ایکی شعر / یوسف جوادی میانالی

javadi
ایکی شعر
یوسف جوادی میانالی

(۱)
بیلمه‌ییرم نه‌دن گولمه‌ییر باهار،
شاختانین قورخوسو جانیندا هله!
نه قده‌ر قونچالار آچمایاجاقدیر؟
بویاندان سون باهار ایسته‌ییر گله.

اوره‌یی داریخیر چیچکدن ساری
وحشی یئللر اسیر سسسیز باهاری
هاچان ارییه‌جک داغلارین قاری
گونئی بوزلارینین باغرینی دله؟!

قارا کول تیکانی بوغور یئل سسین
اؤزگورلوک نغمه‌سین نئجه سؤیله‌سین
اسین یئللر اسین، آی یئللر اسین
قوی باهار اویانسین بزنسین گوله!

بولود بوقچاسیندا گونش وئره‌جک
گؤزله‌ییر، گؤزله‌ییر، گؤزله‌ییر چیچک
باهار مئوسمینده آچیلسین گره‌ک
قوورولموش قونچاسین وئرمه‌سین یئله.

(۲)
قرنفیل گوللری چیخاجاق دیزه
کهلیک‌لر یاتیبلار قار دوشوب ایزه
داغلارین دؤشونده یام یاشیل گؤزه
سیلسم اؤلدوررلر، سیلمه‌سم اؤللم.

هر گئدن بیر اولدوز گئجه‌دن یولور
یئنه‌ده گئجه‌لر اولدوزدان دولور
قار چیچه‌یی یازی گؤرمه‌دن سولور
قالسام اؤلدوررلر قالماسام اؤللم.

یاز گلیر چیچکلر بورویور داغی
تیکاندان یارالی یئل باغیرماغی
قونچایا بنزیرم شاختالار چاغی
گولسم اؤلدوررلر گولمه‌سم اؤللم.

دورنایام حسرتده گؤلومدن ساری
دومانلی‌هاوادا سینیرسیزلاری
اوچئیدیم یوردوما قونئیدیم باری
گلسم اؤلدوررلر گلمه‌سم اؤللم.

آناما دئمیشم منه تار آلسین
آلام سینه‌م اوسته تار منی چالسین
دردیمی‌دئشمه‌یین اؤرتولو قالسین
بیلسم اؤلدوررلر بیلمه‌سم اؤللم.

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *