محرم عمی
محبت فروغی(پارلاق)
یازین ایلک گونلرینده توت آغاجی‌نین آلتیندا چیلینگ آغاج اوینایان زامان، اوزاقلاردان گلن بیر نیسگیللی سس اوشاقلاری اویونلاریندان ساخلیردی:
آغلارام آغــــلار کیمین
دردیم وار داغلار کیمین
خزان اولدوم تؤکولدوم
وِئرانا باغــــــلار کیمین
آی اوشاقلار محرم عمی اوخور دئیه‌رک، اویونو بوراخیب دام اوستونه قاچیب او سسه قولاق آساردیق. او سس محرم عمی‌نین اوزاقدان گلن سسی ایدی. محرم عمی «پیره ناخیرچی»دا اوخویاندا حیس ائلردیک یانیمیزدا اوخویور. اونون او قده‌ر سسی قودرتلی و اثرلی‌ایدی کی هر ائشیدن ایشینی بوراخیب دقتیلن اونا قولاق آسیردی. محرم عمی‌نین ماهنی‌لاری اوره‌کده‌کی درد سؤزلریندن ایدی. اونون بایاتی‌لاری اجتماعی ظولملر و عدالتسیزلیک‌لردن خبر وئریردی:
بو داغدا اکــدیم اکین
آلدیــــلار الیمده‌کین
هیچ کافر، هیچ مسلمان
اولماسین منیــم تکین
دام اوستوندن قولاق آسان قوجا قادینلارین گوزلریندن «حورا چشمه» سویو تک آخار زینه – زینه گؤز یاشینی گؤرن زامان، من ده باشلاردیم آغلاماغا. محرم عمی گنجلیگینده بیر قودرتلی و زورلو پهلوان‌ایمیش. بیر طرفدن روزگاردان چکدیگی فشار، او بیری طرفدن ایچریدن گلن پهلوانلیق زورو باعث اولموشدو محرم عمی‌نین گؤزلری کور اولسون.
عزیزیم نئجه کـــئـــچدی
بیلمه‌دیم نئـــــجه کـئچدی
منیمکی آخ – واییـــنان
سنینکی نئـــــجه کـئچدی؟
محرم عمی اؤز آنا یوردون چوخ سئویردی. بو مسئله اونون بایاتیلاریندان بللنیردی:
عزیزیم وطن یاخچی،
کؤینکی کتان یاخچی،
غوربت یئر جنت اولسا،
یئنه ده وطن یاخچی
عزیزییم دیلن گز،
باغدا گوله دیلن گز،
غوربتده خان اولونجا،
وطنینده دیلن گز
هر ایل یازین ایلک چاغیندا کندیمیزه یولوم دوشنده، محرم عمی‌نین نیسگیللی سسی وسؤزلری یادیما دوشنده گؤزلریمدن گؤز یاشیم اوزومه آخیر. کاش بیرده اوشاق اولوب او شن چاغ‌لاری گؤرئیدیم…
بوستانام تاغیم آغلار
غمدن یاپراغیم آغلار
ساغام اوزوم آغلارام
اولسم توپراغیم آغلار
یک پاسخ
چوخ گیرا…
من اوخودوم آغلادیم…