یالقیزلیقدا سوسموشدو شاعر …
(علی احمدی‌آده(ع. اورمولو) ۱۳۲۴- ۱۲ اسفند ۱۳۹۸)
یاییلان خبرلر اساسیندا، چوخ تاسفله آذربایجانین تانینمیش شاعری و «گؤزو یاشلی کوچه‌لر-۱۳۶۹»، «نارگیله-۱۳۷۹»، «و زامان بیر بهانه‌دیر-۱۳۸۷» شعر مجموعه‌لری و «چیله‌ییر آی ایشیغی-۱۳۷۸» فارس شعریندن ترجمه‌لر مجموعه‌سی‌نین مولیفی علی احمدی‌آده(ع. اورمولو) ۱۳۹۸نجی ایلین اسفند آیی‌نین ۱۲نجی گونو کورونا ویروسا توتولدوغو سببیندن حیاتینی ایتیرمیشدیر.
اورمولو شاعر اسماعیل مددی (اولکر) اؤز تلگرام صحیفه‌سینده «ع. اورمولو»نون تنهالیقدا خسته‌له‌نیب و حیاتینی ایتیردیگینی قید ائتمیشدیر. تاسفله واختیله بو ایتگیدن هئچ بیر خبر یاییلمامیش و کرونا ویروسون آت اویناتدیغی بیر زاماندا ادبی جمعیتیمیز اؤز دیرلی عضوونون یالقیزلیقدا سوسدوغونو بیلمه‌میشدیر. بو آجی حادثه بیر داها ادبی جمعیتیمیزین بؤیوک بیر بوشلوغا اوغرادیغینی گؤستریر؛ اودا شاعر و یازیچیلاریمیزین هئچ بیر عموم آذربایجان ادبی- مدنی قورومونا دایانماماق بوشلوغودور.
«ایشیق» – آذربایجان ادبیات و اینجه صنعت سایتی اؤز تاسفینی بو آجی خبر و آغبر ایتگیدن بیلدیریر و حؤرمتلی شاعریمیز «علی احمدی‌آده»(ع. اورمولو)نین بئله غریبجه‌سینه حیاتدان ال اوزمه‌سینی شاعریمیزین مؤحترم عائله‌سینه، دوست- تانیشلارینا و آذربایجان ادبی جمعیتینه باش ساغلیغی وئریر و دیرلی شاعریمیزین خاطیره‌سینی عزیزله‌ییر.
«ایشیق» – آذربایجان ادبیات و اینجه صنعت سایتی
۰۵/۰۴/۱۳۹۹
خبرین قایناغی: اورمولو شاعر اسماعیل مددی (اولکر)ین تلگرام صحیفه‌سی
***
دیرلی شاعریمیز «علی احمدی‌آده»(ع. اورمولو)نین خاطیره‌سینی عزیزله‌یرک، اونون بیر شعریله برابر، «ایشیق» درگیسینه یازدیغی سون مکتوبونو اؤزالیازماسیلا حؤرمتلی اوخوجولاریمیزا تقدیم ائدیریک:
«علی احمدی‌آده»(ع. اورمولو)نین «ایشیق» درگیسینه یازدیغی سون مکتوبو:
6 پاسخ
اسماعیل اولکر
سئوینج دولو بیر نیسگیل…
۱۲/۱۲/۱۳۹۸ تاریخینده ۷۴ یاشیندایکن، یالنیزلیق ایچینده یاشاما گؤزلزینی یومان اورمیه¬لی شاعیر دوستوم علی بَی احمدی آده (علی اورمولو)نین وفات خبرینی بیلن کیمی گئرچکدن سارسیلدیم… گئدیب مزارینی تاپدیم و شعر چئوره¬سینه بو آغیر ایتگینی دویوردوم…
آنجاق بیلیرسینیز کی؛ شاعیر اؤلمه¬ییر. او، تام آنلامییلا بیر آزادلیق روحودور. شعرلری، باشقا شاعیرلرین شعرلری و روحلاریندا یانقیلاناراق ابدیّته قدر گئدیب و اولاشیر…
