور.
بوندان سونرا باشقاسینی سئوسن ده سئوینه‌جه‌یم
بیله‌جه‌یم کی، او دا منم.
آما سن
بو بویدا گؤزلری نئجه، کیمین آرخاسیندا گیزلده‌جکسن،
هاردان تاپاجاقسان او نهنگی؟
دانیشدیقجا آغلاماغیم گلیر،
آغلادیقجا سوسماغیم
سوسدوقجا یوخا چیخماغیم گلیر، دوقتور.
باخ، یئنه ده آغریییرام
ساعاتیمین عقربی سول قولومو سانجیب!
زامانین زهرینی قاتیب قانیما.
بیر اینسان اؤرت اوستومه، تنهالیقدان اوشویورم
باخ، ال چاتماز آغاجلارین باشیندا مورگوله‌ین کولک اسمه‌یه باشلادی یئنه
گئجه‌نین قارانلیغیندان آغا آپپاق قار یاغدی
اوشودوک و گؤیلر یئنه ثوبوت ائتدی کی،
سئونده قارانلیق دا آغا آپپاق‌دی.
دوقتور، هر قادین حوانین اوزاق قوهومودو
هر کیشی آدمین یاخین دوستودو.
آلما آغاجی گؤرنده اییره‌نیرم
چونکی بو آغاجین اجدادی
قادینین جنّت ده یئدییی
قاداغان اولونموش مئیوه‌نین
معده‌سینده گتیردییی توخومودو.
گولو آغاج اولماق آرزوسو سولدورور
بیزی تانری اولماق ایدعاسی اؤلدورور.
آغاجلار تانرینین اؤزونه باغیشلادیغی نهنگ گوللردی.
واخت واردی، اومیدسیزلیییم ده
منه یاشاماق اوچون اومید وئرردی.
دوقتور، گئری دؤنمک، یئنی دن گیل، پالچیق اولماق ایسته‌میرم
منی ائله سئو کی، یئنی دن پالچیق یوخ،
بیریوللوق یوخ اولوم.
آچ قولونداکی ساعاتی، دوقتور، گؤزللییینی زامانا قیسقانیرام.
بیز آیری-آیریلیقدا او قده‌ر خوشبختیک کی،
بیر یئرده اولاندا بیر آز دا بدبخت اولماق ایسته‌ییریک.
دوقتور، منی اونوتسان، ائله اونوت کی،
سندن سونرا هئچ کیمین یادینا دوشمه‌ییم.

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *