باش ساغلیغی!
«اژدر عمی»نین عزیز خاطره‌سینه عشق اولسون!
چوخ تاسفله بوگون (۲۴ فروردین ۹۹) آذربایجانین سئویملی صنعتکاری مجید ابراهیم‌زاده (اژدر عمی) ۷۸ یاشیندا تبریز شهرینده آغ جییار خسته‌لیگی سببیندن حیاتینی ایتیرمیشدیر.
1320-جی گونش ایلینده «زنوز» ماحالی‌نین «هؤروز»(هریس) کندینده دونیایا گؤز آچان و عؤمرونون چوخونو عائله‌سی ایله بیرگه تبریز شهرینده یاشایان «اژدر عمی»، انقلاب ایللرینده‌کی آذربایجان ضیالی و اؤیرنجی حرکاتی اشتراکچیلارینا چوخ تانیش و سئویلن بیر شخصیت اولموشدور. هله ده ۵۶ و ۵۷نجی ایللر تبریز دانیشگاهیندا کئچیریلن اؤیرنجی تدبیرلرینه و ائله‌جه ده تبریز شهرینده‌کی عاشیقلار قفه‌خاسیندا آذربایجان عاشیقلاری‌نین چیخیشلارینا قاتیلان انسانلارین یادداشیندا، «اژدر عمی»نین آذربایجان گؤزللیک‌لرینی و زحمت آداملاری‌نین آرزو و ایستک‌لرینی ترنم ائدن ایفالاری یاشاماقدادیر.
«اژدر عمی» ائلینه، دیلینه و ملی وارلیغینا باغلی صنعتکارلاردان اولموشدور. او حیات و معیشتی‌نین بوتون تضییق و چتینلیک‌لرینه رغمن، عؤمرونو آذربایجان موسیقیسی‌نین چیچکلنمه‌سینه حصر ائدن شخصیت‌لر سیراسیندا اؤز مؤوقعینی ساخلامیش و بیر چوخ شاگردلر او جومله‌دن اؤز ائولادلارینی صنعتکار تربیه ائدن تعهدلی بیر مدنی شخصیت اولموشدور. خاطره‌سی یاشایاجاق و مدنیتیمیزین انکشافیندا قویدوغو ایزلر پوزولماز قالاجاقدیر.
بیز، «ایشیق» – آذربایجان ادبیات و اینجه صنعت سایتی امکداشلاری، بو آغیر ایتگینی آذربایجان خالقینا، اژدر عمی‌نین قوهوم-اقرباسینا و حؤرمتلی صنعتکار ائولادلارینا تسلیت و سئویملی صنعتکاریمیزین عزیز خاطره‌سینه عشق اولسون دئییریک.
«ایشیق» – آذربایجان ادبیات و اینجه صنعت سایتی
۲۴/۰۱/۱۳۹۹
2 پاسخ
انقلابین ایلک ایلله ریندن داداشیمین عایلوه وی دوستو اولان مجید ابراهیم زاده و قارداشی آشیق ابراهیم ابراهیم زاده دن چوخلو آنیشلاریم وار.اورمودا دونه لر داداشیمین آشیق همده فولکلور اوجاغی اولان ائوینده قوناقلاندیلار.ایلک گلیشینده منیم فارسجا تاریمی ساز کوکونه سالیب آشیق هاوالاریمیزدان اولان شرول چالیب داداشیمین اوغلانلاری اصغر، اکبر و جاواد ماراقلا اونون بارماقلارینی و ساز چالماسینی ایزله ییب هله لیک او تارلا چالسالاردا، سونرالار رحمتلیک آشیق حاجی دان اوجوز بیر ساز آلیب او ایللرده چوخ زورلوقلا سه راهی خویدان کئچیریب ایلک کیشی( کس، نفر) اولاراق تبریز و باکی سازی نی اورمویا آپاردیم. هر حالدا داداشیمین اوغلانلاری او ایللرین اژدر عمی له ، ابراهیمله و آشیق حاجیلا گوروشلرده حرفه ای دورومدا سازی اویره ندیلار. منده اونلارین گناریندا آماتور دورومدا اویره ندیم. دوستلارا عشق اولسون
Adı-sanı ilə yaşayacaq böyük insan və milli aşıq idi. Təbrizin üzərinə çökən qara şəriəti və şovinizmi öz sazı ilə etgisizləşdirən ulu sənətçilərimizdənidi Əjdərəmi. Onun yeri hər zaman Azərbaycan Türk Millətinin ürəyinə qazılacaqdır. Yolunu uğurla sürən Rövşən bəyin, ailəsinin və onu sevən millətinin başı sağolsun.