انتقام / سحر بارانی

sahar-baraniانتقام
سحر بارانی

اونونلا گؤروشه‌جه‌یینی بیلیردی. گؤرموشدو گیزلینجه موبایلینی چئک ائدنده. اما‌هاردا گؤروشه‌جکلرینی بیلمیردی. ارینین نارین گولوشلریندن ده هئچ نه آنلاماق اولموردو. شامی‌حاضیرلایا- حاضیرلایا بوتون اولاسی یئرلری بئیینیندن گئچیردیردی. الینین یاندیغینی حیس ائتدی بیر آن؛ او قدر نیفرتله فیکره دالمیشدی کی، قاینار سویون فلاکسدان داشیب گئتمه‌سینی بیلمه‌میشدی. هر نه‌یی حاضیرلاییب ماسانین اوستونه دوزدو و ایشیغی سؤندوردو. یاتاق اوتاغینا گئچیب، حالسیزجا یاتاغا سیزدی و یورقانی باشینا چکیب فیکره دالدی. نئجه انتقامیمی‌آلا بیلرم او دانا گؤز قادیندان- دئیه دوشونمه‌یه باشلادی. بیر- بیر گؤزلرینین قاباغیندان رئژه گئدیردی کافه‌لر، رستوران‌لار، کلمه‌لر، کلمه‌لر…
هئچ یئره چاتدیرا بیلمیردی. یاتاقدا ایلان وورموش کیمی‌قیورانیب دوروردو. -گئدیم او پیرپیز ساچلارینی الیمه دولاییب، لاپ ائله اوتوردوغو یئردن سوروتله‌یه – سوروتله‌یه قاپییا ساری چکیب، خیاواندان گئچن آداملارین قاباغین کسیب، هر بیر کیشینین خیانتینده، بیر قادینین ایزی وار دئیه باغیراسام!! باخین نئجه ده اؤزونو قیسیب سوچسوز گؤسترمه‌یه چالیشیر، دانیش گؤرک مترس خانیم! نه اولدو؟ دیلینی سیچان یئدی؟ دونن آخشام بولبول کیمی‌اؤتوردون.‌هارا گئتدی او عشوه ناز؟ اؤپوجوکلردن گئچن‌لره ده پایلا گؤره‌ک!
هامی‌ماغیل – ماغیل باخیب سوووشماغا چالیشیردی‌لار. نه اولدوغونو بیلمه‌ین آداملار بیراز دایانیب تئاترا باخار کیمی‌ایکی قادینبن چکیشمه‌سینه باخیب، سونرا اؤنملی بیر شئیی خاطیرلامیش کیمی‌سورعتله اوزاقلاشیردیلار. قادین‌لارین گؤزلرینده تانیش بیر ایفاده گؤرونوردو، کیمیسی اؤزونو او مترس یئرینه قویور، کیمی‌دلی‌لر کیمی‌گؤزو قیزارمیش قادینین یئرینه قویوردو اؤزونو. کیشی‌‍‌لرین گؤزونده ایسه گیزلین بیر قورخو دالغالانیردی. کیشی باشینی اللری آراسیندا توتوب، حایات یولداشینا باخماییردی بئله، قورخو ایلا نیفرت آراسی بیر ایفاده واریدی گؤزلرینده؛ سئوگی ایله نفرت آراسی بیر بوغونتو واریدی سسینده قادینین. یئریندن دوروب قالابالیغا یاخینلاشماق ایسته‌سه ده، یئریندن دورماغا گوجو یوخ ‌ایدی؛دورسا یئر آچیلیب ایچینه دوشه‌جکدی سانکی. آرابیر قولاغینا گولوشمک سسلری دَییردی. یامان-سؤیوش، و آرا سیرا دا قادینی حئیفسیله‌ین آنلاشیلماز پیچیلتی‌لار ائشیدیلیردی جماعاتین آراسیندان.
اوغلانا باخ هله، نئجه ده باشین قولتوغونا سوخوب سووسار
چیخ یوواندان گؤرک!
الینی چک اوزون گؤرونسون آی‌پارا…!
هره بیر آتماجا آتیب گولوردو؛ هره بیر یاریمچیلیق جومله دئییب، قادینین حالینا باخیب اودوردو سسینی.
الینی میزه چیرپیب آیاغا قالخدی…
بسدی قورتارین ایکی جاناوار کیمی‌بیر بیرینیزین جانینا دوشوبسوز، اوتانین. مسخره‌یه دؤندوک. آللاه ایکینیزی ده محو ائله‌سین…
میللت دوروب تاماشایا حایا دا یاخجی شئی‌دی.
قادینین قوتو قورودو بیردن؛ جانینا قورخو اوتوردو. ائوه گئتسک اؤلدوره‌جک منی. اوستورماغی بس دئییل، یئل قاباغیندا دا دورور. بیلیرم دلی‌دی. گؤزو بیر قارالدی دای هئچ کیمی‌تانیماز. سانکی نه‌یی وار بو دانا گؤز عیفریته‌نین. دای یادینا دوشمز گئجه دونیادان دا خبرسیز قوجاغیمدا باشینی دؤشومون اوستونه قویوب یوخویا گئتمیشدی، یئدی پادشاهی یوخودا گؤروردو. اؤلدورر منی گؤره‌سن؟ اؤلدوره‌جک بیلیرم.
هؤوله‌سک ساغا سولا باخدی. ماسالارینین بیرینین اوستونده بیر مئیوه پیچاغی گؤزونه ساتاشدی. اؤزونو تولاییب پیچاغی گؤتوردو. اوووجوندا مؤحکم سیخاراق دالی‌یا باخمادان نه گوجو وار پیچاغی سینه‌سینه سوخدو. قیپ قیرمیزی قانین ایلیق ایستیسی بارماقلارینا یاییلدی. قاتل اولدوم، اؤلدوردوم، اؤلدوردوم…
پیچاغی توللاییب، وار گوجوایله قاچماغا باشلادی.
یورقانی مؤحکم اوووجوندا سیخیردی. نفسینین چیخماسینی حیس ائتمیردی. بدنی بوم بوزایدی؛ تَرین سرین دنه‌لری آلنیندان آخیب یاستیغا دامیردی.
مریم، مریم…‌هارداسان…
ایکی ساعاتدی سسله‌ییرم سنی، ائشیتمیرسن؟
حایات یولداشی‌ ایدی؛ یورقانی اوزوندن چکیب، اؤزونو اونون قوجاغینا آتدی…
یاشاییرسان، نفس چکیرسن، باخ قان دا گلمیر سینه‌ندن… آللاها شوکور یاشاییرسان نفسیم.
اری، اونون کابوس گؤروب قورخدوغونو ظن ائتدی؛ آشپازخانایا گئدیب الینده بیر لیوان سو قاییتدی؛ بیراز اوزونه سپدی؛ قالانینی دا زورلا ایچیرتمه‌یه چالیشدی…
یاخاسیندان غریبه بیر قادین اودکلونونون اییسی گلیردی.

Check Also

قولاغیمی هاردا گیزله‌دیم؟/ رقیه کبیری

قولاغیمی‌هاردا گیزله‌دیم؟ رقیه کبیری «قیزیم گؤزله‌ بیردن ونگوک زاد یادیوا دوشمه‌سین‌هاااا». منسه قهوه‌ای پاستل رنگینی ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *