ساوالان هشتاد یاشیندا!
چئویرن: مرتضی مجدفر
ترجمه: مرتضی مجدفر
مرتضی مجدفر
00:00
00:00

باشلانیش

۱۳۷۹-نجی ایلین آبان آیی‌نین ۲۴-ونده، تهرانداکی بهمن مدنیت ائوینده، ساوالان ایمضاسی ایله ائلیمیزین ایچینده اؤزونه آد و سان قازانان، ائل شاعیری، حسن مجیدزاده‌نین آلتمیش ایللیک تؤره‌نی قورولموشدور. مجیدزاده ۱۳۱۹ -نجی گونش ایلی‌نین مهر آییندا، اردبیلین یاخینلیغیندا دوشن «نیر» بؤلگه‌سینده دونیا گؤز آچمیشدیر، ائله اونون آلتمیش ایللییی، تاریخی جهتدن دوز ایدی. آنجاق بو یازینی اونون هشتاد ایللیینه حصر ائتدییمیز، بیر ایل فاصیله‌لی اولموشدور. ساوالان، بو گونلر، کرونا شرایطیندن آسیلی اولاراق، عمومیتله ائوینده اولور. آنجاق بیزیم هامیمیزا، عؤمرونو ادبیاتیمیزین، موسیقی‌میزین و مطبوعاتیمیزین اوغروندا یورولمادان چالیشان، قوجامان شاعیریمیزدن یاد ائتمک، اونودولماز بورج‌دور. بورادا من ساوالانین اثرلری و حیاتی حاققیندا، هم ده اونون دوکتور جواد هئیت‌ین ایللر بویو چیخارتدیغی وارلیق مجلله‌سینده تأثیر قویوجو رولوندان و تورک اؤلکه‌لرینده تانینمیش بیر شاعیر و تدقیقاتچی کیمی آدی چکیلن یارادیجی ادیب اولدوغوندان، آرتیق معلومات وئرمه‌یه‌رک، ایییرمی ایل بوندان اول اونون تؤره‌نینده یازدیغیم و اوخودوغوم متنی، حؤرمتلی اوخوجولارا تقدیم ائدیب، ساوالان معلمین، هشتاد ایللینی تبریک ائده‌جه‌یم. بو یازی قلمه آلینان واخت، منیم آتام غلامرضا مجدفر، هله ده یاشاییردی. آنجاق اون آی چکمه‌دن حیاتینی دییشدی.

امک توزو، ایش توزو
قوجامان شاعیر حسن مجیدزاده، ساوالانین آلتمیش ایللیک تؤره‌نینده اوخونموش یازی و شعر

توستولو، دمیرلی، داشلی و ماشینلی شهرین ایچینده جومموشام. فارسجا دانیشماقدان، فارسجا یازیب- یاراتماقدان یورولموشام. هر دن بیر الیمه دوشن تورکجه کیتاب و باشقا یازیلاری دؤنه-‌‌دؤنه و قانا-‌قانا اوخویورام، آنجاق دیابت ناخوشلوغونا دوچار اولان خسته‌لر کیمی، قانیق وئرمیر. سوسوزلوغوم او قد‌ه‌ر آرتیق دیر کی بیر د‌نیز شیرین سو ایله ده سؤنمه‌یه‌جک و هر بیر یئرده سو گؤردوکده و سو ائشیتدیکده اورایا سوزولمه‌ییم گرکلی اولاجاقدیر.
آخشام چاغی دیر، هفته اوچو، آبان آیی‌نین ایییرمی اوچو و ساعات بئش حدودلاری. تئلفون زنگ ائدیر. زنگ ائدن آذربایجان فولکلورو، ادبیاتی و موسیقی‌سی وورغونلاریندان بیری دیر: عباس مهیار معلم:«صاباح بهمن مدنیت ائوینده، ساوالانین آلتمیش ایللییی‌دیر. خبرین وارمی؟» دئیه، منی سئویندیریر. او دئییر:«صاباح آخشام اورادا گؤروشه‌جه‌ییک. خئیرلی بیر ایش دیر. بو ییغینجاغی حاضیرلایانلارین اللری آغریماسین. »
سئوینجیمی نئجه دوستوما چاتدیرا بیله‌جه‌ییمی یادیمدان چیخارتمیشام. دئییرم:«چوخ یاخشی ایش دیر. اوچ ایل قاباق یادیندادیرمی؟ یئددی قوجامان آذربایجان ادبیاتی‌‌نین اوستادلاریندان، طنطنه‌لی بیر ییغینجاقدا تجلیل اولوندو. او جمع‌دن، یادلاری همیشه‌لیک دیری قالان اوستادلار، زهتابی و نطقی، ایندی بیزیم آرامیزدان کؤچموشلر. او گئجه‌ده کی یئددی نفرین بیری ده منیم آتام ایدی. او قورولتای قورتاردیقدان سونرا، آتام اون ایل جاوانلاشمیشدی. هفته‌لرله، آیاقلاری‌نین آغریسیندان شکایتلنمیردی و یاشاییشی شن اولموشدو. »
مهیارلا سؤزومو قورتاراق، اونا سؤز وئریرم حتماً گله‌جه‌یم و بو خوش خبری یئتیرمک اوچون، آتاما زنگ آچیرام.
تئلفونو گؤتورن آنام‌دیر. داها ایندی نئچه واخت‌دیر عادت ائتمیشم زنگ ائدندن سونرا، بیر ایکی دقیقه گؤزله‌یم. تئلفونو گؤتورمک بیر آز واخت آپاریر. آناملا دانیشیرام. آتام دا، آنامین یانیندا تئلفونا قولاق آسیر. بیر آز دینله‌ییشیم دوز اولسا آتاملا-آنامین سسلرینی بیرلیکده ائشیده بیله‌رم. آناما ساوالانین آلتمیش ایللیییندن سؤز آچیرام و اونا دئییرم کی بو ییغینجاغا آتامی دا چاغیریب‌لار. آنام دئییر:«سندن قاباق، ساوالان اؤزو لطف ائدیب، آتانلا دانیشیب. . . او، هئچ واخت آتانی یاددان چیخارتماز. . . هم گلر، هم ده زنگ ائدر. » سونرا تعجبله، بیلمیرم مندن یا دا کی آتامدان سوروشور:«ساوالانین آلتمیش یاشی وار؟ منجه کی یئتمیشدن یوخاری دیر. . . توک‌لری آغ-آبپاق‌دیر. . . ساوالان کیمی!»
آتامین سسینی ائشیدیرم و یئنه ده بیلمیرم منه یا دا کی آناما دئییر:«قوجالیق آغی دئییل کی، امک توزو دور، ایش توزو دور. دیل دردی‌نین آغی‌دیر، ائل دردی‌نین آغی‌دیر. . . »
و سؤزونون سونوندا هؤنکورتمه وورور و سسینی واضحجه‌سینه تئلفون سیملری‌نین دالیسیندان ائشیدیرم و گؤزلریم یاشلا دولور و هئچ نه ده دئیه بیلمیرم.
آنام دئییر: آتان دئییر کی صاباح فرهنگسرایا گئتمه‌میشدن قاباق، منه باش وور. آیاقلاریم خسته‌دیر، گئده بیلمه‌رم. آنجاق اللریم، هم ده دوشونجه‌م ایشله‌ییر. چالیشاجاغام بیر شعر یازام. »

