ایرنا خبر آژانسی‌نین یایدیغی خبر اساسیندا تانینمیش ماراغالی ساتیرا و مرثیه شاعری «میرزاحسین کریمی مراغه‌ای» وفات ائتمیشدیر. «کریمی»نین وفاتی ماراغا ارشاد اسلامی اداره‌سینین رئییسی طرفیندن ده اونون ایرنا خبر آژانسینا وئردییی مصاحبه‌سینده تائید اولموش و شاعرین قوجالیق و اوره‌ک چاتیشمامازلیغی سببیندن بهمن آیی‌نین ۲۰نجی گونو ۹۱ یاشیندا امیرالمومنین خسته‌خاناسیندا وفات ائتدییی قید ائدیلمیشدیر.
ماراغا ارشاد اسلامی اداره‌سینین رئییسی طرفیندن وئریلن معلومات اساسیندا «میرزاحسین کریمی مراغه‌ای» ۳۵۰ مین بیت‌دن عبارت یازدیغی ساتیرا، مداحلیق و مرثیه شعرلرینه گؤره، ۱۳۹۹نجی ایل ارشاد اسلامی طرفیندن «نشان درجه یک هنری» آلماغا لاییق گؤرونموشدور. اونون چاپ اولموش اثرلریندن ۲۵ جیلدلیک «رنگارنگ» عنوانلی ساتیریک شعرلری، و «شعله آه»، «سحاب اشک»، «سوغات کربلا»، «دریای اشک»، «زیارتنامه»، «خیمه‌گاه کربلا»، «چهارده معصوم» و «توشه عتبات» عنوانلاریندا مرثیه و نوحه شعرلرینی آد چکمک اولار.
«میرزاحسین کریمی مراغه‌ای» ۱۳۱۰نجی ایل آذربایجانین ماراغا شهرینده روحانی بیر عائله‌ده دونیایا گؤز آچمیش و آتاسی «ذاکر مراغه‌ای»نین تربیه‌سی ایله ایلک قلم تجربه‌لرینی نوحه و مرثیه شعرلری یازماقدا الده ائتمیشدیر. کریمی‌نین ساتیریک شعرلرینین موضوعسونو عمومیتله یئنی دونیا و شهر حیاتی‌نین ده‌یرلری و نسیل‌لر آیریمی زمینینده عائله موناسیبتلرینده باش وئرمیش داورانیشلارینین تظاهورونه تنقیدی موناسیبت تشکیل ائدیر. شعر دیلی‌نین ساده اولوب، دانیشیق دیلینه اساسلانماسی کریمی‌نین ساتیریک شعرلرینین معین اوخوجو کوتله‌سی طرفیندن گئنیش قارشیلانماسینا سبب اولموشدور. بو باخیمدان او بوتون آذربایجاندا داها آرتیق ساتیریک بیر شاعر کیمی تانینمیشدیر. ایتگیسینی سئونلرینه تسلیت دئییریک.
