‌‌گؤز‌لری‌نین نورونو، قلبی‌نین اودونو سؤزلره، میصراع‌‌‌لارا تؤکن، عؤمور-گونونو دوغما ائل-اوبا اوغروندا ادبی فعالیته ‌حصر ‌‌‌ائده‌ن گونئی آذربایجان ادبیاتی‌نین فداکار ضیالی‌‌‌لاریندان بیری ده «صدیار وظیفه ائل‌اوغلو»دور. ادبی فعالیت دایره‌سی گئنیش اولسا دا، داها چوخ شاعر کیملیگی‌له تانینان صدیار وظیفه اؤز میسیاسینی یازار ایمضاسی ایله، سانکی داها دا برکیشدیرمک ایسته‌میش و اؤزونه «ائل‌اوغلو» تخلوصونو سئچه‌رک یولونو، مرامینی تا باشدان آچیق-آیدین بیان ائتمیش‌‌دیر. گونئی آذربایجان میللی دئموکراتیک ادبیاتی‌نین اوچونجو نسیل نوماینده‌لریندن اولان صدیار وظیفه ائل اوغلونون یئتیشدیگی موحیطی نظره آلساق، اونون سئچیمی‌نین نه قده‌ر طبیعی و لابود اولدوغونو آنلاماق چتین دئییل. بو او موحیط‌‌دیر کی، دامار‌‌‌لاریندا تورک قانی آخان هر بیر گنجین سئچیمی اوچون یالنیز بیرجه «قئیرت» کلمه‌سی یئتردی. او گنجلر کی، اون‌‌‌لار عؤمور‌‌لریله تاریخ یازان جسور، دؤنمز، وطن، میللت فدایی‌‌‌لری آراسیندا بؤیویور، اون‌‌‌لارین چتین، شرفلی حیات یول‌‌‌لارینا تانیقلیق ائدیر و اون‌‌‌لاردان اؤیره‌نیردیلر.
صدیار وظیفه اسماعیل اوغلو ۱۹۵۹-جی ایل آپرئلین ۲-ده قاراداغ ماحالی‌نین ‌‌‌خداآفرین ناحیه‌سینده یئرلشن «کاتدالی قولوبیلی» قیشلاغیندا بیر کؤچری عاییله‌ده آنادان اولوب. ۱۲ یاشینادک دوغما ائلینده بؤیویوب، ابتدایی تحصیلینی «جعفرقولو اوشاغی» قیشلاغیندا باشا چاتدیریب، اورتا تحصیلینی اهر و تبریز شهر‌‌لرینده بیتیریب‌‌دیر. ائل‌اوغلو ۱۹۷۸-جی ایلدن باشلایاراق دؤرد ایل تبریز شهری‌نین اطرافیندا اولان «مایان» کندینده معلملیک ائتمیش، سونرا تهرانا کؤچوب بیر شیرکتده ایشله‌میش‌‌دیر. او، گنجلیک ایل‌‌لریندن باشلایاراق آذربایجان ادبیاتی‌نین مطالعه‌سیله مشغول اولموش، همین ایللرده ایلک قلم تجروبه‌لری کیمی آنا دیلیمیزده شعرلر یازماغا باشلامیش‌‌دیر. ائل‌اوغلونون شعری ایلک دفعه ۱۹۸۰-جی ایلین آوقوست آییندا تبریزده نشر ائدیلن «دده قورقود» درگیسینده چاپ اولونوب. یارادیجیلیغا شعرله باشلایان ائل‌اوغلونون ایندییه‌دک ایکی جیلد شعر کیتابی چاپ ائدیلیب. ایلک آددیم‌‌‌لاریندان ادبیات عالمینده و خالق آراسیندا رغبتله قارشیلانان شاعرین اثر‌‌لری ایران و او تایلی – بو تایلی آذربایجان مطبوعاتیندا متمادی درج اولونوبدور. هله ۱۹۸۱-جی ایلده مرحوم آکادئمیک میرزه ایبراهیموو او زامان‌‌‌لار شاعرلر و یازیچی‌‌‌لار اتفاقی‌نین اورقانی اولان «آذربایجان» درگیسینده «جنوب سووقاتی» باشلیقلی مقاله‌سینده ائل‌اوغلونون ایلک دؤنه چاپ اولونان شعر‌‌لرینی ‌‌دیره‌نیش ادبیاتی کیمی ده‌یرلندیریب‌‌دیر.
«صدیار وظیفه ائل‌اوغلو»نون «قوشما‌‌‌لار» آدلی ایلک شعرلر مجموعه‌سی ۲۰۰۲-جی ایلده تهراندا «نخستین» نشریاتیندا اسکی الیفبادا چاپدان چیخیب‌‌دیر. کیتابین اؤن سؤز مؤللیفی تانینمیش ادبیاتشوناس عالیم دوکتور محمدرضا کریمی‌دیر. ۱۲۰ صحیفه‌دن عبارت اولان بو کیتابدا ائل‌اوغلونون قوشما‌‌‌لاری، گرایلی‌‌‌‌لاری و بیر‌سیرا سربست شعر‌‌لری یئر آلیر. بو شعرلردن بعضی‌‌لرینه عاشیق‌‌‌‌لار و خواننده‌لر طرفیندن موسیقی بستله‌نیب شنلیک‌لرده اوخونور.
ائل‌اوغلو ایلک شعرلر کیتابینی هله گنجلیک چاغیندان شخصیتینه و پوئتیک مفکوره‌سینه حئیران اولدوغو معنوی دوستو «حسین عارف»‌ین عزیز خاطیره‌سینه ‌حصر ائدیب. کیتاب نشر ائدیلن واخت مرحوم شاعرین اؤلومونون اونونجو ایلی ایدی. کیتابین آرخا قابیغیندا درج اولونان، درین حوزون و حسرتینی ایفاده ‌‌‌ائده‌ن «نه اولوب؟» گرایلیسی:

رنگی قاچیب آغ چیچگین،
گؤرن او باغدا نه اولوب؟
بنؤوشه یولور لچگین،
گؤرن او داغدا نه اولوب؟

کولک مئشه‌یه نه دئییر؟
بیر پالید اؤزونو دؤیور،
مارال‌‌‌‌لار یامان تؤوشویور،
گؤرن اوزاقدا نه اولوب؟- حاقیندا شاعر «بو شعرین سون بندینی هئچ واخت یازا بیلمه‌دیم. ایکینجی کیتابیمداکی «یاریمچیق شعر‌‌لریم» پوئماسی‌نین یازیلما سببی ائله بو یاریم قالان شعریم‌‌دیر،» – دئییر. دقت ائتدیکده بو ایکی بندلیک گرایلی‌داکی ریتوریک سوال‌‌‌لارین جاوابی ائله اؤز ظریف و جاذب مئتافور‌‌‌لاریندا اولدوغونو گؤروروک. «یاریمچیق شعر‌‌لریم» ایسه ائشیتدیگی آجی خبردن (حسین عارفین اؤلوم خبری) سارسیلان شاعرین آجی حقیقتی قبوللانما مرحله‌سی‌نین محصولودور، درین دویغو‌‌‌لاریندا بوغولان لیریک من‌ین حسرت یوکونو، هیجران کدرینی بلکه‌لری‌یله زامانلا بؤلوشه‌رک یونگوللشمک چاباسی‌‌‌دیر:

بلکه ده…
… بلکه ده سون سطیر‌‌لرین
کلمه‌لری، هئجا‌‌‌لاری
آچیلمایان قونچا‌‌‌لارین
اووجوندا گیزله‌نیب‌‌دیر؟

و ‌سیرری آچیلمایان قونچا‌‌‌لارین اووجوندا گیزلنن شعرین سون سطیر‌‌لری «نه اولوب؟» گرایلیسی ایله مئتافوریک باغ‌‌‌لارلا بیرلشیر:

آی قونچا‌‌‌لار!
آچین بیر-بیر اووجونوزو
دیله گلسین
آل گئییملی شعر قیزی.
بیر اوخونسون چیچک‌‌لرین
طالع‌‌لری اووجونوزدان
بیلینسین کی، هانسی لاله،
هانسی نرگیز،
هانسی سحر آچیلاجاق؟
هانسی آخشام سولاجاق‌‌دیر؟
هانسی سحر آچیلاجاق؟

«صدیار وظیفه ائل‌اوغلو»نون «اؤلولر ساققیز چئینه‌ییر» آدلی ایکینجی شعرلر کیتابی ده‌یرلی ادبیاتشوناس عالیم دوکتور عباد ممی‌زاده(اغداشلی) اؤن سؤزو ایله ۲۰۰۹-جو ایلده کرج شهرینده، «پینار» نشریاتیندا اسکی الیفبادا چاپ اولونوب گئنیش یاییلمیش‌‌دیر. ائل‌اوغلونو «میللی دویغو‌‌‌لار شاعری» آدلاندیران عباد ممی‌زاده اؤن سؤزونده: «‌‌گؤزه‌ل بیر بدیعی اثر اؤز خلقیلیگی و اوریژیناللیغی ایله سئچیلیر. خلقیلیک خالق کوتله‌سینه باغلیلیق و ائله‌جه ده صنعتکارین منسوب اولدوغو خالقین میللی مفکوره‌سیندن قیدالانماسی دئمک‌‌دیر. هر بیر صنعتکارین یارادیجیلیق باجاریغینی محض همین معیارلا اؤلچمک او‌‌‌لار. تصادوفی دئییل‌‌دیر کی، قارا قووه‌لر عصیرلر بویو صنعتکار‌‌‌لاری اؤز حقیقی استقامتیندن یاییندیرماق اوچون همیشه اون‌‌‌لاری خالق کوتله‌سیندن و میللی دویغو‌‌‌لاردان اوزاقلاشدیرماغا چالیشمیش‌‌‌لار. اوللر آوروپادا، سونرا‌‌‌لار ایسه وطنیمیزده اوزدن ایراق ضیالی‌‌‌لارین ساققیز کیمی چئینه‌دیگی «صنعت، صنعت اوچوندور» شعاری دا همین ایدئیا‌‌‌لارا قوللوق ائدیردی. …لاکین اصیل صنعتکار‌‌‌لار هئچ ده بو ساختاکارلیق‌‌‌لارا اویماییب، رئالیزم یارادیجیلیق مئتودونا و اونون ائستئتیک معیار‌‌‌لارینا صادیق قالیب‌‌‌لار»، – یازیر، «اؤلولر ساققیز چئینه‌ییر» کیتابینی یوکسک قیمتلندیریر و داها سونرا « …آذربایجان شعرینه گلدیکده ایسه دئمه‌لی‌ییک کی، بو دیارین صنعتکار‌‌‌لاری بوتون دؤورلرده مؤحکم آددیم‌‌‌لار آتمیش و دوغما پوئزیامیزی بوتون یانلیشلیق‌‌‌لاردان قورویوب ساخلامیش‌‌‌لار. موللا پناه واقیف رئالیست شعریمیزین اساسینی قویاراق اونو اؤز خلف‌‌لرینه تاپشیرمیش‌‌دیر. سونرا‌‌‌لار اونون موختلیف قول‌‌‌لاری، خصوصیله تنقیدی رئالیزم میرزه علی اکبر صابر کیمی داهی‌لر و دیگر «موللانصرالدین»چی‌لر واسیطه‌سیله گئنیشلندیریلمیش و اؤز یوکسک زیروه‌سینه چاتدیریلمیش‌‌دیر. سؤز یوخدور کی، آذربایجان رئالیزمی اؤز سئوگی و ‌‌گؤزه‌للیک جهتینی عاشیق‌‌‌لاریمیزا و عمومیتله، عاشیق ادبیاتیندا فعالیت گؤسترن شاعر‌‌لریمیزه بورجلودور. بو یولون اولدوز‌‌‌لاری عاشیق علعسگر، صمد وورغون، حسین عارف، زلیمخان یعقوب کیمی صنعتکار‌‌‌لار‌‌دیر. ایراندا رحمتلیک ب.ق.سهندین «سازیمین سؤزو» اثری و اوستاد شهریارین «حیدر بابا»‌سی خالقا باغلی صنعت اثر‌‌لری‌نین یارانماسینا بؤیوک تکان وئردی. باخ بیزیم ائل‌اوغلوموز همین نسلین داوامی‌‌‌دیر…»، – قناعتی‌له کیتابین مؤللیفینی غرورلا اؤیور.
ائل‌اوغلو اؤزونه مخصوص اوسلوبو، یارادیجیلیق خصوصیت‌‌لری اولان شاعر‌‌دیر. اونون گئرچکلیگی درک ائتمه درینلیگی، هومانیزمی، شخصی تجروبه‌سی، دونیا گؤروشو، ائموسیوناللیغی ایله گوجلنن بدیعی تخیولو ائستئتیک ذؤوقونده هارمانلانیر. ایلهام قایناغینی حیاتدان، جانلی رئال وارلیق‌‌‌لاردان آلان شاعرین هیجان‌‌‌لاری، تلاطم‌‌لری بوتونلوکله گولونه-چیچگینه، داغینا-داشینا وورغون اولدوغو دوغما یوردونا باغلی‌‌دیر. «زیروه» شعری اونون بو باغلیلیغی‌نین و یوکسلمک احتراصی‌نین بدیعی انعکاسی‌دیر:

آ زیروه! یاپیشیب اتک‌‌لریندن
کؤکسونه ‌‌دیرمانان دومان اولایدیم.
سورودن آرخایین، ائلدن آرخایین
بیر داشا سؤیکه‌نن چوبان اولایدیم.

ایچئیدیم عطرینی گولون، یارپیزین،
امئیدیم سودونو اریین بوزون.
او بولاق باشیندا یانان اولدوزون
قلبینده گیزلنن گومان اولایدیم.

ائل‌اوغلو رئاللیغی قانادلی‌‌دیر، شاعرین ‌‌گؤزه‌ل، رنگ‌به‌رنگ آرزو و خیال‌‌‌لار دونیاسیندان پروازلانیر. لاکین بو قاناد‌‌‌لار دایما حسرت، هیجران آلووونون تعقیبینده‌‌‌دیر:

یئنه یول سالایدیم ایره‌مه‌لرده،
قالخیب اوفوقلرده ایتئیدیم بیرده.
شیمشکدن -شیمشگه اود قونان یئرده
آلیشان اولایدیم، یانان اولایدیم.

شاعرین اثر‌‌لری اوریژیناللیغی ایله سئچیلیر. مثلا، «خان چوبان و سارا» حاقیندا بیر چوخ اثرلر یازیلیب، لاکین ائل‌اوغلونون «سارا»‌سی تمامیله فرقلی‌‌دیر. اونون عصیر‌‌لرین یادداشینا یازیلان بو ناغیلا باخیشی اصلینده بو باخیشین بو گونوموزون، صاباحیمیزین یادداشینا‌ سیلینمز بیر ناخیش کیمی نقش اولونماسی آرزوسودور.

دؤنمه‌دی سؤزو اونون،
دؤنمه‌دی اوزو اونون.
آنانین حالال سودو،
آتانین حالال دوزو،
عصمت او‌‌‌لارمیش قیزا،
قئیرت او‌‌‌لارمیش قیزا.
اسیرلر اؤتدو، سارای،
میللت لکلنمه‌دی.

‌‌‌بو سوژئتلی شعرده میللی غرور، میللی اوجالیق کیمی میللی- اخلاقی ‌‌ده‌یر‌‌لریمیز اؤن پلانا چکیلیر و هر بیر فردین میللی منسوبیتی‌نین عینی زاماندا اونون میللی مسئولیتی اولدوغونا ایشاره اولونور:

یاخشی کی، بو ‌سیناقدا
میللت لکلنمه‌دی.
میللتیمین غرورو
تورپاق‌‌‌لارا ائنمه‌دی.
عصیرلر اؤتدو، سارای،
میللت لکلنمه‌دی…

گنج یاش‌‌‌لاریندان میللی آزادلیق اوغروندا موباریزه یول‌‌‌لارینا چیخان، «قوی اؤلسم ده فنار کیمی/ سؤنوم یول‌‌‌لاردا-یول‌‌‌لاردا،» – دئین شاعرین سونو گلمه‌ین موباریزه یول‌‌‌لاریندا بیتمه‌ین آیریلیق حسرتیندن یورغونلوغو، سؤنگونلوگو ده یوخ دئییل‌‌دیر:
آی ده‌ییشی، ایل ده‌ییشی،
دگیشیلمز دؤوران ایشی.
بو یئرلره یاز گلیشی
یالان اولدو، یالان نرگیز.

‌‌‌یاخود دا «اوره‌گیمده اریین‌لر» شعرینده:

او نه اویون، بو نه ایشدی؟
بو نه عؤمور، نه گئچمیش‌‌دیر؟
واغاملایان آرزو‌‌‌لاری
باختیمیزا کیم اکمیشدی؟

آنجاق بو یورغونلوق اوزون سورمور، عصیانلا ‌‌دیرچه‌لیر، آیاغا قالخیر:

گؤتور ‌سینه‌میزدن شر آیاغینی،
ییخیرسان ییخگیلن یئره یاغینی،
باغلاییب قاندالا شیر آیاغینی،
تولکویه، چاققالا وور دئمه، دونیا!

