تانینمیش صنعتکار «سیامک افسایی» حیاتینی ایتیردی

خبر آژانس‌لارینین یایدیغی خبر اساسیندا، تاسفله تبریزین تانینمیش سینما و تئاتر اویونجوسو «سیامک افسایی» کرونا ویروس سببیندن اردیبهشت آیی‌نین ۱۳نجو گونو حیاتینی ایتیرمیشدیر.
«آنام» سریالی‌نین اویونجوسو سیامک افسایی ۱۰ گون بوندان اؤنجه کرونا ویروسا یولوخموش و تبریزین ۲۹ بهمن خسته‌خاسینا یئرلشدیریلمیشدیر.
سیامک افسایی ۱۳۵۰نجی ایل قزوین شهرینده دونیایا گؤز آچمیش، ۱۳۶۴نجی ایلدن تئاتر اویونجوسو کیمی اؤز مدنی فعالیتلرینی باشلامیشدیر. او بو مدتده ۶ نمایشنامه یازمیش، ۲۰ نمایشین رئژیسورلوغون ائتمیش و ۶۰ صحنه اثرینده اویونجو کیمی اشتراک ائتمیشدیر. «آنام» سریالی اونون چوخ تانینان اثرلریندندیر.
ایشیق- آذربایجان ادبیات و اینجه صنعت سایتی- امکداشلاری، گؤرکملی صنعتکارین ایتگیسینی حؤرمتلی عائله‌سینه، دوست تانیشلارینا و اینجه صنعت اجتماعیاتینا باش ساغلیغی وئریر و خاطیره‌سینی عزیزله‌ییر.

ایشیق- آذربایجان ادبیات و اینجه صنعت سایتی
۱۴/۰۲/۱۴۰۰