کرونا بیر عزیز انسانی‌دا الیمیزدن آلدی
قوی اؤلوم سئوینمه‌سین! عؤمرونو وئرمیر بادا
ائل قدرینی جانیندان داها عزیز بیلن‌لر.
شیرین بیر خاطیره‌تک قالاجاقدیر دونیادا
سئوه‌رک یاشایان‌لار، سئویله‌رک اؤلن‌لر.
چوخ تاسفله، دونن سحرچاغی چوخ عزیز و شریف بیر انسانی، انسان‌سئوه‌ر بیر اجتماعی مدنی شخصیتی، ادبیاتیمیزین صداقتلی و صمیمی حامیسی، دوستلارین سئویملیسی «جهانبخش بنی بایرامی»نی کرونا سببیندن الدن وئردیک. بو آغیر ایتگی‌لر گونلرینده بئله بیر صمیمی انسانی الدن وئرمک اونونلا تانیش اولان انسانلاری اورکدن سارسیلتدی. او تام معنادا اؤز شرفلی عؤمرونده دوستلوغون، ائل سئورلیگین، خالقا باغلی‌لیغین نه اولدوغونو معنا ائدن انسانلاردان ایدی.
«جهانبخش بنی بایرامی» ادبیاتیمیزین صمیمی قایغی‌کئشی، صداقتلی حامیسی، اؤزونو هئچ بیر زامان گؤزه چکمه‌ین تواضعکار انسان ایدی. ادبی مدنی ییغینجاقلاریمیزین، خصوصیله ده تهراندا فعالیت گؤسترن ادبی مدنی درنک‌لریمیزین و آنا دیللی مطبوعاتیمیزین همیشه قایغیسینی چکن اولموشدور. عینی حالدا بو عزیز انسان کیمیا اوزره متخصص و بیر چوخ آموزشی کیتابلارین موللیفی اولماقلا برابر Genealogy (تبارشناسی) اوزره باجاریقلی تدقیقاتچی ایدی. بونلاردان علاوه بیر چوخ اجتماعی مدنی موضوعلاردا یادداشت و مقاله‌لری ده یادگار قالمیشدیر.
«جهانبخش بنی بایرامی» ۱۳۳۰نجی ایلین اردیبهشت آییندا آستارانین لوندویل شهرینه تابع «کوته کومه» کندینده یوخسول بیر عائله‌ده دونیایا گؤز آچیر. آتاسی مزرعه ایشچیسی، آناسی ایسه ائودار قادین اولموشدور. عائله یوخسوللوغونا باخمایاراق کیچیک یاشلاریندان دوگو زمی‌لرینده ایشله‌مکله خصوصیله‌ده آناسی‌نین ایسته‌ییله دیپلوما قدر تحصیلینی داوام ائدیر؛ سونرا عسگرلیک خیدمتینی سونا چاتدیریر و ۱۳۵۳نجی ایل مشهد شهری‌نین فردوسی دانشگاهیندا کیمیا اختصاصیندا تحصیلینه باشلاییر. اویرنجی‌لیک ایللری اونو داها آرتیق جمعیتده حؤکوم سورن زوراکیلیق، استبداد و عموم خالقین یوخسوللوغدا عؤمور سورمه‌لرینین سببلری ایله تانیش ائدیر. سیاسی اجتماعی فیکیرلری فورمالاشیر و بیر مبارز اؤیرنجی کیمی فعالیت ائدیر. بو انسانی و بشری آمال‌لار اوغروندا مبارزه، جهانبخش بنی بایرامی‌نین عؤمرونون سونونا قده‌ر اونون حیاتی‌نین آیریلماز حصه‌سینه چئوریلیر. انقلابدان سونرا «نیروگاه لوشان»دا ایشه آلینیز و تقاعده چیخانا قده‌ر اؤلکه‌نین مختلف شهرلرینده اؤز اختصاصی اوزره مختلف شرکت‌لرده فعالیت ائدیر. بو ایللرده اونون «بویالار کیمیاسی» موضوعسوندا دوققوز جیلد آموزشی کیتابی علمی مرکزلر طرفیندن نشر ائدیلیر. بونلاردان علاوه اوزون ایللر اجتماعی تدقیقی‌نین ثمری اولان «تبارشناسی مردم کوته کومه» آدیندا چوخ گؤزل بیر ندقیقی اثری الکترون شکیلینده نشر ائدیلیر.
چوخ تاسفله، بو سئویملی و عؤمرونو شرفله باشا ووران انسان آز بیر مدتده کرونا ویروسا یولوخدوقدان سونرا سه شنبه گونو ۶/۸/۹۹ سحرچاغی کرج شهری‌نین امام علی خسته‌خاناسیندا حیاتا گؤز یومموش و ابدی‌لیک آرامیزدان کؤچموشدور.
«ایشیق» – آذربایجان ادبیات و اینجه صنعت سایتی امکداشلاری اؤز صمیمی و فداکار دوست و حامیسی‌نین آغیر ایتگیسینی ادبی مدنی جمعیتیمیزه، «آذری فصلنامه‌سی»نین امکداشلاری و اداره هیاتینه، «ساهر» و «صابر» ادبی انجومنلرینه، حؤرمتلی عائله‌سینه، دوستلارینا، فیکیرداش‌لارینا و قوهو- اقرباسینا باش ساغلیغی وئریر، شرفلی خاطیره‌سینی عزیزله‌ییر و شرفینه عشق اولسون! دئییر.
«ایشیق» – آذربایجان ادبیات و اینجه صنعت سایتی
۰۷/۰۸/۱۳۹۹