قطعیت‌له دئیه بیلرم کی، «صدیار وظیفه»‌نی شاعر «ائل‌اوغلو» ائده‌ن فطری استعدادی، سونسوز حیات عشقی، آزاد وطن ایدئال‌‌‌لاری اولوب سا، ادبیاتشوناس، متن‌شوناس، آراشدیرماجی ‌‌‌ائده‌ن آذربایجان ادبیاتینا اولان بؤیوک توتقوسو و تعصب‌کئشلیگی اولوبدور. لاکین بو او دئمک دئییل‌‌دیر کی، شاعرین پوئتیک یارادیجیلیغی میللی تعصب‌کئشلیگدن خالی‌‌دیر؛ بو قووتلی دویغو‌‌‌لاری اونون کیملیگینی، سازینی، تارینی، کامانینی اونوتمایان، دوداغیندا آزادلیغین شعاری سسلنن قلمداش‌‌‌لارینا یازدیغی: «گل باشینا دولاندیغیم» (حسین عارف اوچون)، «کامانچا» (بختیار واهابزاده اوچون)، «عاشیق» (عاشیق رحیم نظری اوچون)، «عارف داغی» (‌‌‌حسین ‌‌‌عارف اوچون)، «آران» (عاشیق آران اوچون)، «سئوردی» (قوجامان شاعر آغ قوش اوچون)، «ایتمیش بولاق» (‌‌‌حسین ‌‌‌عارف اوچون)، «اوره‌گیمده بیر پاییز» (شاعر قوربان موسایئو اوچون)، «وینه» (حبیب فرشباف اوچون)، «آنا» (ایمران صلاحی‌نین عزیز خاطیره‌سینه)، «آراز» (بالاجا «آراز» سارجاللی احمد اوغلونا)، «سس یانیر» (شاعر سورگون اوچون) و س. کیمی اون‌‌‌لارلا آچیق ایتحاف شعر‌‌لرینده ده گؤرمک اولور.
میللی ادبیات سئوداسی و تعصب‌کئشلیگ دویغو‌‌‌لاری ائل‌اوغلودا گنج یاش‌‌‌لاریندان باش قالدیرمیشدیر. ۱۹۸۰-جی ایلدن اوستاد یحیی شیدا، هلال ناصری، عباس بارز، عباس صابری و باشقا قلم صاحیب‌‌لری ایله بیرلیکده تبریزده یارانان «آذربایجان شاعرلر و یازیچی‌‌‌لار جمعیتی»‌نین فعال و رسمی عضو‌‌لریندن او‌‌‌لاراق جمعیتده چالیشمیش و اجلاس‌‌‌لاریندا ایشتیراک ائتمیشدیر. «آذربایجان شاعرلر و یازیچی‌‌‌لار جمعیتی» قاپانیلاندان سونرا دا تهران شهرینه کؤچوب ۱۹۸۴-جی ایلین اولیندن تهراندا شاعر و یازیچی دوست‌‌‌لاری: مرادعلی قریشی قافلانتی، بورجعلی قریشی تورک‌ا‌وغلو، حسن ریاضی (حسن ایلدیریم)، سعید بذلی (آیدین تبریزلی) محمد قاسمی (آخشین آغکمرلی)، جبرائیل سیف هریس، ‌‌‌حسین سیف هریس (آغیارلی)، جمشید شیبانی آوچی، قا‌‌در جعفری قوروچایلی ایله بیرلیکده او موحیطده تورک دیللی شاعر و یازار‌‌‌لار اوچون یارادیلان «آرزو کاروانی» آدلی ادبی درنگین بانی‌‌لریندن اولموش و او ایللرده اجلاس‌‌‌لاری آنجاق ائولرده گئچیریله بیلن ادبی درنگی ایداره ‌‌‌ائده‌نلردن اولموشدور.
