«چای‌اوغلو»نون حیات نغمه‌سی سونا یئتدی
«ایشیق- آذربایجان ادبیات و اینجه صنعت سایتی»
چوخ تاسفله یئنی ایل آستاناسیندا، اسفند آیی‌نین ۲۹نجی گونو آذربایجانین تانینمیش اجتماعی- مدنی شخصیتی، قیرخینجی ایللر تبریز ضیالی حرکاتی‌نین اشتراکچیلاریندان اولان بهروز دولت‌آبادی(چای اوغلو) تهرانین فیروزگر خسته‌خاناسیندا حیاتلا ابدی‌لیک وداعلاشمیشدیر.
اؤز «چای اوغلو» لقبینی آذربایجانین انقلابچی شاعری «علیرضا نابدل»دن آلان بهروز دولت‌آبادی، تبریز ضیالی حرکاتی‌نین قیرخینجی ایل رهبرلریندن اولان «صمد بهرنگی»، «بهروز دهقانی» و «کاظم سعادتی»نین یاخین دوستو و اونلارلا بیرگه آذربایجان کندلرینده معلم‌لیک ائتمیش وطنپرور و خالق سئور بیر انسان؛ عینی حالدا، موسیقی صنعتینده اوستاد تارزن و آذربایجان ادبیاتیندا ایسه تعهدلی و خالقا باغلی بیر شاعر ایدی.
بهروز دولت‌آبادی ۱۳۱۷نجی ایلین مهر آیی‌نین ۹یندا تبریزین «چای قیراغی» محله‌سینده چوخ سایلی بیر عائله‌ده آنادان اولموش، بیرینجی صینیفی ۱۳۲۴-۲۵نجی ایل آذربایجاندا یارانان میللی حؤکومت دؤرو آنا دیلینده اوخوموش، ابتدایی تحصیلاتینی «همام» مدرسه‌سینده و اورتا مکتبی ایسه تبریزین «منصور» دبیرستانیندا باشا وورموشدور. اونون سونرالار یاخین دوستو اولان «غلامحسین ساعدی» ایله ایلک تانیشلیغی دا ائله بو اورتا مکتبدن باشلانمیشدیر.
بهروز دولت‌آبادی ۱۳۳۵-۱۳۳۴ایل اورتا مکتبی بیتیرمیش و تحصیلاتینی داوام وئرمه‌دن معلیملیک پئشه‌سینی یئیه‌لنیر و «کاغذکنان» ماحالی‌نین چوخ یوخسول و اهالیسی آجیناجاقلی بیر دورومدا یاشایان «قره‌بولاغ» کندینده معلملیگینی باشلاییر. بیر ایل قره‌بولاغ کندینده معللیملیک ائده‌ن «چای‌اوغلو» سونرالار «آذرشهر»ین «ممقان» کندینه گئتملی اولور و اورادا صمد بهرنگی، بهروز دهقانی و کاظم سعادتی ایله بیرگه «عنصری» مدرسه‌سینده درس وئرمگه باشلاییر.
بهروز دولت‌آبادی‌نین معللیملیگی آذربایجانین مختلیف کندلرینده ده داواملانیر. او بو ایل‌لرده معللیملیک‌له یاناشی آذربایجان موسیقیسی و شیفاهی خالق ادبیاتی نمونه‌لرینی توپلاماقلا دا چوخ ماراقلانیر. ۱۳۴۷نجی ایل تبریز دانشگاهیندا بدیعی بیر موسیقی پارچاسی ایفا ائتدیگینه گؤره امنیت دایره‌لری طرفیندن سورغو سووالا آلینیر. نتیجه‌ده تهرانا کؤچمک مجبوریتینده قالیر و اورادا معللیملیک پئشه‌سینی داوام ائدیر. بو شهرده ده امنیت دایره‌لری طرفیندن گؤز آلتیندا اولدوغو اوچون مختلیف تضییق‌لرله قارشیلاشیر؛ بیر مدرسه‌ده معللیملیک ائتمه‌یینه مانع‌لر تؤره‌دیلیر و بو اوزدن مختلیف مدرسه‌لره گؤندریلیر. او معللیملیک‌له یاناشی آذربایجانین میللی شاعری «بولود قاراچورلو»(سهند)ین «تریکو سانترال» فابریکینده و «کانون پرورش فکری کودکان»دا دا فعالیت ائتمه‌یه باشلاییر. بو ایش یئرلرینده تانینمیش آذربایجان یازیچیسی «گنجعلی صباحی» و بیر چوخ شاه رئژیمی علیهینه مبارزه آپاران ضیالی گنج‌لرله دوستلوق و امکداشلیق ائدیر. نهایت ۱۳۴۹نجی ایلین سونوندا شاه رئژیمی علیهینه سیاسی فعالیت‌لری اوچون یاخالانیر و زندانا آتیلیر. زنداندا یاخین یولداشی آذربایجانین انقلابچی اوغلو بهروز دهقانی‌نین «ساواک»ین ایشکنجه‌سی آلتیندا اؤلدوگوندن خبردار اولور. زنداندان آزاد اولدوقدان سونرا ایشینه داوام وئرمک امکانی داهادا چتینلشیر و نهایت ۱۳۵۴نجی ایل، واختیندان تئز تقاعده چیخماق مجبوریتینده قالیر.
بهروز دولت‌آبادی(چای‌اوغلو)نون ادبی و اینجه‌صنعت‌له باغلی یارادیجیلیغی انقلابدان سونرا داهادا چیچکلنیر؛ شعرلری دؤرو مطبوعاتدا نشر ائدیلیر؛ بسته‌له‌دیگی ملی احوال- روحیه داشییان موسیقی پارچالاری خصوصیله ده گنج‌لر و اؤیرنجی‌لر طرفیندن سئویله سئویله و گئنیش صورتده قارشیلانیر؛ شعرلری‌نین بیر قیسمی آذربایجانین دیگر شاعرلری حسین دوزگون، حبیب ساهر، عمران صلاحی و قافلانتی‌نین شعرلری ایله برابر «مجموعه» آدلی بیر کیتابدا «آذربایجان یازیچیلار هئیتی» طرفیندن ۱۳۵۷نجی ایلده و ایکینجی شعر کیتابی ایسه «بایاتی بایات اولماز» باشلیغی آلتیندا ۱۳۸۴نجی ایل «دنیای نو» نشریاتی طرفیندن یاییلیر. او عؤمرونون سونونا قده‌ر اوستاد بیر صنعتچی و سئویلن بیر ادبی اجتماعی شخصیت کیمی ادبی درنک‌لردن، مدنی ییغینجاق‌لاردان و اجتماعی فعالیت‌لردن ده اوزاق قالمیر. موسیقی تدریسی ایله مشغول اولور؛ مختلف موسیقی پارچالاری بسته‌له‌ییر؛ بیر نئچه ایل تهراندا فعالیت گؤسترن «صابر ادبی انجومنی»نین اداره هیاتی ترکیبینده فعالیت ائدیر و ادبی مدنی قوروم‌لارین تشکیلینده الیندن گلنی اسیرگمه‌ییر.
چوخ تاسفله اوستاد بهروز دولت‌آبادی(چای‌اوغلو) ۱۳۹۹نجی ایلین ایلک یاریسیندان باغیرساق کانسرینه ایلیشیر؛ داوا-درمان تاثیر ائتمیر و نهایت اسفند آیی‌نین ۲۹نجی گونو ۸۲ یاشیندا حیاتلا ابدی‌لیک وداعلاشیر.
ایندی، قیرخینجی ایل‌لرین حال هواسیندا خالقین آزادلیغینی و اجتماعی عدالتی تامین ائتمک اوچون یئنی مبارزه یول‌لاری آختاران تبریز ضیالی گنج‌لرینین سیرالاریندا اجتماعی سیاسی فعالیتینه باشلایان و عؤمرونون سونونا قده‌ر او ایل‌لرله غرور حسی کئچیرن «بهروز دولت‌آبادی(چای اوغلو) آرامیزدا یوخدور و ابدیته قووشوبدور؛ نغمه‌لی تاری ابدی‌لیک سوسوبدور، و بیر داها «صمد …!» «صمد …!» نغمه‌لی فریادینی ائشیدن کیمسه اولمایاجاق.
«ایشیق- آذربایجان ادبیات و اینجه صنعت سایتی» امکداشلاری خالقین سئویلن و شرفلی اوغلو اوستاد «بهروز دولت‌آبادی(چای اوغلو)نون ایتگیسینی خالقیمیزا، آذربایجانیمیزا، اوستادین حؤرمتلی عائله‌سینه، ادبیات و اینجه‌صنعت جمعیت‌لرینه باش ساغلیغی وئریر و اوستادین شرفلی خاطیره‌سینه عشق اولسون! دئییرلر.
«ایشیق»- آذربایجان ادبیات و اینجه صنعت سایتی
۳۰/۱۲/۱۳۹۹
