عدالت / علی جوادپور

عدالت
علی جوادپور

ایل‌لر، ایل‌لر قاباق‌ایدی. تبریزده آت‌اوستو بیر گؤروشدوک. قیشین اوغلان چاغی‌ایدی. – دئدیم آی اوستاد بیز خداآفریندن قارلی یول‌لار گه‌دیک‌لر آشا-آشا گلمیشیک له‌له کیمی… داوامیندا دئمک ایسته‌ییردیم‌کی؛ اصلی‌نین دلی‌سی اولان کرمی‌یوخ، یانیق کرمینین کرمینی، عدالتی گؤرمک اوچون. سؤزومو کسدی: – آیه له‌له کیم‌دی؟! کرم کیم‌دی؟! کرم منم، له‌له منم، اصلی منم، قارا‌ملیک منم، ساز منم، سؤز منم و…سونسوز بیر جوشقویلا، هیجان‌لا سونو “من”‌له قورتاران جومله‌لری آردیجیل سؤیله‌دی عاشیق عدالت. دۆزو من بیر او قده‌ر دؤشونه دؤیمک‌لیگی و اؤزونو اؤیمک‌لیی گؤزله‌میردیم عاشیق‌دان. بیر تهر چاش-باش قالمیش‌کیمی‌اولدوم…ایل‌لر اؤتدو. بیز قاراداغین عاشیق، ساز و داستان‌لار بئشییینده ائولنمیش، ائشیک‌لنمیش بلکه‌ده ائو-ائشیک‌سیزلنمیش آدا‌م‌لاریق. عاشیق‌لارین دیلیندن سؤیله‌نیلن ناغیلار روحوموزون ان یاخین قوهوم‌لاری اولوب ایل‌لر بویو. همن ناغیل‌لارین ائپیک قول‌لاریندان دئییشمه و حربه-زوربا احوال‌لی پارچالار واراق‌لاندی بئینیمده: “مئیدانیما گلن عاشیق/ چاللام داش‌دان داشا سنی.”، “به‌یه‌نمیرسن منیم کیمی‌آشیغی/ سنین قولونو باغلاماغا گلمیشم.” و….
اوستاد عاشیق‌لار ائل صحنه‌لرینده بو اوبرازلاری بو دؤیوشکن و دئییشکن‌لیک‌لری بؤیوک باجاریق‌لا جانلاندیریرلار. بونلار‌هامیسی صحنه‌ آکتیورلوغودور‌ و عاشیق صنعتینده اوستادلیق و بارجاریق آیامالاریندان بیری… آمما سن‌دئمه عاشیق عدالت کیمی‌بیر غیر عادی صنعتکار رئال حیاتینی‌دا بیر اوبراز کیمی‌یاشاییرمیش. او، چرچیوه‌لره، عادی یاشاییشین عادی منطیق‌لرینه اویغون گلن بیر روحا مالک دئییلمیش! او اؤزونو اؤیمک‌لیک‌ده ائله اورالاردان گلیرمیش…بلکه هئچ بیر عادی‌لیک بو قده‌ر غیرعادی شاه اثرلری ایفا ائله‌مه‌یه یئترلی اولا بیلمزمیش. داریسقال چئوره‌لره سیغماز بیر روحون، سربست‌لیین، دلی‌سوولولوغون و یانقی‌نین محصولودور یانیق‌کرمی، کرم‌گؤزل‌له‌مه‌سی، روحانی، قاراچی و تای‌سیز عدالت بارماغیندا نئچه-نئچه عاشیق‌هاوالاری…
سئوگی‌نین یانیب یاخیلیب کۆله دؤنموشو، قارلی، له‌له‌لی، گه‌دیک‌لی، قارا ملیک‌لی، قارا گونلو کرم‌دن زامان‌لاردیرکی بیر یانیق‌کرم‌هاواسی باش قالدیریب سلطانلیق ائدیر. او گونلرین قاراسینی یاشییان سئودا ییخیلمیشی و یاخیلمیشی قول‌کرمین، یانیق کرمیسی‌هاردان بو قده‌ر کؤنول‌لرده شاه‌لیق ائله‌مه‌یه باشلادی. بوردا عدالتین سئحرینی، کرم‌لییینی گؤرمه‌مک اولارمی؟!…
بیز ایل‌لردیر‌هانسی حؤکمرانلیغین کرمی‌اقلیمینده بئله بیر سرخوشلوغا تاپشیرمیشیق روحوموزون تئل‌لرینی و یاشیییریق؟! ناغیلین‌می، سازین‌می، کرمین‌می، عدالتین‌می؟!…
نریمان حسن‌زاده‌‌نین عاشیق عدالته حصر اولموش شعریندن چوخ سئودیییم بیر بند وار:
چال “عدالت” دادیم سازین دوزونو
قولاق آسیم اونا عؤمروم اوزونو
باش آچمادیم نه‌دیر کرم اووسونو
کرمی‌قول کرمی‌سی شاه‌ایمیش.”

یولو داواملی اولسون سازین، عدالتین…

Check Also

صفرخان اؤلمزدیر! / ائلدار موغانلی

صفرخان اؤلمزدیر! / ائلدار موغانلی (۱۹ آبان – صفرخانین اؤلومونون ایل دؤنومو) آذربایجان خالقی آزی ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *