سلام دوستلار، حؤرمتلی ادبیات سئونلر!
تازا ایلیز، نوروز بایرامینیز موبارک اولسون!
نوروز بایرامی نئچه جهتدن ده‌یرلی، معنالی بیر بایرامدی. بیری بو کی طبیعتده بیر گؤزه چارپان ده‌ییلیشمه‌نین نشانه‌سی‌دیر؛ داها دوغروسو قیشین نفسدن، ایاقدان دوشمه‌سی، باهارین جانلانماسی، جوجرمه‌سی و قیشا غلبه چالماسی‌دیر. اؤزو ده گؤی – گؤیرنتی، غنچه گول‌له، طبیعتین گولوب گؤزللنمه‌سی ایله، عشق، عاشق – معشوقلیق و سئویب سئویلمه‌یه، نغمه‌خوانلیغا، بولبولون گولون باشینا دولانماسینا، گئنیش، اوجسوز- بوجاقسیز، رنگارنگ، چکیجی بیر مئیدان آچیلیر.
بو ده‌ییشیلمه او قده‌ر دوشوندوروجودورکی، افسانه‌ده، اوسطوره‌ده اینسانی و حتا اجتماعی معنالار تاپیر و او معنالار زمان‌لا یئنی – یئنی مفهوملارلا زنگینلشیر. مثلا دئییلیرکی، نوروز فریدونون، کاوه‌نین جوانلار بئینی یئین ضحاکا غلبه تاپان گوندور؛ و یا جمشیدین پارلاق تاج گئییب آذربایجانا چاتان گونوندور و نئچه بئله – بئله خلقین، خلقلرین اوره‌ییندن، اوره‌کلریندن، آرزوگاهلاریندان قوپان و افسانه‌ده، اوسطوره‌ده اؤزو اوچون مناسب و مساعد بیر زمین تاپیب، کؤک سالیر و قرن‌لری آشا – آشا گلیب بیزه، بیزیم زمانه‌میزه چاتیب و بیزلری نه تک کئچه‌جک‌لره، کئچه‌جگیمیزه باغلاییر؛ یعنی بیزی، ایران خلقلرینی بیری بیریمیزه باغلاییب و بو جهت‌لردن، ندن‌لردندیرکی، نوروز خلق‌لری بیربیرینه باغلاییر و او جهتدندیرکی، بیرلیک سمبولو و عاملی ساییلا بیلر. بیز بیرلیگیمیزی قوروماقلادیر کی وارلیعیمیزی دا قورویا بیلریک. اودور کی بو بایرامی قورومالی‌ییق؛ نئجه کی آنالاریمیز و آتا – بابالاریمیز اوزون زمانلاری اونو سئومه‌ینلره قارشی اولانلارین دواملی، جوره به جوره باسقینلارینا رغما، قورویوب ساخلاییب، بیزه تاپشیریبلار و بیز ده اونو حتما کی گوز ببگیمیز کیمی قورویوب گلن نسلریمیزه تاپیشیراجاییق.
بو گوزل قورویوجو بایرام، سیز عزیز ادبیات سئونلره و بوتون وطنداشلاریمیزا موبارک اولسون و یئنی ایل هامیمیز اوچون اوغورلو و اجتماعی عرصه ده کئچن ایل الده ائدیلنلرین آردیجان باشقا باشاریلارلا دوام تاپسین.
شاد یاشایین!