۱۹ ژانویه ۲۰۲۵، بازار گونو، آذربایجانین مودرنیست شاعر و متفکری ناصر مرقاتی‌نین خاطره‌سینه تورونتودا یئرلشن «آذربایجان مدنی میلّت» جمعیتی طرفیندن آنلاین عزیزلمه مراسیمی کئچیریلدی. زوم و کلاب‌هاوس پلاتفورملاری اوزه‌ریندن یایینلانان بو مراسیمه تورکیه‌ده، آلمانیادا، کانادادا، قوزئی آذربایجاندا، آمریکادا، ایراندا و دونیانین موختلیف اؤلکه‌لرینده یاشایان آذربایجانلیلار قاتیلمیشدیلار. بو صمیمی مراسیمده ده‌یرلی شاعر و یازیچی ناصر مرقاتی‌نین عایله‌سی، دوستلاری و اؤیرنجیلری اونون یاشامیندان، فعالیتلریندن، دوشونجه‌لریندن نمونه‌لر گتیره‌رک دانیشیقلار ائدیب، اونون آذربایجان دیلی و کولتورو اوغروندا آپاردیغی موباریزه یولونون داوامینی آرزولادیلار.
تانینمیش آذربایجان شاعری ناصر مرقاتی، ۱۳۲۸-جی ایلین تیر آیی‌نین ۱۶-دا تبریزده دونیایا گؤز آچدی. ایلک و اورتا تحصیلینی تبریزده تاماملایب، ۱۳۴۸-جی ایلده دیپلوم آلیب، تبریز اونیورسیته‌سینی جغرافیا بیلیملری اوزره بیتیرمیشدیر. اوشاقلیق دوستو مسعود اورنگی‌نین سؤیله‌دیگینه گؤره، ناصر مرقاتی ۱۳۴۰-لاردان سونرا آذربایجان میلّی حؤکومتیندن قالان تورک دیلینده چیخمیش کیتابلاری خیاوانلاردان و یئرآلتی کیتاب ساتانلاردان الده ائدیب اوخویاراق آذربایجان ادبیاتی ایله تانیش اولموشدور. کیتاب اوخویوب شعر یازماق هوسی اونو تبریزده‌کی سیاسی آیدینلارین جمعلرینه آپارمیشدیر. موختلیف ضیالی یازیچیلار و سیاسی فعاللارلا دوستلوق ائتمه‌سینه باخمایاراق، اونون شعر و ادبی یارادیجیلیغینا ان درین ائتگی بوراخان شخص علیرضا نابدل (اوختای) اولموشدور. اونلار اوزون ایللر دوستلوق ائدیب خصوصی گؤروشلرده آذربایجان ادبیاتیندا یئنی‌لیکچی دوشونجه‌لرین ضرورتینی موباحیثه ائدیرمیشلر. مرقاتی قیرخینجی ایللردن سونرا اینقلابی شعرلر یازاراق، سیاسی فعالیت‌لره ده باشلامیشدیر. ۱۳۴۹-جی ایلده سیاسی چالیشمالارینا گؤره حبس اولونوب، او دؤورلرده یازدیغی شعرلر مختلیف حادیثه‌لرین سونوجوندا یوخ اولموشدور.
