چئویرن: مرتضی مجدفر
ترجمه: مرتضی مجدفر
مرتضی مجدفر

آیریلیق، بیرلیک یاراتدی
مرتضی مجدفر

۵۵ ایل بوُندان قاباق، ۱۳۳۵- نجی ایلین مهر آیی‌نین اوْن‌بئشینده، ، گئجه ‌واختی اردبیلین کوْرابازلی کندیندن کؤچوب، تهراندا یاشایان۲۲ یاشلی بیر گنج شاعر ، اؤزو ایله زمزمه ائتمگه باشلادی. اوْ هئچ بیلمیردی سؤیله‌دیگی شعر، ایللر بوْیو یاشایاجاق و آذربایجان خلقی‌نین آیریلیق و حسرت دردلرینی ترنم ائده‌جکدیر. اوْ گنج شاعرین گئجه واختی قوْشدوغو آیریلیق ماهنی‌سی، یاشادی، یاییلدی و هامی آذربایجانلیلارین دیللرینه دوشدو. اوْنون ماهنی‌سینا، قدرتلی بسته‌کار مرحوم اوُستاد علی سلیمی، موسیقی‌ یازدی و بیر چوْخ آذربایجانلی هنر صاحیبی و قدرتلی سسه مالیک‌ اوْلان خواننده، بوُ ماهنینی اوْخودولار. آیریلیق، آمان و یامان اوْلدوسادا، هامی آذربایجانلیلار اوْنو سئودیلر و دؤنه – دؤنه اوْنلا بیرلشدیلر.

۱۳۹۰ – نجی ایلین مهر آین‌نین اوْن آلتی‌سیندا، تهرانداکی فردوسی سینما‌سیندا، ایکی‌مین آذربایجانلی، آیریلیق ماهنی‌سی و دیگر گؤزل و اورگه یاتیم ماهنی‌لارین شاعری رجب ابراهیمی(فرهاد) دان تجلیل ائتدیلر. بوُ ییغینجاق، فرهادین ۷۷- نجی دؤغوم گونو و آیریلیق ترانه‌سی‌نین ۵۵- نجی یارانما گونو ایله برابر قوُرولموشدور. بوْ مراسیمده، تهران و بوتون آذربایجان شهرلریندن گلن شاعر، یازیچی، هنرمند و هوسکار اشتراک ائتمیشدیر. ییغینجاقدا، حسن مجید‌زاده(ساوالان)، جعفرپور، یاشار، نیراوغلو و بیرنئچه شاعر شعر اوْخودولار. هم‌ده دکترحسین محمدزاده‌صدیق، دکتر سلام‌ا…‌زاده، مهندس یکانلی، خانم شایق و بیر نئچه باشقا قوْناق، دانیشیق آپاردیلار.  بوُنلاردان علاوه، مراسیمه قاتیلان بیر چوْخ خواننده و عاشیق، فرهادین ترانه‌لرین اوْخویاراق، جلسه‌نی شنلدیردیلر. بوُ مراسیم، گئجه ساعات دوْققوزدان باشلایاراق، سحر بیریاریمدا، مجلسین اوللیندن سِن‌ده اوْتوران شاعر، فرهاد ابراهیمی‌نین دانشیقلاری ایله سوْنا چاتدی.

بوُ مراسیمی، تهرانداکی  “کانون هنرمندان موسیقی آذربایجان” اوْجاغی، بیر چوخ دیگر آذربایجانلی‌نین همتی ایله ترتیب وئرمیشدیرلر. بوُ ییغینجاق، مرتضی مجدفرین توسطی ایله‌‌‌ آپاریلدی.