بیردن “- بس شعرلری؟ پیئسلری؟” –دئیه توتدورماغا باشلادیم!.. وفاتیندان بیر نئچه آی قاباق، چوخ دئییندیکدن سونرا اونو سون شعرلرینی باسدیرماغا راضی ائتمیشدیم… اوستاد، بوگون – صاباحا سالیردی…
بئله¬جه آیلار گئچدی، ایل دولاندی… ۱۴۰۰ ایلینین اردیبهشت آییندا “خیرالله نیا”بَی آدلی بیر شخص منه زنگ ائدیب و “علی اورمولو”نون تورکجه کیتابلاری و ال یازمالارینین اوندا اولدوغونو و منه وئرمک ایسته¬دییینی بیلدیردی. تاریخ ۱۵/۰۲/۱۴۰۰ ده خیرالله نیا بَیین زیارتینه گئتدیم و… علی بَیین جان قدر سئودییی تورکجه کیتابلارینی، ال یازمالارینی، باسیلمامیش شعرلرینی، پیئس و نمایشنامه¬لرینی تام بیر آلچاق کؤنوللولوکله منه وئردیلر…
آذربایجان ادبی توپلومونا بو خبری دویورماقلا بیرلیکده اؤنوموزده¬کی آیلار و ایللرده علی بَیین باسیلمامیش اولان توم اثرلرینی “اولکر” یایینلارینجا قیدسیز-شرطسیز باسدیرماغا و ملّتیمیزین قوللوغونا سونماغا اسماعیل اولکر اولاراق سؤز وئریرم.
ندن دیر بو شاعر دیریکن کیمسه اونا دیر وئریب( شعرلری دیرلیدیرسه اگر یا یوخ) اونون شعرینه گوره کیمسه بیر یازیب یا دانیشمامیشدیر؟ ایندی هامی هجوم چکیب نامه سی یاییلیر؟ شعرینه گوره یازیلیر. اودا اولندن سونرا؟ بس بو تنقیدچیلر هاردا یوخلامیشدیلار.؟( همت شهبازی نین یازی سی منی شاشیرتدی). ندن دیریلیگینده اونون شعری اوزه رینده هیچ بیر اوخونوش یوخسا آچیقلاما یا تنقید یازیلما میش. منه پای دوشن قدر اولکر مددی نین شعری نین تنقیدینی یازان ایللرده بو رحمتلیگینده شعرینه توخونوب آچیقلاما یاپمیشدیم. آزربایجان ادبی توپلومودوروا…نه گوزلمک اولار…
اکبر آزاد دئییر:
غفیلدن بیر خبر اوخودم
ع. اورمولو(علی احمدی آده) «کورونا»دان، دنیاسینی دَییشمیشدی!
بیز «آغای اورمولو» چاغیریردیق!…
بیر آندا، آجی-شیرین، قلم گونلریمیز اوچوب آغنادی !
بیر آندا سونسوز بیر خلاء و بوشلوغا دالدیم
تانیشلیغیمیزین ایلک گون گلیب گؤزومون اؤنونده ثابت بیر پرده کیمی دایاندی !
«کیهان» موسسه سینین، «یول» درگیسی نین تحریه سینده، جناب «ایواز طاها» دانیشیب قرار مدار قویدولار و صاباحیندان امکداش اولدوق!
سئویرم هونکور -هونکور آغلایام. انجاق گؤزومدن یاش آخمیر! ایچیمده بیرغریبه دویقو دوگون دوشوبدور!
غریب لیگینه، یالقیزنیغینا، آدام سیزلیغینا، اوریینده یاشاتدیغی حسرتینه، نیسگللرینه، چاپ اولمامیش اثرینه دوشونورم!
