پیچیلتی / سحر خیاو

sahar xiyav
پیچیلتی
سحر خیاو

پیچیلتی ایلهام اولام کاش گلم کؤنول باغیوا
و ناگهان اوتورام خولیالار بوداقلاریوا
شیرین بی شعره دؤنم بال کیمین سوزم، سوزولم
قوناق گلم بی گئجه بال سوزن دوداقلاریوا
گولومسه‌ییب دوداغین لحظه- لحظه شعر اولاسان
شیدیرغیلی یاغاسان گؤزله‌ین واراقلاریوا
نه خلوت ائیله‌یه‌ریک سن‌له من، قلم، دفتر
و قیزمالی باخیشین خوش گلر قوناقلاریوا
یارالی قوش سایاغی چیرپینار سئون اوره‌یین
او قدری شان- شان اولار، اوخشایار داراقلاریوا
یازار، پوزار منی هئی اینجه بارماغین، قلمین
چتیندی کلمه دولاشسین چتین سیناقلاریوا
بینسه‌نیز منی هر واخت اولوم گؤزل کپنک
قونوم بی لحظه اوچون قوی گؤزل یاناقلاریوا
خوشام کی شاعیر همیشه سئور تزه شعرین
ایجازه وئر سپیلیم گول کیمین ایاقلاریوا

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *