ادبیات ساحه‌سینده نوبئل موکافاتی‌نین غالب‌لری تعیین ائدیلدی
سوئد آکادمیاسی جومه آخشامی ادبیات ساحه‌سینده نوبئل موکافاتی‌نین ۲۰۱۸ و ۲۰۱۹-نجو ایل غالب‌لرینی اعلان ائتدی.
یاییلان معلومات‌لار اساسیندا ۲۰۱۸نجی ایل نوبئل موکافاتی لهستانلی یازیچی و ضیالی «اولگا توکارشوک»ا و ۲۰۱۹نجو ایل نوبئل موکافاتی ایسه اتریشلی ترجمه‌چی، دراماتورق و یازیچی «پیتر هاندکه»یه وئریلمیشدیر.
۱۷۸۶نجی ایلده قورولان سوئد آکادمیاسی، ادبیات اوزره نوبئل موکافاتی‌نین غالبینی سئچمک وظیفه‌سینی داشیییر. بو ایل ایکی ایلین نوبئل موکافاتی غالب‌لرینی بیر یئرده اعلان ائتمگی‌نین سببی آکادمیانین ۲۰۱۸نجی ایل دچار اولدوغو سکس قالماقالی ایله یارانان جدی بحران‌لا علاقه داردیر. بو قالماقالا کمیته‌نین یئددی دایمی عضووندن بیری سوئد وطنداشی «ژان کلود آرنو»نون جنسی تجاوز ائتمکده گوناهلاندیریلماسی سبب اولموشدو.
۲۰۱۸نجی ایل نوبئل موکافاتی آلان «اولگا توکارشوک» اؤز اثرلرینی دوغما دیلینده یازیر، آنجاق اؤلکه‌سیندن علاوه دونیانین انگلیس دیللی بیر چوخ اؤلکه‌لرینده ده تانینیر. ۷۶ یاشلی اتریشلی ترجمه‌چی، دراماتورق و یازیچی «پیتر هاندکه» ده دونیا شؤهرتلی یازیچی‌دیر و آکادمیا اونو «بشریتین اؤزل تجربه‌سی‌نین تدقیقچیسی» آدلاندیرمیشدیر.
