دونیا شؤهرتلی آذربایجانلی یازار «رضا براهنی» وفات ائتدی
چوخ تاسفله دونیا شؤهرتلی شاعر، یازیچی و ادبیاتشوناس «رضا براهنی» فروردین آیی‌نین ۵نجی گونو ۸۶یاشیندا ایکن کانادانین تورنتو شهرینده وفات ائتمیشدیر.
رضا براهنی‌نین اوغلو اوکتای براهنی اؤز شخصی اینستاگرام صحیفه‌سینده آتاسی‌نین اؤلوم خبرینی اعلان ائتمیش و بئله یازمیشدیر: «۱۴۰۱ فروردین آیی‌نین بئشینجی گونو آتام رضا براهنی دونیانی ترک ائدیب و گونشین گؤروشونه تلسدی.»
رضا براهنی ۱۳۱۴نجی گونش ایلی‌نین ۲۱ آذرینده تبریزده آنادان اولموش، فارس مدرن شعر و ادبیاتشوناسلیغی‌نین بانی‌لریندن اولموش و شاهلیق دؤرو سانسور علیهینه مبارزه‌ده تعقیبه معروض قالمیش و حبسه سالینمیشدیر. او «ایران یازیچیلار اوجاغی(کانون نویسندگان ایران)»ین قوروجولارینداندیر.
رضا براهنی رومانچی، شاعر، ادبیاتشوناس و دانیشگاه اوستادی اولوب و ایران ادبیاتیندا اؤز امضاعسی ایله قاباقجیل‌لار سیراسیندا تانینمیشدیر. او شعر، رومان و ادبی تنقید ساحه‌لرینده بیر چوخ کیتاب و مقاله‌لرین موللیفی‌دیر کی اونلاردان «طلا در مس»، «کیمیا و خاک»، «رازهای سرزمین من»، «آواز کشتگان»، «آزاده خانم و نویسنده‌اش»، «روزگار دوزخی آقای ایاز»، «گل بر گستره ماه»، «ظل‌الله»، «اسماعیل» و «خطاب به پروانه‌ها» کیتابلارینی آد چکمک اولار.
رضا براهنی ۳۰ ایل بوندان اؤنجه‌دن کانادایا گئتمیش و تورنتو شهرینده مسکونلاشمیشدیر. او عؤمرونون سون ایللرینی اؤز آنا دیلی ایله ماراقلانمیش و آذربایجان تورکجه‌سیندن مدافعه ائتمیش و «سورگونده گونئی آذربایجان (ایران) قلم انجومنی‌نین» عؤمورلوک فخری صدری سئچیلمیشدیر. بو قورومون منشوروندا بئله یازیلیبدیر: «پن عضولری هر زامان میلت‌لر آراسیندا خوش نیت و قارشیلیقلی حؤرمت نامینه بوتون تأثیر گوجلریندن استفاده ائتمه‌لی‌دیرلر: اؤزلرینی ایرقچیلیگی، صینفی و میللی دوشمنچیلیک‌لری محو ائتمک اوچون ال‌لریندن گلنی ائتمه‌گه و تک بیر اینسانلیغین یاشادیغی تک بیر دونیا ایده‌آلی‌نی یوکسلتمه‌گه حصر ائتمه‌لی دیرلر. پن عضولری ممکون اولاندا اؤز اؤلکه‌لرینده، توپلوموندا، و بوتون دونیادا وار جدیتلری ایله افاده (بیان) آزادلیغینی‌نین بوغولماسی‌نین قارشیسیندا دایانمالی‌دیرلار.»
«ایشیق» – آذربایجان ادبیات و اینجه‌صنعت سایتی- امکداشلاری آدیندان گؤرکملی ادبی اجتماعی شخصیت رضا براهنی‌نین ایتگیسینی حؤرمتلی عائله‌سینه، دونیا ادبی اجتماعیاتینا و آذربایجان خالقینا باش ساغلیغی وئریر و اونودولماز خاطیره‌سینی عزیزله‌ییریک.
«ایشیق» – آذربایجان ادبیات و اینجه‌صنعت سایتی
۰۵/۰۱/۱۴۰۱
یک پاسخ
روحو شاد یولی دئواملی