دئدی:«بو گون بتر اینتحار حال- هاواسیندایام»
ایسته‌دیم ندنینی سوروشوم امما اؤز- اؤزومه دئدیم:« شافتالی تاباغی اولوب گیرمه اورتالیغا». عاغیللی باشلی اینسان‌دی. سن نئچه‌دن بیرسن کی اونون حال- هاواسین پوزاسان! بونونلا بئله اوره‌ییم دؤزمه‌دی. نه ده اولسا، منی اؤزونه همزاد سانیر. آغزیمی آچدیم ندنینی سوروشوم، دی گل کی سوروشا بیلیم! سویوق دَیمه‌دن دولایی، قورو اؤسگورک امان وئرمه‌دی. دالبادال اؤسگوردوم. کؤکسوم آجیشماغا باشلادی. خورتدانلارا گؤره سؤز- سورغو قیزیل کیمی‌دی. سوالی یئرینده سوروشماسان، بیر گوموش قیرانلیق بئله فایداسی یوخدور. اونا گؤره آغزیمی یوموب، نم نمنه کیمی اوزونه باخدیم، سوروشمادیم. اما اؤز یانیمدا، اوزون- اوزون دوشوندوم. دوشونجه‌م اونونلا تانیشدیغیمیز گونلریمه اوزاندی. اصلینده اونونلا تانیشماق ساده بیر تانیشلیق دئییلدی. اؤزوم کیمی‌ایدی. اکیز تاییم کیمی، همزاد کیمی بیر وارلیق‌ایدی. نه زامان، هاردا اونونلا تانیش اولدوغومو بئله اونودموشام. ایندی یالنیز وارلیغینی دویوب، حیس ائدیردیم. بیر آن اونون یوخلوغونو دوشوندوم. سیزی بیلیمرم. من خورتدانلار جرگه‌سینه قاریشاندان، سئویب، سئومه‌مه‌یی اؤلوم آدلی بیر اولای‌لا اؤلچه‌رم. قوللاریمی دیرسکله‌یب، اونونلا اوز- اوزه، گؤز- گؤزه ایله‌شیب، اؤلومونو دوشوندوم. یوخلوغوندا کیم‌لر آغلایاجاق، کیم‌لر گوله‌جک، کیم‌لر اوزوله‌جک، کیم‌لر اونو اؤزله‌یه‌جک… آغلاماغیم توتدو. آمما بو قورو- قره اؤسگورک کؤکسومدن، دؤشومدن ال چکمه‌دی، گئنه دالبادال اؤسگوردوم، ائله کی آزجا قالدی نفسیم کسیلسین. بیر آن هاوانین شاختا- سازاغی یادیما دوشدو. اؤز- اؤزومه دئدیم بیزیم بو همزاد دا واخت تاپیب اینتحار ائتمه‌یه. آخی یای- یازین او گؤزل هاواسین قویوب، قیشین شاختاسیندا اؤلومون ضرردن باشقا کیمه خئیری وار. اؤز آرامیزدا دانیشیریق؛ بو گونلر کارمند طبقه‌سی، داها «قوی اؤلوم، یاخام قورتولسون» سؤزونو ده، دئیه بیلیمر. وور چاتلاسین، سونوندا اؤلونون یاخین آداملاری عُمر بیمه‌سینین پولونو آلاجاقلار. بو باهالیق گونلرینده، بیمه پولو، مزارین یئر قیمتینی بئله دولدورماز. اؤز یانیمدا اونون قد- قواره‌سینه باخییب، مزار یئرینین قیمتینی تخمین ووردوم. من دئمیرم اؤزونوز حساب کیتاب اهلی سیز. ۱۶۶ سانت بویو،- هله اؤلونون باش- آیاغیندان ایکی سانت آرتیردیم، لاپ بئله فبیره قابلانسین- ۵۰ سانت ائنی اولان مزارین مئتری ایکی میلیوندان باهایا باشا گلیر. یعنی، وادی رحمت مزارلاری، رشدیه، ولی‌عصر خیابانینین ائولرینین بیر مئتیریندن باهایا دوشور. هله قویاق کی کفن موفته اولسون. قبیر داشی، یئددی گون شام- ناهارا قوناقلانانلار، چایی، قندی، خورماسی، اؤلو تره‌یی…
خرج- مخاریج بیر یانا قالسین، بیر خیرخواه آللاه بنده‌سی تاپیلیب، قوللارین چیرمالاییب، خرج- مخاریجی یئر بَه یئر ائده‌ر؛ هامیسیندان چتینی هاوانین شاختا- بورانی‌دی. کیم بو شاختادا دوروب وادی رحمت-ه گئدیب، بیر ساعات قبیر باشیندا دوروب، بیر فاتحه اوخویوب، اوچ خورما یئیه‌جک، دئیه، دوشوندوم. دوغروسو بو دوشونجه‌لر کؤورک اوره‌ییمی داهادا آرتیق کؤورلتدی. اوزونتولو- اوزونتولو اونا باخیب دئدیم:«سن ائله دوغوردان اؤلومو شوخلوق توتورسان! بو شاختا- بوران‌دا قبیر اوسته گلنلری ده بیر دوشون! اینسان هر فصیلده انتحار هاواسی‌ایلا هاوالانماز کی!!! اؤلمه‌یین ده بیر فصلی وار آخی…»
۹۲.۱۰.۱۸
یک پاسخ
سئویب سئومه یی اؤلوم آدلی بیر اولای لا اؤلچه رم! عیزی اوستاد، قورخمالی یازیلار یازیرسیز. اونا گؤره ده ائله هئچ کیمی سئومه سز یاخشی دیر! آیین شایین اولاراق قورخودان سوموکلریم گیزیلله دی!