«نیگار خیاوی»دن ایکی یئنی ادبی اثر ایشیق اوزو گؤردو

آذربایجانین تانینمیش شاعر و ترجمه‌چیسی «نیگار خانیم خیاوی»دن ایکی یئنی ادبی اثر ایشیق اوزو گؤرموشدور. یارادیجیلیق عؤمرونون اوزون ایللرینی «غلامحسین ساعدی»نین اثرلری اوزره تدقیق ایشی آپارمیش و ایندییه‌دک اونون «توپ» و «بیل عزالیلاری» اثرلرینی آذربایجان دیلینه چئویرمیش نیگار خانیم، گؤرکملی یازیچی‌نین ۱۳۴۴نجی ایل یازدیغی «بهترین بابای دنیا» آدلی دؤرد صحنه‌لیک نمایشنامه‌سینی ده دیلیمیزه چئویرمیش و بوگونلرده تبریزین کیتاب سرگیسینده اؤز اوخوجولارینا تقدیم ائتمیشدیر.
«دونیانین ان یاخشی آتاسی» کیتابی «شانی» انتشاراتی طرفیندن ۱۰۰۰ نسخه ده یاییلیبدیر. بو کیتابلا برابر نیگار خانیمین بئشینجی شعر توپلوسو دا «بو شهر شیشیب» باشلیقی آلتیندا همن یایین ائوی طرفیندن بوراخیلیبدیر. نیگار خانیم خیاوی‌دن بوندان اؤنجه دؤرد شعر توپلوسو: «منیم شعریم(۱۳۷۴)، «کؤلگه‌‌ده کی سس(۱۳۷۶)»، «شهرین جیریغیندا نیگار…(۱۳۸۳)» و «الیمده اللی بارماق(۱۳۸۶)» آدلاریندا یاییلمیشدیر.