ناصر مرقاتی حساس روحلو و استعدادلی بیریسی ایدی. او تکلیگینده موختلیف صنعت نؤوعلرینده اؤز قابلیتلرینی دنه‌میشدیر. اوخویوب یازماقلا بیرلیکده واختی ایله ساز چالیب، رسیم چکیب، بعضا هئیکل تراشلیق ائدیردی. بو اوزدن تبریزین «عمامه‌پیچ» کیمی مودرنیست رسّام و صنعتکارلاری ایله یاخیندان دوستلوق علاقه لری قورموشدو. اینقلابدان سونرا ناصر مرقاتی تورک دونیاسی و دونیا اسطوره‌لرینی اوخویوب تانیماغا فورصت تاپدی. بو ایسه اونون شعرلرینی و ادبی یارادیجیلیغینی دریندن ائتکیله‌دی. ۱۳۷۰-جی ایللردن باشلایاراق اؤز ائوینده گیزلی مودرن ادبیات جلسه‌لری قوروب گنج یازیچیلارلا گؤروشلر ائتدی. بعضا بو جلسه‌لره حمیده رییس زاده (سحر) و فریبا وفی کیمی اونلو شاعر و یازیچیلار دا قوناق اولموشدولار. ناصر مرقاتی گنجلرین ادبیات نظریه‌لرینی اؤیره‌نیب موباحیثه ائتمه‌لری اوچون بعضا تبریز اونیورسیته‌سی‌نین اینگلیس دیلی و ادبیاتی موعلیم‌لرینی ده بو جلسه‌لره چاغیریردی. ۱۳۷۱-جی ایلده علیرضا صرافی‌نین یاردیمی ایله ناصر مرقاتی‌نین «تالانمیش گونش» آدلی شعر توپلوسو نشر اولوندو. کیتابین اوز قابیغینی دوستو یعقوب عمامه‌پیچ چکمیشدی. تالانمیش گونش کیچیک بیر شعر دفتری اولسا دا، چوخ تئز او زامانکی ادبیات هوسکارلاری و شاعرلری آراسیندا آد قازاندی. آما ائله همن ایل جلسه‌لره گلن بیر انگلیس دیلی اوستادی جلسه‌لرین وار اولماسینی امنیت اورقانلارینا چاتدیردی و قیسا زاماندا جلسه‌ده اشتراک ائدن موختلیف شخصلر، بو فعالیت حاقدا سورغو-سوال و تهدید ایله قارشیلاشدیلار. باسقیلارین چوخلوغو اوزوندن ناصر مرقاتی قاچاق اولاراق آذربایجان جمهوریتینه گئدیب، اوردان دا آلمانیانین برلین شهرینده ساکن اولدو. برلینده یاشادیغی دؤورلرده بیر نئچه وبلاگ و ادبی سیته قوروب، یازی-پوزو ایله مشغول اولدو. ناصر مرقاتی بو سیته‌لرده ادبی یازیلارلا بیرلیکده آذربایجان اجتماعی-سیاسی مسئله‌لری ایله باغلی مقاله‌لر ده یاییملاییردی.
مرقاتی حیاتی‌نین سون ایللرینده خسته‌لیگه توتولدو و اوزون ایللردن سونرا تبریزه سفر ائتمه‌گه قرار وئردی. آما آلزایمر خسته‌لیگی آغیرلاشاراق یئنی‌دن برلینه دؤندو. آذربایجانین استعدادلی شاعری ناصر مرقانی، میلی حؤکومتین قورولدوغو آذر آیی‌نین ۲۳-ده، ۷۴ یاشیندا حیاتا گؤز یومدو.
ناصر مرقاتی اوچون قورولان عزیزلمه مراسیمینده اونون حیات یولداشی سهیلا خانیم، قیزلاری خزر و شلاله مرقاتی، قارداشی منصور مرقاتی دانیشاراق خاطیره‌لرینی و دویغولارینی پایلاشدیلار. اوغلو آزاد مرقاتی ده پروقرامدا اشتراک ائتمیشدی. عایله‌سیندن علاوه یاخین دوستو مسعود اورنگی، قارداشی منصور مرقاتی، واختی ایله ناصر مرقاتی‌نین ائوینده قورولان ادبیات اوجاغینا گلن اؤیرنیجی‌لری و دوستلاریندان تقی قیصری، لاله جوانشیر، بهمن قدمی، ناهید شری‌زاده، فریبا وفی، صمد پورموسوی و هابئله آذربایجانین اونلو شاعرلریندن اولان نیگار خیاوی قیساجا دانیشیقلار ائتدیلر. دانیشانلار مرقاتی‌نین حیاتی، یارادیجیلیغی و فعالیتلری حاقدا اؤز بیلگیلرینی دینله‌ییجی‌لرله بؤلوشدولر. اونلار ناصر مرقاتی حاقیندا دویوب-دوشوندوکلرینی سؤیله‌ینده جلسه‌ده دویغولو و کؤورک آنلار دا یاشانیلدی. بو مراسیمده ناصر مرقاتی‌نین حیاتیندان بعضی پارچالار ویدیو-اسلاید کیمی یاییملاندی. اوچ ساعاتا یاخین داوام ائدن بو مراسیم جانلی بیر ساز ایفاسی و شاعرین اؤز سسی ایله اوخونموش بیر شعر ایله سونا چاتدی. (خبرین سونو)
ژانویه ۲۰۲۵
صمد پورموسوی
AZ Civic Nation – Canada
