چئویرن: ایشیق
ترجمه: ایشیق
ایشیق

چوخ تاسفله مدنیتیمیزین و دیلیمیزین داها بیر حامیسینی و صمیمی بیر خادیمینی ده الدن وئردیک. عؤمرونون بؤیوک بیر قیسمینی اینسانلارا آزادلیق، عدالت و بشریته صلح و امین- آمانلیق ایسته‌ین صمیمی یولداشیمیز «جابر فتحی» یاشادیغی آستارا شهرینده ابدیته قووشدو.
«جابر فتحی» ۱۳۳۹نجی ایل پارس‌آبادین «اجیرلی» کندینده آنادان اولدو. تحصیلاتینی پارس‌آباد، آستارا و اردبیلده بیتیردی. گنج چاغلاریندان اجتماعی و مدنی فعالیتلره قوشولوب، خصوصیله ده ایدمان گروپلارینین تشکیلینده و ایدمان فعالیتلری ایله یاناشی یئنی‌یئتمه‌لرین تحصیل کیفیتی و ساغلام اجتماعی داورانیشلارینین انکشافیندا تام مسئولیتله ده‌یرلی ایشلر گؤروب و قوروملار تشکیل ائتدی. اونون انقلابین ایلک گونلریندن تاسیسینده جدی اشتراک ائتدییی اجتماعی بیر قوروم ماهیتی داشییان «انقلاب» آدلی ایدمان گروپو بوگون ده موغان بؤلگه‌سینده چوخ حؤرمتله آدی چکیلن ایدمان گروپلارینداندیر.
اجتماعی- مدنی شخصیت «جابر فتحی» معین سببلر اوزره اؤز دوغما یوردوندان کؤچوب و آستارا شهرینده مسکونلاشمیشدی. اونون سون ایللر آذربایجان مدنیتی، دیلی و ادبیاتی زمینینده ائتدییی فعالیتلر، خصوصیله ده آنا دیلیمیزه و ملی کیملیییمیزه باغلی‌لیغی اونودولمازدیر. فعالیت ائتدییی سوسیال شبکه‌لرده انسان سئورلییین و آذربایجانچیلیغین صمیمی تبلیغچیسی اولان جابر معلم، گنجلره آنا دیلینده یازماغی، ادبیاتیمیزی و تاریخیمیزی دریندن اؤیرنمه‌یی تئز- تئز توصیه ائدن بیریسی اولموشدور. او گنجلره «آنا دیلیمیزده یازین! سهوینیز اولسادا، یازدیقجا اؤیره‌نه‌جکسینیز» توصیه‌سینی فعالیت ائتدییی اینترنت گروپ و کاناللاریندا تئز- تئز وورغولایاردی.
تاسفله بو سئویملی دوست، فداکار یولداش و مدنیتیمیزین کئشیکچیسی بیر نئچه آی «کانسر» خسته‌لییله ال به یاخا اولدوغدان سونرا، آذر آیی‌نین بئشینجی گونو یاشادیغی آستارا شهرینده ابدیته قووشدو.
«ایشیق» – آذربایجان ادبیات و اینجه‌صنعت سایتی- امکداشلاری آدیندان سئویملی یولداشیمیز «جابر فتحی»نین آغیر ایتگیسینی بوتون ادبیات سئونلره، مدنیتیمیزین وورغونلارینا، «فتحی» عائله‌لرینه، خصوصیله ده حؤرمتلی حیات یولداشینا و عزیز ائولادلاری «بابک» و «اتابک» جنابلارینا تسلیت دئییر، شرفلی خاطیره‌سینی عزیزله‌ییریک. او بیزیم قلبیمیزده بیر صداقتلی دوست و فداکار یولداش کیمی همیشه یاشایاجاقدیر.

«ایشیق» – آذربایجان ادبیات و اینجه‌صنعت سایتی
۰۷/۰۹/۱۴۰۱

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

مدنیتیمیزین داها بیر حامیسی ابدیته قووشدو («فتحی» عائله‌لرینه باش ساغلیغی)

ایشیق
www.ishiq.net

آذربایجان ادبیات و اینجه‌صنعت سایتی

مدنیتیمیزین داها بیر حامیسی ابدیته قووشدو («فتحی» عائله‌لرینه باش ساغلیغی)

ایشیق
www.ishiq.net

آذربایجان ادبیات و اینجه‌صنعت سایتی

مدنیتیمیزین داها بیر حامیسی ابدیته قووشدو («فتحی» عائله‌لرینه باش ساغلیغی)

ایشیق
www.ishiq.net

آذربایجان ادبیات و اینجه‌صنعت سایتی