آذربایجانیمیزین معاصر ادبی – مدنی سیما‌لاریندان شکیل چکدیییم ایل‌لر، بیر گون ده دوکتور حسن‌ایلدیریما قوناق اولدوم. اونون کتابخاناسیندا شکیل چکمه‌یه قرار وئریب، ایسته‌دیم ماسا‌نین آرخاسیندا اوتوروب بیر شئی‌یازسین. حسن‌ایلدیریم آغ بیر کاغیذین اوستونده یازماغا باشلایارکن، من ده دوربونون آرخاسیندان شکیل چکمه‌یه باشلادیم.
هر بیر فئریمی‌چکنده، اوزون ایل‌لر بو ائوده، ائله بو مطالعه اوتاغیندا، بو گنجینه ایچینده اوشاقلیق دؤرانیمیزی کئچیرتدیییمی‌خاطرلاییرام. گونلر، هفته‌لر، آی‌لار کئچیرتمیشم بو ائوده، بو اوتاقدا. حتی بو ائو و بو کتابخانه اوتاقی تیکیلمه‌میشدن اول، اسکی ائوین خاطره‌لری گلیر گؤزومون قاباغینا. حسن‌ایلدیریم آغ کاغیذین اوستونده‌یازیر و من هله ده بارماغیمی‌شاتر اوستونه باسارکن، خاطرلاییرام او گونلری. حیطه آچیلان اوتاقی خاطرلاییرام، «ننه»نین مهربان گؤز‌لرینی خاطرلاییرام و «راحله»نین قوناق‌پرور خصلت‌‌لرینی. آرخادا اولان بالاجا اوتاقی خاطرلاییرام و «طوطو بیبی»نین گئجه‌لر منه، «صبحناز»ا، «یاشار»ا، «آیدین»ا، «سولماز»ا و «داداش»ا دئدییی ناغیل‌‌لاری:… «هامی‌یاتیب جیرتدان اویاقدی… »
بارماغیمی‌شاتر اوستونه باسیرام و گؤزومون اؤنونده خاطره‌لر گلیب گئدیر. حسن‌ایلدیریم یازیر آغ کاغیذین اوستونه و من اسکی ائوده «جلال عمی»نی یورغان دؤشک ایچینده‌یاتدیغی گونلری خاطرلاییرام. بؤیره‌یینده داش اولدوغو اوچون، بؤیوک اوتاقدا «قارپیز پارتی» وار ایدی. حسن ایلدیریم هله‌ده یازیر آغ کاغیذا. بارماغیمی‌مؤحکم باسیرام شاترین اوستونه. شاترین پرده‌سی باغلانیر، هر‌یئر قارانلیقلاشیر و یئنه ده آچیلیر. دال با دال شکیل چکیرم. پرده آچیلان زامان، من آینا‌نین قاباغیندا اوتورموشام. «ماهی عمه» قونشو‌لاری اولان خانم آرایشگره، آیدین، یاشار و منیم ساچلاریمی‌نئجه لاپ دیبدن وورماسینی آنلادیر. بیر نئچه دقیقه سونرا بیز اوچ کئچل یولداش «شهید ریاضی» کوچه‌سینده قاچیریق. فوتبالدان هله دویمامیشکن، حمید دئیر: «بریم کانال؟» و نئچه دقیقه بوندان اول فوتبال قهرمان‌لاری اولان بیز، زَمی‌‌لرین کناریندا آخان آرخدا، المپیک اوزوچی‌لری اولوروق.
حسن ایلدیریم یازیر کاغیذا و من دال با دال شاتری باسیرام. پرده آچیلیر، حسن‌ایلدیریم، «۱۳بدر» ده، آغاج‌لارین آلتیندا قوردوغوموز «بالا گل» میدا‌نیندا گلیب اوتوروب دروازا اولان ایکی داشین آراسیندا؛ و بیز نه قده‌ر چالیشیریق دیزی‌‌نین کناریندان توپو دروازادان کئچیره بیلمیریک. او زامان ایکی فوتبال قاپیچیسینی داها سئوه‌ردیک، هئچ فوتبالینی گؤرمه‌دیییمیز، یالنیز حسن عمی‌دن آدینی ائشیتدیییمیز، «لئو‌یاشین» و گوزوموزون اونونده اولان اسطوروی قاپیجی، «حسن عمی»نی.
