۱ـ آرالیقدا قالاسان. (یئرسیز- یوواسیز قالاسان.)
۲ـ‌ آللاه قاباغینا قویسون. (گؤردویون ایش، آچدیغین فیریلداق اؤز باشینا دا گلسین.)
۳ـ ال‌لرین چوروسون.
۴ـ الین خمیر اولسون، قارنین آج.
۵ـ الین خینا گؤرمه‌سین، چیینین پرده. (اوغلان‌لارا دئییلر؛ ناکام اؤله‌سن آنلامیندا.)
۶ـ ائولاددان یاریمایاسان. (اوشاق‌لاریندان خئیر گؤرمه‌یه‌سن.)
۷ـ باشین آغارینجاق، گؤزون آغارسین. (قوجالمامیش اؤله‌سن.)
۸ـ بویونا خام ایپ توتوم. (کفنله‌مک آنلامیندا.)
۹ـ تپه‌ندن کول النسین (پیس گونه قالاسان.)
۱۰ـ توخ قارنینا هئچ الینی باسمایاسان. (همیشه آج قالاسان.)
۱۱ـ‌ تیفاغین داغیلسین. ( ائو ائشی‌یین داغیلسین.)
۱۲ـ چوخ ایشله‌یه‌سن، آز یئیه‌سن.
۱۳ـ چؤرک آتلی اولسون، سن پییادا. (چؤره‌یین داشدان چیخسین؛ چتین‌لیک‌له دولاناسان.)
۱۴ـ هئچ «اوخای» دئییب، دینجه‌لمه‌یه‌سن. (همیشه زحمتده اولاسان.)
۱۵-هئچ اوزون گولوب عئینین آچیلماسین. (خوش گون گؤرمه‌یه‌سن.)
۱۶ـ دالیندان کسیب، قاباغینا یامایاسان. (یوخسوللوقلا ال به یاخا اولاسان؛ چتین‌لیک‌لرین، دردلرین الینده آوارا قالاسان.)
۱۷ـ دالین هارای اولسون، قاباغین قویو. (نه گئدیش یولون اولسون، نه قاییدیش.)
۱۸ـ دیبردین داغیلسین. (ائو ائشی‌یین، دودمانین، یئددی آرخان داغیلسین.)
۱۹ـ سو اوزونه گوله‌سن. (خوش گونونه پئشمان اولاسان.)
۲۰ـ سنی آغلار قالاسان.
۲۱ـ شلین آغیر اولسون، قارنین بوش. (یوکون آغیر اولسون، قارنین بوش.)
۲۲ـ قاباغیندا بورج اولسون.
۲۳ـ قاباغیندا چؤرک بورجو اولسون.
۲۴ـ قاباغیندان دورو سو آخماسین. (همیشه کورلوقدا اولاسان.)
۲۵ـ قارا بخت اولاسان. (قیزلارا دئییلر؛ ار ائویند خئیر گؤرمه‌یه‌سن.)
۲۶- قارا پرده اولاسان. (قیزلارا، گلین‌لره دئییلر؛ ارین اؤلسون آنلامیندا.)
۲۷ـ قارا پرده، قارا دوواق اولاسان. (قیزلارا، گلین‌لره دئییلر؛ اری‌نین اؤلومونه یاس ساخلایاسان.)
۲۸ـ قارا گئیینیب، گؤی بورونه‌سن. (عزیزلری‌نین بیری اؤلسون.)
۲۹ـ قارا یایلیق اولاسان. (قیزلارا، گلین‌لره دئییلر؛ اری‌نین یاسینا باتاسان.)
۳۰ـ قارنین اودلا دولسون.
۳۱ـ قیفیلین دویونه دوشسون، آچارین داما. (ایش‌لرینی یئر به یئر ائله‌یه‌ بیلمه‌یه‌سن.)
۳۲ـ گئت، بیر داش دا دالینجا. (گئدیب، هئچ واخت دا قایـیتمایاسان.)
۳۳ـ گئت قایـیت اولاسان. (قیزلارا، گلین‌لره دئییلر؛ ار ائوینه گئدیب،‌ بوشانماق یوخسا ارین اؤلوموندن دولایی یـئنی‌دن آتا ائوینه قایـیتماق آنلامیندا.)
۳۴ـ گولر اوزون اولماسین.
۳۵ـ مالین مور اولسون. (مالین کورلانیب، قورتارسین.)
۳۶ـ اوزون گولوب، قاباغین آچیلماسین.
۳۷ـ اوجاغین کور اولسون. (اوشاغین اولماسین؛ سون‌سوز قالاسان.)
۳۸ـ اوغول! اوشاقدان چکه‌سن. (ائولادین ناخلف چیخسین.)
۳۹ـ ایت پیشیک اوزونه حسرت قالاسان. (ایت پیشیک‌سیز، حئیوان‌سیز، کیمسه‌سیز، یالقیز قالاسان.)
۴۰ـ یوکون آغیر اولسون، جیبین بوش.