دئمک آستانا ده‌ییشیلیر … / معصوم جبارپور

دئمک آستانا ده‌ییشیلیر …
معصوم جبارپور

کیشی اوتوراجاغین اوستونده یئر به یئر اولوب ساققالینی سیغاللاییب سونرا ایکی الین اوزونه قویوب دیرسکلرینی ماسانین اوستونه دایاییب، اؤنونده اوتوران قیزین گولوشلرین خاطیرلاییب، گؤزلوگون اوستوندن یئنیدن قیزا باخدی؛ سانکی دونیانین بوتون قایغیلاری قیزجیغازین گؤزلرینه چؤکموشدو؛ بیر کیچیک دینقیلدی گؤزله‌ییردی گؤزلری قان پیناری اولسون…
باخیشینی سول یانا چئویریب، قیزین کناریندا اوتوراجاقداکی اوغلانا باخدی؛ گؤزلویون اورتا بارماغیله اوسته ویریب، قیقاج باخیشلارینی یئنیدن اوغلانا تیکدی؛ سانکی هئچ بیر شئی اؤنملی دئییل! بئله بیر گیزلی گولوشده دوداقلاریندا گیزلیج-پانچ اویناییردی!
الین آرپا بوغدا ساچلارین اورتاسیندا گزدیریب، چاشقینجا ماسانین اوستونده اولان بوشانماق قرارینا باخدی؛ قیرخ نئچه ایللیک عؤمورونو بو یولدا کئچیرمیشدی… بیرگون ایکی آیری اوره‌گی بیرلشدیریب، او بیریسی گون ایکی اوره‌گی آییرمیشدی.
قیزین کیملیگین الینه آلیب واراقلادی، اوره‌یینه بیر سانجی تاخیلدی؛ ایکینجی کز بیر یووا داغیلیردی!
کیملیگی بوکمه‌دن باشین اوسته قالخیزیب دئدی:
– ایسته‌سه‌نیز گئدین بیر آز داها دوشونون …
خافاخافدان اوغلان آتیلدی سؤزونون اورتاسینا: -آقا قورتارین بو دوستاقدان منی، ایسته‌میرم! اوخویون!- دئدی.
کیشینین سؤزو آغزیندا قورودو. اوتاق یئنه سسسیزلیکله قاپاندی.
قیز سسسیزجه‌سینه قارشیسینداکی دیوارا باخیردی؛ دیلینین آلتیندا بیر شئیلر میزیلداییردی، کیشی دونوب آرخاسینا باخدی؛ بیر گؤزل جیزگی چرچئوه‌ده پاریلداییردی: «گر جلوه عشق اولسا گتیررم نئجه گلمز»!…
کیشی اوغلانا دئدی:
– بیر آزجیق دیشاریدا گؤزله‌یین لوطفن!
اوغلان دئیینه-دئیینه آستا-آستا اوتاقدان چیخدی. کیشی دئدی:
– کئشکه بیر شانس داها اؤزونه، بیر ده حیات یولداشینا وئره‌سن قیزیم!
قیز اوزاقلارا باخیردی؛ سانکی بیر فیلم ائکراندا گؤزلری سومولکو کاسادا سانکی دونموشدو. کیشی ائشیتدی یا یوخ قیز دئدی:
– ایت ایتلیگیندن ال چکسه بئله، سومسونمکدن ال چکه بیلمز. بیریسی یوخدو دئسین منیم کوچه-بازار قادینلاریندان نه‌ییم اکسیکدی کی گونده بیر قادین یاتاغیما قوناق اولور؟! یاتاق اوتاغیمدا هر چئشید ساچ قیریلتیسی وار، ساری، قارا، قومرال. یازیق منیم پالیت رنگلی ساچلاریم.
آغلاماق سسی اوتاغی بوغدو! اوغلان قاپینی آچیب ایچری بویلاندی. کیشی اوجا سسله دئدی:
– قاپاتین قاپینی…
قیز چانتاسیندان بیر کاغیذ دسمالی چیخاردیب، گؤزلریندن، بورنوندان آخان سویو سیلدی؛ یئنه دارما-داغین دوشونجلری ایله اوزاقلارا دالدی.