***

دونن آخشامدان سئوینج و شنلیکده‌یم. دوستلاری گؤرمک شنلییی. . . اوستادلاری گؤرمک سئوینجی. . . تورکجه دئییب- ائشیتمک، گولوب- دانیشماق و شعر دینله‌مک سئوینجی. . . «ساوالان» کیمی ووقارلی و اوره‌یی یانیقلی شاعیر و ادبیاتچینی گؤرمک و اونون ایللر بویو یاشاییشی و یارادیجیلیغینی دَیرلندیرمک گئجه‌سی و آتام، مورشودوم، اوستادیم و گؤزلریمین ایشیغی، «غلامرضا مجدفر»ین، «حسن مجیدزاده»ین حاققیندا یازدیغی شعری اوخوماق شنلییی و. . .
ساغ و سلامت قالین و آتامین شعرینی دینله‌یین:

ائشیتدیم شاعیره تؤره‌ن توتوبلار
آلتمیش ایل عؤمرونون، ایل دؤنومونه
بو قد‌ه‌ر چتین‌لیک، بو قده‌ر مانع
تقدیره لاییق‌دیر، بو عمل یئنه.

***

بو دا منیم کیمی غربت دیاردا
یالاندان حیاتی یامسیلاییبدی
مانع‌لر اؤنونده، آنا دیلینده
آنجاق دایانماییب، شعرین دئییبدی.

***

آلتمیش ایل سهل‌دیر، آلتی یوز گرک
یاشایا دونیادا قهرمان کیمی
داغ کیمی دایانیب مؤحکم یئرینده
آدی‌نین صاحیبی ساوالان کیمی.

***

آغیر حیاتینی ایره‌لی سوروب
آغارمیش توکلری شاهیددیر اونا
تاپدانمیش دیلیندن حمایت ائدیب
عؤمرو بو تئزلیکده چاتماسین سونا.

***

دیریلدیب «آپاردی سئللر سارانی»
گؤزل بیر داستاندیر تورک دیلیمیزده
اؤزگه‌لر فیلمه ده چکدیلر اونو
هئچه، پوچا چیخدی اللشمک بیزه.

***

مریض‌لیک قویمادی من ده گلئیدیم
یاخیندان گؤرئیدیم شاعیر قارداشی
جهنم! اوتوروب بیر شعرله‌شئیدیک
دونیانین بیلنمز آیاغی، باشی.

***

«مجدفر» حیاتین قدرینی بیل سن
هله یئنه واردیر دالدا، بوجاقدا
اودلار پاریلداییر کوللر ایچینده
ائشسن اوزه چیخار ایستی اوجاقدا.

۲۴/۸/۱۳۷۹

اتک یازیسی:
آتام غلامرضا مجدفر، بو مراسیمدن اون آی سونرا، ۱۳۸۰‌نجی ایلین شهریور آیی‌نین ۳۰وندا، آغیر خسته‌لیک سوردوکدن سونرا، حیاتینی دییشدی، آنام ایسه ۱۳۹۷ نجی ایلین خرداد آییندا اونا قووشدو. یازیدا اشاره اولونان یئددی قوجامان آذربایجان ادبیاتچی‌لاری‌نین تؤره‌نینده آدلاری گئدن زهتابی و نطقی‌دن باشقا، او زامان دیری اولان، دوکتور هئیت، فرزانه و منیم آتام دا حیاتلارینی دییشمیشلر.

اشتراک گذاری در print
چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: 3 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

ساوالان هشتاد یاشیندا!

مرتضی مجدفر
www.ishiq.net

آذربایجان ادبیات و اینجه‌صنعت سایتی

ساوالان هشتاد یاشیندا!

مرتضی مجدفر
www.ishiq.net

آذربایجان ادبیات و اینجه‌صنعت سایتی