«صدیار وظیفه ائل‌اوغلو» ۱۹۹۴-جی ایلدن سونرا ایلک بانی‌‌لری مظفر ‌‌درفشی، سعید منیری، اوستاد بهزاد بهزادی، علیقلی کاتبی، هاشیم ترلان، ‌‌‌حسین شهرک و سایره‌لرین ایشتیراکی ایله یارانان مشهور «میرزه علی اکبر صابر» آدینا ادبی درنگین دایمی عضو‌‌لریندن اولموش و درنگین تدبیر‌‌لرینده یاخیندان ایشتیراک ائتمیشدیر. او ۱۹۹۸-جی ایلده تهران بلدیه‌‌سی‌نین مدنیت سارای‌‌‌لاریندان اولان هنری حوزه‌نین مرکزی بیناسیندا هفته ده بیر گون گئچیریلن «تورکجه شعر تنقیدی» آخشام‌‌‌لاری آدلانان ادبی اجلاس‌‌‌لارین تشکیلاتچی‌‌‌لاریندان اولموشدور. بو آغیر ادبی چالیشمادا اونون شاعر و یازیچی همکار‌‌‌لاری: عباد ممی‌زاده آغداشلی، باقر رشادتی، ‌‌‌حسین شهرک، میرزه رسول اسماعیل‌زاده، مهدی عبداللهی اولموشدور. بئش ایل عرضینده آردیجیل او‌‌‌لاراق هر هفته‌نین بیرینجی گون‌‌لری تشکیل ائدیلن او شعر تنقیدی آخشام‌‌‌لاری‌نین او ایللرده تهران ادبی موحیطینده تورک ادبیاتی ایله ماراقلانان گنج ادبی نسلین یئتیشدیریلمه‌سینده بؤیوک رولو اولموشدور.
«صدیار وظیفه ائل‌اوغلو» عینی زاماندا اوزون ایللر مطبوعات اورقان‌‌‌لاریندا چالیشمیشدیر. او، «آذربایجان (تورک) دیلی درنگی»نین بولتنی، «ائل دیلی و ابباتی» نشریه‌سی، «ارک» قازئتی و «پیک آذر»، ‌‌‌خداآفرین»، «آذری»، «دیلماج»، «ائل ادبیاتی» کیمی درگی‌‌لرین رئداکسیا هئیتینده فعالیت گؤسترمیش، بعضی‌‌لرینین‌سه تاسیسچی و یا باش رئداکتورو اولموشدور.
‌‌‌فارس دیلینه حاکیم اولماسی ائل‌اوغلونون آرا‌‌شدیرماجی عزمینی و روحونو داها دا گوجلندیرمیش، ادبیاتشوناسلیق فعالیتینی گئنیشلندیرمیشدیر. اونون الیازما‌‌‌لار اوزه‌رینده‌کی ایش‌‌لری خصوصیله دقته لاییق‌‌دیر. شاعرین پوئتیک آختاریش‌‌‌لاری کیتابخانا‌‌‌لاردا کونجده، بوجاقدا گؤزدن اوزاق قالان هر ورقده، هر سطیرده وطن آختاریش‌‌‌لارینا چئوریلمیشدیر. او، «دیوان نظامی» [گنجوی] (خدیویه الیازماسی)، «دیوان والی»، «دیوان شکری»، «بختیارنامه»، «اوغوزنامه» و «سلجوق‌نامه»، «دیوان شیخ نظامی»، «غزلیات ترکی» ، محمد فضولی‌نین ایندییه ده‌ک اوزه چیخمایان بیر قصیده و بیر ملمع غزلینی، یئنی تاپیلان بیر فارسجا-تورکجه ملمع غزلینی الیازما‌‌‌لار آراسیندان تاپیب ایلک دفعه او‌‌‌لاراق مطبوعاتدا یاییملامیش‌‌دیر.
شاعرلر حاقیندا یازدیغی ادبی باخیش‌‌‌لاری و کلاسیک الیازما‌‌‌لار حاقیندا «آختاریش‌‌‌لار- تاپینتی‌‌‌لار» باشلیقلی علمی-ادبی مقاله‌لری ایراندا یاییملانان: «دده قورقود»، «وارلیق»، «فروغ آزادی»، «مهد آزادی»، «فجر آذربایجان»، «اختر»، «یول»، «آذری»، «امید زنجان»، «بهار زنجان»، «ارک»، «گونش»، «دیلماج»، «پیک آذر»، «خداآفرین»، «بایرام»، «آراز»، «آفتاب آذربایجان» و باشقا تورک دیللی درگی و قازئتلرده درج ائدیلمیش‌‌دیر.
1946-جی ایلده جنوبی آذربایجاندا یارانان میللی حؤکومتین موباریزه یول‌‌‌لارینی عکس ائتدیرن «تئللی ممی» آدلی رومانی، ۲۰۰۲-جی ایلین مای آییندان باشلایاراق اردبیل شهرینده نشر اولونان «آراز» هفته‌لیگینده آردیجیل سای‌‌‌لاردا چاپ ائدیلمیش‌‌دیر. «خودوش» رومانی ایسه اوستاد بهزاد بهزادی‌نین تهراندا نشر ائتدیردیگی «آذری» درگیسینده‌ سلسله شکلینده درج اولونوبدور.
«صدیار وظیفه ائل‌اوغلو»نون «ایل‌‌لرین قانادیندا» (جنوبی آذربایجان شعر آنتولوگیاسی)، تورکجه «دیوان نظامی گنجوی» (یئنی تاپیلان «خدیویه» نوسخه‌سی)، تورکجه «دیوان شیخ نظامی» (آیت‌الله گلپایگانی کیتابخاناسیندا اولان نوسخه)، «آرخادا قالان ایللر» (‌‌‌حسین ‌‌‌عارف ایله شعرلشمه‌لری و خاطیره‌لری، ترتیب ‌‌‌ائده‌نی و ناشری ق.ح. علی‌یئوا) آدلی کیتاب‌‌‌لاری دا نشر ائدیلمیشدیر.
«صدیار وظیفه ائل‌اوغلو» قوزئی آذربایجاندا یاشایان مسلکداش‌‌‌لاری‌نین اثر‌‌لرینی کیریل و لاتین الیفباسیندان اسکی الیفبایا کؤچوروب چاپ ائتدیرمیشدیر: مولود سلیمانلی‌نین «سؤز ایچینده سؤز»، صلاح‌الدین خلیل‌اوون «شرق و غرب»، اسماعیل ولی‌یئوین «بیلقامیش داستانی» و س.
او، ایندییه ده‌ک چاپ اولونموش اون‌‌‌لارلا کیتابین مقدمه و اؤن سؤز‌‌لرینی یازیب‌‌دیر کی، بونلاردان محمد حسن یوسفی‌نین «ائل سؤز‌‌لری»، پرویز یئکانی زارع‌نین «آذربایجان شفاهی ائل ادبیاتینا بیر باخیش»، بختیار واهابزاده‌نین «پاییز دوشونجه‌لری»، تورکجه حافظ غزل‌‌لری»، میرزه علی اکبر صابرین «هوپ هوپ نامه»، وقار نعمت‌ین «سنی قایا‌‌‌لارا چاغیراجاغام» عاشیق کاماندار افندی‌یئوین «بورچالی لایلاسی»، غلامحسین ساعدی‌نین «بیل عزالی‌‌‌لاری»، ‌‌‌حسین سیف هریس‌ین «گونشه ساری»، بهروز ایمانی‌نین «‌‌گؤز‌لرینی آچ»، محرم فرزانه‌نین «ایستک زیروه‌سی»، جمشید شیبانی‌نین «بایاتی بولاغی»، جواد دربندی‌نین «عاشیق‌‌‌لار دونیاسی»نی، عاشیق مراغه‌ای‌نین «غزل‌لر»نی، رامیز محمدزاده‌نین «همیشه سن گله‌سن»، علیقلی کاتبی آغ قوشون «تزه بایاتی‌‌‌لار» عبدالله کاظمی قارابولاغین «آتا بابا‌‌‌لار سؤزو»، عباس دهقانی‌نین «بایاتی بوخچاسی» و س. قئید ائتمک او‌‌‌لار.
فداکار ضیالیمیز ۲۰۰۵-جی ایل دئکابرین ۲۵-ده آذربایجان ادبیاتی‌نین و فلسفی فیکری‌نین تبلیغینده کی خیدمت‌‌لرینه و معارفچیلیک فعالیتینه گؤره آذربایجان اونیوئرسیتئتی‌نین «فخری فرمانی» ایله تلطیف اولونموشدور.
بو گونلرده شاعر، ناثر، ادبیاتشوناس، متن‌شوناس و آراشدیرماجی «صدیار وظیفه ائل‌اوغلو»نون ۶۵ یاشی جنوبی آذربایجاندا گئنیش قئید اولونور. بیز ده ائلیمیزین دایم زیروه‌لره جان آتان وطن و میللت سئور اوغلونو آذربایجان ادبی جامعه‌سی آدیندان تبریک ائدیر، اونا جان ساغلیغی و یئنی یارادیجیلیق اوغور‌‌‌لاری آرزولاییریق.

‌‌‌‌‌‌‌‌‌‌‌‌‌‌‌
قنداب حاقوئردی (علی‌یئوا)
فیلولوگیا اوزره فلسفه دوکتورو، دوسئنت، آذربایجان میللی علملر آکادئمیاسی‌ ادبیات اینستیتوتونون امکداشی