بیر داملایام / مدینه گولگون

madine gulgun
بیر داملایام
مدینه گولگون

منیم آزادلیغیم دومانسیز سما،
تزه دنه دولموش تر سونبوللردیر.
منیم سعادتیم بو ائل، بو اوبا
بیرده شفق ایچن کؤرپه گوللردیر.

منیم آرزولاریم مین- مین گنجلیگین
حیات یوللاریندا آددیم سسی‌دیر.
منیم اومیدلریم نئچه کؤرپه‌نین
بئشیک- بئشیک قالخان قهقهه‌سی‌دیر.

منیم هنریم‌ده، منیم گوجوم‌ده
بیرلیکدیر، بیرلیگین اؤز سسی‌یم من.
بو بیرلیک عشقی‌له هئی زامان- زامان
بخته‌ور- بخته‌ور اؤته‌سی‌یم من.

منیم نغمه‌لریم آنا لایلاسی،
آنا نفسیندن آلمیشدیر قیدا.
شعریم مژده وئره‌ن قارانقوشلار تک
یئنه قانادلانیب اوچور‌هاوادا.

منیم دیانتیم تومروس ننه‌مین
دوشمنه باج وئرمز ووقارینداندیر.
منیم محبتیم ائلین، ائلاتین
پوزولماز آندیندان، ایلقارینداندیر.

بیر ذره وارلیغام ، بیر داملایام من
بو درین دنیزده جوشغون سولاردا.
سنه مینتدارام وطن، آی وطن
یاشاسام‌دا‌هاردا، اولسام‌دا‌هاردا.
۱۹۷۱

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *