زنگانلی یازیچی و ترجمه‌چی «میر تقی فاضلی» وفات ائتدی
یاییلان خبرلره اساسا، زنگانین تانینمیش ضیالیسی، ادبی اجتماعی شخصیتی، شاعر و ترجمه‌چیسی «میر تقی فاضلی» ۸۹ یاشیندا وفات ائتمیشدیر.
«میر تقی فاضلی» ۱۳۰۹نجی ایل زنگاندا دونیایا گؤز آچمیش، گنج یاشلاریندان اجتماعی فعالیتلره ماراق گؤسترمیش، و اونونلا برابر یازیچیلیق و ترجمه ایشلریله ده مشغول اولموشدور. یازیچی‌نین یارادیجیلیق فعالیتی داها آرتیق شعرله اوتوزونجو ایللر و یازیچیلیغی ایسه قیرخینجی ایللردن باشلانمیش و عؤمرونون سونونا قدر داوام ائتمیشدیر. ایلک اثری «همسر قانونی» آدیندا ۱۳۴۵نجی ایل چاپ ائدیلمیشدیر. سونرا یازدیغی «ترلان» آدلی رومانی شاهلیق اصول اداره‌سی طرفیندن قاداغان اولموش و یاییلان نسخه‌لر زنگانین «فرهنگ و هنر» اداره‌سی طرفیندن یاندیریلمیشدیر.
«میر تقی فاضلی»دن ایندییه دک ۲۰ اثر فارس و آذربایجان تورکجه‌سینده یاییلمیش؛ اونلارین آراسیندا بیر تعداد اثرلر غیررسمی شکیلده چاپ ائدیلمیش و اوخوجولارین اختیاریندا قویولموشدور. شعرلری، داستانلاری و مقاله‌لری داها آرتیق امید ایران، امید زنجان، صدای زنجان، بهار زنجان و موج بیداری نشریه‌لرینده یاییلمیش و جناب «حسین نجاری» طرفیندن حیات و یارادیجیلیغینی و اجتماعی فعالیتینی عکس ائتدیرن «گلنگدن» آدلی سندلی بیر فیلم چکیلمیشدیر.
«میر تقی فاضلی»دن انگلیس دیلیندن بئش رومان ایندییه دک ترجمه و نشر ائدیلمیشدیر. اونون یارادیجیلیغی‌نین اساس موضوعلاری ادبیات، فلسفه و سوسیولوگیا اولموش و اثرلریندن «ترلان»، «همسر قانونی»، «راه‌ها وخارها»، «همرنگ ارغوانی»، «فلسفه از دیدگاه تاریخ»، «معبد خورشید»، «چهره‌ای در تاریکی» و … آدلی کیتابلاری آد آپارماق اولار.
«میر تقی فاضلی» آذر آیی‌نین بیرینجی گونونده ۸۹ یاشیندا آغ جیگر چاتیشمامازلیغی سببیندن زنگانین خسته‌خاناسیندا وفات ائتمیشدیر.
«ایشیق» آذربایجان ادبیات و اینجه صنعت سایتی امکداشلاری دیرلی شخصیت و اؤلکه مقیاسیندا تعهدلی بیر یازیچی، ترجمه‌چی و اجتماعی اکتیویست کیمی تانینان «میر تقی فاضلی»نین ایتگیسینی اجتماعیاتیمیزا تسلیت دئییر و اونودولماز خاطره‌سینی عزیزله‌ییرلر.
«ایشیق» – آذربایجان ادبیات و اینجه صنعت سایتی
۵/۹/۱۳۹۸
