آذربایجان ملی علملر آکادئمیاسی، نظامی گنجوی آدینا ادبیات اینستیتوتونون علمی شوراسی‌نین ۱۵ یانوار ۲۰۲۴-جو ایل تاریخلی ۱ سایلی اجلاسی‌نین قراری اساسیندا «۱۹-۲۰نجی عصر گونئی آذربایجان ائل شاعرلری» آنتولوگیاسی ۴۹۶ صحیفه‌ده نشر ائدیلدی.
کیتاب فیلولوگیا اوزره فلسفه دوکتورو، دوسئنت «قنداب حاقوئردی علی‌یئوا» طرفیندن ترتیب ائدیلیب، نشره حاضیرلانیب و «ائل شاعری مفهومو» عنوانلی ۱۶ صحیفه‌لیک بیر مقدمه و ۱۰۰ نفردن آرتیق ائل شاعرلرینین حیات و یارادیجیلیقلاریندان نمونه‌لرله برابر ایشیق اوزو گؤروبدور.
کیتابین تانیتدیرماسیندا یازیلیبدیر:
«کیتابدا ۱۹-۲۰نجی عصر گونئی آذربایجان ائل شاعرلری‌نین شعر نمونه‌لری، اونلارین حیات و یارادیجیلیقلارینا دایر معلوماتلا بیرلیکده سیستئملی شکیلده ایلک دفعه اولاراق گئنیش اوخوجو کوتله‌سینه تقدیم اولونور. مقصد گونئی آذربایجان ادبی و فولکلور محیطینده خصوصی اهمیت کسب ائدن ائل شاعرلرینی تانیتماق و اونلارین ائل صنعتی‌نین، خالقین فولکلورونون، ادبیاتی‌نین و مدنیتی‌نین انکشافیندا مستثنی رولونو اوحوجولارا چاتدیرماق، بوتؤو آذربایجان زنگین خالق ادبیاتی‌نین عمومی منظره‌سینی جانلاندیرماقدیر.»
کیتابی «ایشیق» سایتی‌نین «کیتابخانا» بؤلوموندن ائندیرمک مومکوندور.