***
اوخولون سونونجو زیلی سسلندی. قیزجیغاز تله‌سیک چانتاسینی اوموزلارینا آتیب، یولا دوشدو. سویوق یئل یاناقلارینا توخوندوقجا، سانکی یاناقلاریندا بیر جوت آلما جوجه‌ریردی! اوخولدان ائولرینه اون دقیقه‌دن چوخ یول یوخودو. آچار سالیب قاپینی آچدی؛ بیر ماهنینی اوخویا-اوخویا آستانادا دایانیب، آیاققابیلارینی چیخاردیب، باشماق رفینه قویدو؛ سونرا آنا-آنا چاغیراراق، باساماقلاری بیربه‌بیر کئچیب، اوتاغین قاپیسینی آچدی. گؤزلری خالاسینا ساتاشینجا سئوینج هیجقیریغی اوتاقدا اوینادی! چانتا ایله بیرلیکده خالاسینی باغرینا باسدی؛ سویوق یاناقلارینی خالاسینین یاناقلارینا سیخدی.
***
قاپی دینقیلدادی. اوغلان یئنیدن باشینی ایچری گتیریب دئدی:
– من تلسیرم
– بیر آز داها گؤزله، سسله‌یه‌جه‌یم.
قیز سسسیز آغلاییردی؛ یالنیز دامجی-دامجی یاش؛ سونرا گؤز یاشلارینین ایچینده گولومسه‌ییب دئدی:
– ائشیتمیسیز قارقادان سوروشدولار کیمین گلینیسن؟ دئدی خالامین. ایکی ایل قان اوتدوم، هر گئجه عمیم‌قیزینین عشقیندن دئدی، من یاتدیم سونوندا… آنام اوتوروب دوروردو خالامی، بیر ده اوغلونو قارقاییردی؛ امما منجه گؤزللیک زورلا اولماز! خالامین اوغلو سئودیگینه قوووشدو، منیم سئوگیم ده اوره‌ییمده قویلاندی. بئله بیر شئیلر فیلملرده، کیتابلاردا اولار دئیه‌ردیم، آمما من یاشادیم، یاشلاندیم. سئوگی منجه اؤلموشدو. یئنه قاییتمیشدیم ایلک سایاغیما؛ سئوگینی آلای ائدیردیم، آمما بیر گون سئوگی تورو اوره‌ییمی‌دوستاقلادی. حیات بویالی گونلره دؤنوشدو؛ نیفرت کؤچوب، یئرینه سئوگی یئرلشدی. هر دفعه پرنسس سسله‌دیکجه اؤزومو دونیانین مله‌یی سانیردیم!‌هارادان بیله‌یدیم نئچه پرنسس یاشاییر اوره‌گینده؟!
قاپی یئنیدن دینقیلدادی؛ قیز دؤنوب باخدی، آمما بو دفعه قاپی آچیلمادی، دئدی:
– قدیمکیلر یاخشی دئییب، تخت آلماق اولار، بخت آلماق اولماز! رحمتلیک بؤیوک آنام دا دئیه‌ردی: آستانا دییشیلر، بخت ائله ایلک بختدیر .
قاپی دینقیلدادی، اوغلان ایچری گلدی و اوتوراجاغین اوستونده اوتوردو. کیشی بیر شئیلر یازیردی بیر ده…
بیر پاییز آخشامی‌یئل بوتون گوجو ایله قیزین اوزونه شاللاق چکیردی. گوجو یئتمیردی سارالمیش یاناقلارینی قیزاردیب، آجیغینی پاییزدان آلسین!
یارپاقلار سارالیب، بیر قیز سینیب تؤکولن کیمی‌تؤکولور…

Check Also

قولاغیمی هاردا گیزله‌دیم؟/ رقیه کبیری

قولاغیمی‌هاردا گیزله‌دیم؟ رقیه کبیری «قیزیم گؤزله‌ بیردن ونگوک زاد یادیوا دوشمه‌سین‌هاااا». منسه قهوه‌ای پاستل رنگینی ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *