نه‌یه گؤره شعر، سیاست آداملارینین دیلیندن مقامی گلنده، یئرینده سسله‌ننده گوجلو و جیددی گؤرونور. بوتون آنلامینی نیشانلادیغی مئساژا یوکله‌ییر. گولله‌کیمی آچیلیر. دئیه‌سن شعر هامیدان چوخ شاعرین اؤز دیلینده گوجسوزدور. ایللاه‌دا کی شاعر شعرینی یئرلی ـ یئرسیز اوخوماغا اصرارلی اولاندا، بو حالدا شعرده اولان ـ قالان گوج ده سانکی یئللره سوورولور.
ادبیاتین یولو هر زامان سیاست دئییلن بیر گَدیکدن کئچیر. ادبیاتدا سیاست واز کئچیلمز‌دیر. دونیانین لاپ بئله تپه‌دن دیرناغا سئوگیدن یازان قلمی ده هئچ اولماسا ادبیات سیاستینی بیلَن بیر قلم‌دیر. غیرسیاسی‌لیک اؤزو ده سیاست‌طلب ائدن بیر شئی‌دیر. بئله هؤرومچک تورویلا قاریشیق توخونمالار کیمی‌دیر ادبیاتلا سیاست موناسیبتی.
دین‌ین سیاست‌له بیرله‌شیمی نه قَدَر تهلوکه‌لی حؤکمرانلیقدیرسا اونون عکسینه ادبیاتین سیاست‌له قارشیلیغی اینجه بیر اوستالیق طلب ائدن داورانیشدیر، قیمتلی سونوجلار اورتالیغا گتیره بیلر. ادبیات سانکی سیاستین تیکانلیغیندا، داشلیغیندا ایپک یولودور. ادبیاتین سیاسته ائتکیسی، سئوگی‌له بسله‌نن بیر قوچاقلیق روحو کیمی‌دیر. بوتون مجادله‌لری حقیقت‌دن یانا ائتمک باجاریغی وار بیله‌یینده.
شعرینده سسی یئنیلمیش کیمی چیخان میللتین، سیاست مئیدانیندا ظفر گؤره‌جه‌یینه اومیدی آزدیر. چوخ غریبه‌دیر بونون عکسینی ده دئمک اولار؛ سیاستینده آپاریجی بیر گوجه دؤنمه‌ین میللتین ده ادبیاتینین سسی ائشیدیلمز. اوزاقلارا چاتماز.
گؤزوموزون قاباغیندا بیر مصراع‌نین طالعینی گؤردوک، بوتون وارلیغیمیزلا یاشادیق؛
«عالم جنته دؤنسه / یاددان چیخماز قاراباغ»
قاراباغ ساواشیندان سونرا بو مصراع تزه‌دن باشلادی اؤزو اؤز معناسینی آچیقلاماغا. سن دئمه اصیل دؤیوش دیلده گئدیرمیش، کلمه‌لر ایللر بویو قان‌تَر ایچینده‌ییمیش. یاددا ـ یادداشدا، شعرده، بایاتی دا دؤیوش گئدیرمیش. باشی قاخینجلی اولسا دا تورپاغی ایتَن میللتین ادبیاتی اؤزونو و اومیدینی ایتیرمه‌دی، اوزو آغ چیخدی سوندا…
«آرازی آییردیلار…»دونیانین ان کیچیک شعر بیچیمینده دئییلَن سؤزدور. آتوم گوجونو بیر سیاست لیدئرینین دیلیندن سسله‌ننده چئوره ده گؤستردی. یئنی‌دن آنلام قازاندی. دئپرم یاشاتدی.
«حیدر بابایا سلام» پوئماسی اصلینده فولکلوریک مضمون داشییان بیر اثردیر. سن دئمه بونون دا مشقی فیشنگ‌لرله دولو خشابیندا بیر گئرچک قورشون گیزله‌نیب قالیرمیش یامان گون اوچون. اینانمیرسان او سیاسی لیدئر اوخودوغو بو بندیدن سونرا ائشییین هاواسینی بیر داها یوخلا «من سنین تک داغا سالدیم نَفَسی…»
دیل اؤز ایشینی گؤزل باجاران باجاریقلی اوستا و جانلی وارلیق‌دیر. او نه‌قَدَر رسمی تریبونلاردا یاساق اولسا دا بئله، «فخری» قبرستانلیغین جیغیرلاریندا اۆزو کوله‌یه یئرییَن رسمی آداملارین غیر رسمی دانیشقلاریندان اؤز شیمشه‌یینی چاخماغی باجاراجاق. بلکه بونا گؤره؛ «دیلین یانسین » بؤیوک قارغیش ساییلیب زامان زامان. آخی دیل یاندیراندیر!…آخی دیل یانان‌دیر!…
«دیلینه قوربان اولاییم ائلیم هئی‌ی‌ی…»