ائله «یول» درگیسینده یازیب یاراتدیغی زاماندان اؤزو ایله قالاق-قالاق درد، آجی داشیییردی!
او حسرتی، نیسگیلی، آغری-آجینی، یالقیزلیغی بوتون یونلری ایله یاشاییردی!
04- ۱۰- ۱۳۹۹
منده بیر انسان کیمی بواورمولو شاعیر و یازیچی، ژورنالیست انسانین کورونا ویروسو واسیطه‌سیله دونیاسینی سس‌سیزجه‌سینه دییشدییینی سایین ائلدار بَیین تاسسوفلو خبرینده اوخویوب دیسکینرکن اوزولدوم. دیکسیندیییم بونا گؤره ایدی کی بوراجان هئچ اینانمامیشدیم گورونا ویروس « کووید اون دوققوز خسته‌لیی آدامی اؤلدور رمیش!؟ »هر حادا بو بؤیو ک ضایعه اوچون اوزولدویومو بیلدیریب حؤرمتلی عاییله‌سینه وبوتون آذر بایجان ادبیاتیندا چالیشان‌لارا اؤزل‌لیکه حؤرمتلی ائلدار بیَه باشیز ساغ اولسون دئییرم. یولو داواملی یئری جننتده اولسون.
ایشیق‌چیلار. منی آغلاتدیز. علی احمدی یا اوز آرامیزدا “اورمولو” آدلانان شاعیر و قلم صاحیبی ایله یاخیندان تانیش ایدیم. من، چوخ جاوان ایکن حسین دوزگون معلمه، یولداشی چیخارتماقدا یاردیم ائتدیییم گونلرده، اورمولو دا بیزله برابر یولداشین دفترینده ایدی. سونرالار بولتن آدلی بیر داخیلی نشریه بوراخان زامان یئنه ده او بیزیم یاردیمچیمیز ایدی. بولتن ۴ نمره و زیراکس صورتینده ۱۳۶۳ و ۶۴.نجو ایللرده بوراخیلیردی، آنجاق تیراژی او قدهر چوخالدی کی حساسیت یاراتدی. بولتنین دوردونجو نمره‌سینی مین نسخه‌ده چاپ ائله‌دیک.
سونرا ۱۳۶۹.نجی ایللرده کیهان روزنامه‌سی، کیهان هوایی‌نین ایچینده ” اوره‌کدن اوره‌یه یول” آدلی تورکجه صحیفه‌لر آچدی و علی احمدی بو نشریه‌یه قاتیلدی. و نئچه آی سونرا ” یول” مجله‌سی یولا دوشدو و بو گونلر داها احمدی رسمی اولاراق هر گون سحردن آخشاما قدهر یولدا اولوردو. او گونلر منیم یولا وئردیییم مطلب‌لریمی اورمولو گوروردو. او ساکیت، دینمز سویله‌مز، های- کوی‌سوز و نهایت درجه‌ده علملی ایدی. خصوصیله شعری چوخ گوزل تانیردی و واقعی بیر منتقد ایدی. اونون قاش قاباقلی اولدوغونا باخمایاراق، اوره‌یی صاف ایدی.
بو گئجه منه آغیر بیر گئجه اولاجاق. اوزون ایللر اونونلا یاشادیغیم دوستومون غریبجه‌سینه اولوم خبرینی ائشیتمیشم. کاشکی بو گئجه ایشیغا باش وورمایایدیم.
حئیف اولدو،چوخ حئیف . دیرلی شاعیریمیز ع .اورمولو (اورمواوغلو)نون بوسایاق سسیزلیکده دونیاسینی دگیشمه سی یوردوموزون اونودولماز نیسگیللریندن اولدو. بو آغیر ایتگینی شاعیریمیزین سایغیلی عایله سینه و آذربایجان خالقینا، اائله جه ده ادبییات عالمینه تسلیت دئییرم. یولو داواملی اولسون / ائل اوغلو