توسباغالار یا کپنک‌لر؟! / دکتر مرتضی مجدفر
چئویرن: مرتضی مجدفر
ترجمه: مرتضی مجدفر
مرتضی مجدفر
00:00
00:00

توسباغالار یا کپنک‌لر؟!
دکتر مرتضی مجدفر*

توسباغالار ایله ایپک قوردلارینین درس کیلاسلاری فرقلی‌دیر. توسباغالار اون ایکی ایل، باراما قوردلاری ایسه، اون ایکی گون درس آلمالیدیرلار. توسباغالار بو اون ایکی ایلین هر بیر ایلینی دالیدا قویوب، یئنی درس ایلینی باشلایان گونلر، چاناقلاری بیر داها دا قاتلانیر. چاناق قاتلاندیقدا، توسباغالار داها دا قینلارینا سیغیشیرلار و قورخو بوتون جانلارینی بورویور. اونلار توسباغا قالیر، گونو -گوندن چاناقلاری قالینلاشیر و گؤرکملری ایسه کیفیرلشیر. آنجاق ایپک قوردلاری، اؤز کامیللشمه کیلاسلاریندا، توت یارپاقلارین یئیرکن، پیله‌لرینی قات – قات یئره قویوب، گؤیلره قالخماق درسینی مشق ائدیرلر.
هر پیله، باراما قوردلاری‌نین جانیندان قوپاراق، اینجه و یوخا ایپک تئل‌‌لری‌نین یارانماسی گؤرونور و قورتاراجاق زامانی، چیرکین یا خود هئچ بیرگوزه‌للییی گؤزه چارپمایان ایپک قوردلاری‌نین بیر – بیری اوستونه قالانمیش قالاقلارین آراسیندان، آل – آلوان، ناخیشلی و اینجه قانادلی گؤزل کپنک‌لر، قاناد چالا – چالا گؤیه اوچورلار.
داش چاناقلی توسباغالار اون ایکی ایل؛ گؤزل قانادلی کپنک‌لر ایسه، اون ایکی گونون بویا – باشا چاتدیقلاری‌دیرلار.
حیاتین و اؤیرنیشین هم بویو، هم ائنی، هم ده اوجالیغی واردیر. توسباغالارین کیلاسلاری‌نین‌ بویو اوزون، ائنی آز و اوجالیغی داها آز دیر. کپنکلرین کیلاسلاری‌نین بویو قیسا، ائنی آز و اوجالیغی اوستون‌دور.
حیاتیمیزدا، اوشاقلاریمیزی توسباغالار یا کپنک‌لرین کیلاسلارینا یوللامالییق؟ تربیه‌میز توسباغا سایاغی یا کپنک گؤرکمینده اولمالی‌دیر؟! هانسی‌سینی بینیرسینیز؟ نییه؟!

  • تعلیم تربیه علملری اوستادی
اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

توسباغالار یا کپنک‌لر؟! / دکتر مرتضی مجدفر

مرتضی مجدفر
www.ishiq.net

آذربایجان ادبیات و اینجه‌صنعت سایتی

توسباغالار یا کپنک‌لر؟! / دکتر مرتضی مجدفر

مرتضی مجدفر
www.ishiq.net

آذربایجان ادبیات و اینجه‌صنعت سایتی