یورا بیلمز یوللار منی/ مدینه گولگون


یورا بیلمز یوللار منی
مدینه گولگون

گاه آراندا, گاه داغدایام

گاه چمنده, گاه باغدایام

یاخیندایام, اوزاقدایام

یورا بیلمز یوللار منی.

گاه باهار, گاه قارلی قیشام

بو حیاتدان دویمامیشام

سفرده‌یم سحر، آخشام

یورا بیلمز یوللار منی.

گاه آنالار آنام اولار

گاه بولاقلار لایلام اولار

او لایلالار دونیام اولار

یورا بیلمز یوللار منی.

گاه اومیدیم چیچکله‌نر

گاه بیر گونوم ایله دؤنر

حیات دنیز، قالخار ، ائنر

یورا بیلمز یوللار منی.

گاه بولود تک دولار کؤنلوم

گاه تک- تنها قالار کؤنلوم

گاه بلدچی اولار کؤنلوم

یورا بیلمز یوللار منی.

گاه قوشلارلا یاریشارام

گاه سئللره قاریشارام

دره ائنیب داغ آشارام

یورا بیلمز یوللار منی.

نغمه دولو بیر اوره‌یم

گاه جوشغونام، گاه کؤوره‌یم

بیر اومیدلی گله‌جه‌یم

یورا بیلمز یوللار منی.

بابام قورقودون سازی‌یام

ننه‌م تومروسون قیزی‌یام

زامان- زامان یاناسی‌یام

یورا بیلمز یوللار منی.

ائل آرخامدیر دار آیاقدا

بیر معنا وار یاشاماقدا

دوغولدوغوم بو تورپاقدا

یورا بیلمز یوللار منی.

گاه دؤنه‌رم سؤنمز اودا

آرزوم دنیز، من بیر آدا

آند ایچیرم بو حیاتا

یورا بیلمز یوللار منی.

1977

 

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

One comment

  1. تاری بو بویوک شاعیره میزه رحمت ائتسین . اونون ائله بیر مصرع شعری اونلار دیوان لا برابر گلر !
    یورا بیلمز یوللار منی

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *