بو ائسسه سنین اوخودوغون آندا یازیلمیر. او، بیر آز اول، بیر آز سونرا، بلکه ده هئچ واخت یازیلماییب. چونکی بعضی متن‌لر کاغیذدا یوخ، اوخوجونون ایچینده تاماملانیر. بیر قاپی وار. اوزه‌رینده آد یوخدور. آچاندا سس چیخارمیر. هامی یانیندان کئچیر، چونکی «قاپی» کیمی گؤرونمور. یازار اولماق ایسته‌ین‌لر ایسه دایانیر. دایانماق – ایلک شرط‌دیر. دونیا قاچیر، سن دایانیرسان. دونیا دانیشیر، سن قولاق آسیرسان. ایندی یازی ساکیت دئییل. او، سنین راحاتلیغینی پوزور. تئلئفونو کنارا قویدورور، گئجه‌نی قیسالدیر، گوندوزو اوزا‌دیر. یازی سنی تعریفله‌میر سنی آچیر. ایچیندن قورخدوغون جومله‌لری چیخاریر، «بونو دا یاز» دئییر. سن اعتراض ائدیرسن. او ایسه گولومسه‌ییر. ان قریبه‌سی بودور: یاخشی یازی اوخوجویا ایضاح ائتمیر. او، ایشاره ائدیر. بارماقلا گؤسترمیر، پنجره آچیر. اوخوجو ایچری باخیرسا – متن یاشاییر. باخمیرسا – یازی یئنه حاقلی‌دیر. بو قاپینی آچماق اوچون آچار یوخدور. تیتره‌ک ال‌لر، یاریمچیق جومله‌لر، پوزولموش پلان‌لار کیفایتدیر. قوصورسوزلوق بورایا گیرمیر. او، چؤلده قالیر و عصبله‌شیر. یازار اولماق بو قاپینی هر گون آچماغا جهد ائتمکدیر. بعضا آچیلمیر. بعضا سن آچیلیرسان. و بیر گون آنلاییرسان: قاپی سؤزلر دئییلمیش.. قاپی سنمیشسن. ۱۲.۱۲.۲۰۲۵