آذربایجان خالقینین طالعی کئچمیش یوز ایلده سورگونلوک و ائودلارینین طالعی ایسه دیدرگینلیک و آیریلیقلا آیریلماز اولوبدور. مینلر مبارز و شریف اینسانین حیات نغمه‌سی وطندن، آنا یورددان و دوغما خالقدان اوزاق، غربت اؤلکه‌لرینده سوسوغونلوغا اوغراییبدیر. بئله مجبوری سورگونلویه قاتلاشان اینسانلارین وطندن اوزاقلاردا حیاتلا وداعلاشمالاری داهادا اوزوجو و داهادا آغیر اولور.
یاییلان خبره استنادا اسفند آیی‌نین ۲۴نجی گونو عؤمور طالعی غربتده معنالانان نجیب، شرافتلی، اجتماعی عدالت و دئموکراتیا اوغروندا عؤمرونو مبارزه‌ده کئچیرن آذربایجان ضیالیسی هدایت سلطانزاده ده لندن شهرینده ۷۹ یاشیندا حیاتلا ابدیلیک وداعلاشیبدیر.
هدایت سلطانزاده بیر آذربایجان اوغلو اولاراق آزادلیق، عدالت و میللی ستمه قارشی موباریزه‌نین نجیب، متین، حؤرمته لاییق و چوخ سئویلن شخصیتلریندن اولوبدور. او عؤمرونون بؤیوک بیر قیسمینی آزادلیق و اجتماعی عدالت اوغروندا مبارزه‌یه صرف ائتدییی اوچون زندانلاردا و سورگونده کئچیریبدیر. دئموکراتیا، ملی مسئله، کیملیک، فدرالیزم، آیری سئچگیلیک، دیل و ادبیات موضوعلاری ایله ماراقلانانلار، بو سئویلن آذربایجان شخصیتی ایله داها آرتیق اونون ده‌یرلی و نظری اساسلارا دایانان یازیلاری و مقاله‌لریله تانیشدیرلار.
هدایت سلطانزاده تبریز شهرینده دوغولوب. تهران اونیوئرسیتئتی‌نین حقوق فاکولته‌سینده اوخویارکن شاه رئژیمینه قارشی موباریزه‌یه باشلاییب و یولداشلاری ایله بیرلیکده ۱۰ ایله یاخین حبس اولونوب و بهمن انقلابی‌نین غلبه‌سیندن سونرا آزادلیغا بوراخیلیبدیر. اونون پهلوی رئژیمی‌نین حبسخانالاریندا گؤستردییی مقاومت، سیاسی محبوسلار آراسیندا دیللر ازبری‌دیر. بو مبارزه انقلابدان سونرادا داوام ائدیر؛ مجبوری مهاجرته گئدیر و آذربایجانین تانینمیش اجتماعی شخصیتی اوستاد محمدعلی فرزانه ایله بیرلیکده ۱۳۸۵نجی ایل آذربایجان فدرال دئموکرات حرکاتی آدیندا میللی ماهیتلی بیر تشکیلات یارادیر. همن حرکاتین چرچیوه‌سینده فعالیت ائتدییی ایللر حرکاتین سندلرینین ترتیبینده، نظری متنلرین حاضیرلانماسیندا، کونفرانسلاردا و دیگر میللی و بین‌الخالق تشکیلاتلاردا حرکاتین نماینده‌سی کیمی چیخیش ائدیر و ثمره‌لی رول اویناییر. بونونلا یاناشی همن تشکیلاتدان آیریلدیقدان سونرا دا سول دوشونجه‌لی مستقل بیر ضیالی متفکر کیمی ایراندا میللی مسئله و آذربایجان میللی-دئموکراتیک حرکاتی ساحه‌سینده داواملی و اساسلی نظری فعالیتلردن ده چکینمیر و عؤمرونون سونونا کیمی بو ده‌یرلی فعالیتی داوام ائتدیریر. او ایراندا یاشایان خالقلار آراسیندا دوستلوق جارچیسی اولموش و کورد، بلوچ، عرب و تورکمن خالقلارینا باغلی مختلف اجتماعی، سیاسی و مدنی قوروملار آراسیندا علاقه‌لر یاراتماغا همیشه چالیشمیشدیر.
هدایت سلطانزاده‌نی تانییانلار و اونونلا یاخیندان دوستلوق و یولداشلیق ائدنلر اونو اصیل معنادا خالق‌سئور، صمیمی، تواضعکار، ایناملی، معاریف‌پرور، متفکر و عؤمرونون سون گونونه قده‌ر عدالت و آزادلیق اوغروندا مبارزه‌نی دایاندیرمایان بیر اینسان کیمی تعریفله‌ییرلر. آغیر ایتگیسینی ایران زحمتکشلرینه، آذربایجان خالقینا، حؤرمتلی عائله عضولرینه و بوتون یولداشلارینا باش ساغلیغی وئریر، عزیز و شرفلی خاطیره‌سینه عشق اولسون دئییریک.
ایشیق- آذربایجان ادبیات و اینجه صنعت سایتی
۲۵/۱۲/۱۴۰۱
