ادبیات اوزره نوبئل مکافاتی غالبی‌نین آدی آچیقلاندی
سوئد آکادئمیاسی‌نین عضولری استکهلم شهرینده باش توتان خصوصی تدبیرده ۲۰۲۰نجی ایل ادبیات اوزره نوبئل مکافاتی غالبی‌نین آدینی آچیقلامیشدیر.
ایسنا خبر آژانسی‌نین یایدیغی خبر اساسیندا، «سرت گؤزللیگی ایله فردی وارلیغی دونیالیق حالا گتیرن سهوسیز شعر سسینه گؤره» ۲۰۲۰نجی ایلده ادبیات اوزره نوبئل مکافاتینا آمریکالی شاعر و یازیچی «لوییز گلوک» لاییق گؤرولوبدور. بیر چوخ مکافاتلارا لاییق گؤرولن «لوییز گلوک» ۲۰۰۳-۲۰۰۴نجی ایللر آمریکا شاعرلری‌نین «ملک‌الشعرا»سی ایدی.
«لوییز گلوک»ین ایلک اثری ۱۹۶۸نجی ایل و ایندییه قده‌ر ۱۲ شعر مجموعه‌سی و بیر مقاله‌لر توپلوسو نشر ائدیلیبدیر. اونون ان تانینمیش شعر مجموعه‌لریندن «آشیلین غلبه‌سی» و «وحشی زانباق» کیتابلارینی آد چکمک اولار. «لوییز گلوک» اؤز اثرلرینده داها آرتیق اتوبیوگرافیک اوسلوبدان استفاده ائده‌ن و شعرلرینده شخصی حیاتی معلوماتلاریندان فایدالانان بیر شاعر کیمی تانینیر.
«لوییز گلوک» ۱۹۴۳نجی ایل نیویورک‌سیتی‌ده دونیایا گؤز آچمیش و لانگ‌آیلند ده بویا باشا چاتمیشدیر. ایندیلیکده ییل یونیوئرسیته‌سی‌نین پروفسورودور و ماساچوست‌ده یاشاییر.