شاتری باسیرام. کاغیذی منه طرف توتور. اوخویورام:
روشن، ایندی مندن عکس سالیر
من ده نئجه یازماغی
و‌هانسی ژست توتماغی اؤیره‌نیرم
عکس نئجه چیخاجاق
بیلمیرم.
روشن منی تانی‌ییر
اوشاغلیقدان او منیم قول‌لاریمدا
قوجاغیمدا بؤیویوب
عکس منیم هانسی صفتیمی‌گؤستره‌جک
بیلمیرم
21 فروردین ۱۳۸۸
او گوندن، او آغ کاغیذین اوستونده یازیلان‌‌لاردان ۱۲ایل کئچیر. من بؤیوک بیر آغری، آغیر بیر نیسگیل و حسرتین ایچینده بوغولورام. یوخاریدا دانیشدیغیم «حسن‌ایلدیریم»، منیم عمیم، داییم، معنوی آتام، باش‌یازاریم، رئیسیم، امکداشیم، خصوصی حکیمیم و صمیمی‌‌یولداشیمی‌ایتیرمیشم. اوشاقلیق دؤرانیمدان علاوه، ایل‌لر بیرلیکده بیر دفترده چالیشیردیق و او منیم بعضا عائله‌مین خبری اولمایان شخصی احوالاتیمدان دا خبری وار ایدی.
– حسن عمی، بوغازیم بتر گؤینه‌ییر…
– حسن عمی، ائوه چاتماغا پولوم یوخدو. اولسا بیرآز منه پول وئر…
– حسن عمی، گئجه‌لر یوخودا ترله‌ییرم…
– حسن عمی، «ژان بودریار»دان کتابین وار؟…
– حسن عمی، دیشیم آغری‌ییر…
– حسن عمی، سن الله مجله‌نی تکجه بیر وورد فایلیندا وئر…
– حسن عمی، اوتغونا بیلمیرم…
کئچن ایل کووید خسته‌لییینه مبتلا اولدوغوم گونلر، هر گون زنگ آچیب مصلحت‌لر وئریردی. خسته‌لییین اَن چتین گونلری‌نین بیرینده، احوالاتیمی‌سوروشاندا، بوغازیمی‌سیخان غمی‌اودوب، بلکه ده تکجه او معناسینی بیلن سؤزو دئدیم: «حسن عمی، بو دفعه اؤلمه‌سم، داها اؤلمه‌رم»… عصبلشدی. «بیر داها بئله دانیشما» دئدی منه. من بیر داها بئله دانیشمادیم. «بوغازیندان آسیلان» بیریسی کیمی‌اولسام‌دا بیر داها بئله دانیشمادیم. من حسن عمیم‌دن نئجه کدریمی‌اودماغی، یاسیمی‌کئچیرتمه‌یی اؤیرنمیشم. من حسن‌ایلدیریمی، «هاشم ترلان»ین، «بهزادی»نین، «قافلانتی»نین، «علیایی»نین و گؤزه‌ل گؤز‌لره صاحب اولان ننه‌‌نین ماتمینده گؤرموشم آخی. من اؤیرنمیشم حیات وارکن سئوینج و کدر ائکیز دوغولوبدو. من چتین گونلرده سرو آغاجی کیمی‌آیاق اوسته، باشی‌یوخاری اولماغی گؤرموشم حسن‌ایلدیریم‌دا، حسن عمی‌ده. من حسن‌ایلدیریم‌دان «قوی دؤنسون دؤننلر یولوندان سنین/ من کی اؤز یولومدان دؤنن دئییلم» و حسن‌عمی‌دن «بیز گلدی-گئدریک، سن‌یاشا دونیا» سؤزونو دفعه‌لرله ائشیتمیشم آخی.
من بوگون حیات ائکیزلییی‌‌نین کدرینی‌یاشاییرام و حسن عمی‌گیلین حیطینده «حبیب عمی»نین الی‌ایله اکیلن سرو آغاجی‌‌نین اوجالماسینا دوشونورم.
