موغانلی ایکی صنعتکار حیاتلارینی ایتیردیلر
تاسفله، یاییلان خبرلر اساسیندا موغان بولگه‌سی‌نین تانینمیش ایکی صنعتکاری بیر نئچه گون عرضینده جانلارینی الدن وئرمیشلر.
عاشیق قادر رسولی – عاشیق
موغان و قاراداغ بؤلگه‌سینده عاشیق صنعتیمیزین تانینمیش سیمالاریندان اولان «عاشیق قادر رسولی» ۱۳۴۸نجی ایل اهر شهرینده دونیایا گؤز آچمیش و قاراداغ ماحالی‌نین بیر چوخ ساکینلری کیمی یئنی یئتمه‌لیکدن عاشیق صنعتی‌نین وورغونو اولموشدور. ایلک اوستادی عاشیق غلام آقازاده اولموش و اونون تعلیمی ایله عاشیق صنعتی‌نین سیرلرینی اؤیرنمه‌یه باشلامیشدیر. سونرالار موغانین پارس‌آباد شهرینده عاشیق صنعتیله مشغول و ائل آرا رغبت قازانان موغان صنعتکارلاریندان اولموشدور. عاشیق قادر رسولی‌نین یارادیجیلیغیندا خصوصی یئری اولان اونون ایران-عراق محاربه‌سینه دایر عاشیق منظومه‌سی‌دیر. تاسفله بو صنعتکار آبان آیی‌نین ۸نجی گونو کرونا ویروسا یولوخما سببیندن پارس‌آباد شهرینده وفات ائتمیشدیر.
غلامحسین جلالی(غلام) – اویونجو و رئژیسور
تانینمیش اویونجو و رئژیسور «غلامحسین جلالی(غلام)» ۱۳۵۶نجی ایل پارس‌آباددا دونیایا گؤز آچمیش، تحصیلاتینی انسان علملری اوزره بیتیرمیش و یئتمیشینجی اون ایل‌لیکدن جدی شکیلده تئاتر صنعتیله ماراقلانمیشدیر و بو صنعتده موغان بؤلگه‌سی و اردبیل اوستانی‌نین تئاتر جمعیتینده اؤزونه لاییقلی یئر قازانمیشدیر. غلام جلالی ۱۳۷۸ نجی ایلدن «بچه تابستان»، «قوپوزون بیر پرده‌سی»، «سنمار»، «نسل تمام شده»، «نمی‌دونم فردا چی می‌شه»، «مادر»، و بیر چوخ تئاتر صحنه اثرلرینی و «چهار صبح»، «مادر»، «در بلندی آسمان» و «پله‌ها زمانی که از یاد رفتند» کیمی قیسا فیلملرین رئژیسورلوغونو ائتمیشدیر. بوندان علاوه او ۳۰دان آرتیق ساتیریک نمایشلرین ده اویونجوسو اولموشدور. تاسفله تانینمیش صنعتکار آبان آیی‌نین ۹نجی گونو بؤیرک چاتیشمامازلیغی سببیندن حیاتینی ایتیرمیشدیر.
«ایشیق» آذربایجان ادبیات و اینجه صنعت سایتی امکداشلاری آدیندان هر ایکی صنعتکارین حؤرمتلی عائله‌لرینه و دوست تانیشلارینا، ائله‌جه‌ده صنعت جمعیتنه تسلیت دئییر و صنعتکارلاریمیزین خاطیره‌سینی عزیزله‌ییریک.
«ایشیق» آذربایجان ادبیات و اینجه صنعت سایتی
۱۰/۰۸/۱۳۹۹
یک پاسخ
صنعتکارلاریمزین روحلاری شاد اولسون و آدلاری ابدی. آذربایجان یولوندا و اینسانیت یولوندا چالیشان جانلار همیشه لیک یولوموزا ایشیقلیق دیر.