آیریلیق، ایللر بوْیو آیریلیق و حسرت دوُیغولارینی ترنم ائتسه‌ده، فرهاد ابراهیمی‌نین ۷۷- ایللیگی گئجه‌سینده، بیرلیک یاراتدی و آذربایجانین دؤرد بیر یانیندان بوُ سالونا ییغیشان آذربایجانلیلار بیرلیکده آذربایجان آدینی ترنم اتئدیلر. مراسیمین قیراغیندا، شاعرین ” آیریلیق” آدلی کتابی‌دا آچیقلاندی. بوُ کیتابی، تهرانداکی پینار نشریاتی چاپ ائدیبدیر. بوُرادا، کیتابین جیلدی‌نین شکیلینی سیزه گؤسته‌ر‌ه‌‌رک، آیریلیق شعرینی ده کامیل صورتده گتیریریک؛ ایندییه قَدَر ماهنیلاردا ، عمومیتله بوُ شعرین ایکی یا اوچ بندینی دینله‌میشیک.

آیریلیق

فیکریندن گئجه‌لر یاتا بیلمیرم
بوُ فیکری باشیمدان آتا بیلمیرم
نئیله‌ییم کی سنه چاتا بیلمیرم
آیریلیق، آیریلیق، آمان آیریلیق
هر بیر درددن اوْلور یامان آیریلیق

اوُزوندور هیجرینده، قارا گئجه‌لر
بیلمیرم، من گئدیم، هارا گئجه‌لر
ووُروبدور قلبیمه یارا گئجه‌لر
آیریلیق، آیریلیق، آمان آیریلیق
هر بیر درددن اوْلور یامان آیریلیق

یادیما دوشنده آلا گؤزلرین
گؤیده اوُلدوزلاردان آللام خبرین
نئیله‌ییم، کسیبدیر مندن نظرین
آیریلیق، آیریلیق، آمان آیریلیق
هر بیر درددن اوْلور یامان آیریلیق

آیرلیق دردینی چکمه‌ین بیلمز
یاردان آیری دوشن گؤز یاشین سیلمز
دئییرلر انتظار خسته‌سی اؤلمز
آیریلیق، آیریلیق، آمان آیریلیق
هر بیر درددن اوْلور یامان آیریلیق

نئجه‌کی ائلیمده، آیری دوشندن
سوْرار بیر – بیرینی، گؤروب بیلندن
حسرتله سیزلایار دائم بوُ غمدن
آیریلیق، آیریلیق، آمان آیریلیق
هر بیر درددن اوْلور یامان آیریلیق

ایللردی اوُزاغام آرخام – ائلیمدن
بولبولم، دوشموشم، آیری گولومدن
جوُر ایله آییریب شیرین دیلیمدن
آیریلیق، آیریلیق، آمان آیریلیق
هر بیر درددن اوْلور یامان آیریلیق

اوْلوبدور «بیگانه»، یاریم – یولداشیم
«غریبه» ساییلیر سئوگیم- سیرداشیم
بوُ جاوان چاغیمدا آغاردیب باشیم
آیریلیق، آیریلیق، آمان آیریلیق
هر بیر درددن اوْلور یامان آیریلیق

منی آغلاداندان گولوش ایسته‌رم
آیری دوشه‌نیمله گؤروش ایسته‌رم
حاصاری ییخماغا یوروش ایسته‌رم
آیریلیق، آیریلیق، آمان آیریلیق
هر بیر درددن اوْلور یامان آیریلیق

سئوگی‌لیک اوْلوبدور شأنی «فرهاد»ین!
سئوگی‌سی هاردادیر، هانی «فرهاد»ین؟
دئیه‌رک، چیخاجاق جانی «فرهاد»ین!
آیریلیق، آیریلیق، آمان آیریلیق
هر بیر درددن اوْلور یامان آیریلیق

تهران ۱۵/۷/۱۳۳۵

چاپ

4 پاسخ

  1. ساغ اولون

    آنا ای باشی بلالی او جا بویلی ساولان الیمه قول قاناد اول باشی بلالی ساوالان و الخ …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آیریلیق، بیرلیک یاراتدی

مرتضی مجدفر
www.ishiq.net

آذربایجان ادبیات و اینجه‌صنعت سایتی

آیریلیق، بیرلیک یاراتدی

مرتضی مجدفر
www.ishiq.net

آذربایجان ادبیات و اینجه‌صنعت سایتی

آیریلیق، بیرلیک یاراتدی

مرتضی مجدفر
www.ishiq.net

آذربایجان ادبیات و اینجه‌صنعت سایتی