اسماعیل پیل‌پایه(دالغین)ین خاطیره‌سینه ادبی گؤروش کئچیریلدی.
مهر آیی‌نین اوچونده، موغانین (پارس‌آباد)ین «اوستاد شهریار» آدینا ادبی انجومنی‌نین تشبثی ایله شاعر اسماعیل پیل‌پایه‌نین خاطیره‌سینه، خیاو(مشگین‌شهر)ین شاعرلرینین اشتراکیلا ادبی تدبیر کئچیریلدی. بو محتشم ادبی گؤروشده موغان و خیاو شاعرلری اؤز اثرلریندن اوخویوب و مرحوم شاعریمیزین خاطیره‌سینی عزیزله‌دیلر. مجلیسده موغان شاعرلریندن: شهرام گلکار، پریسا حیدری، بهروز صدیق، پاشا موغانلی، توحید نامور، ذکرعلی نظرپور، محمد نوری، فرشید کیانی، ائل‌سئون، سید حسن حسینی و ارشاد اداره‌سینین رئیسی جناب هاتف و خیاو شاعرلریندن ایسه: حسن قبادزاده، کامیل قهرمان‌اوغلو، عیواض عالی، زامان پاشازاده، سیروس سلمانی، حکیمه باباکشی‌زاده، جمیله محمدنژاد، خاطیره عبدالعلی‌زاده و سمیه خان‌محمدی اشتراک ائتمیشدیلر.
شعرینده «دالغین» تخلص ائدن، اسماعیل پیل‌پایه ۱۳۶۳نجی ایل موغاندا دونیایا گؤز آچمیش و اورادا بویا باشا چاتمیش، عالی تحصیلینی «عمران» رشته‌سینده بیتیرمیشدیر.
مرحوم شاعرین شعرلری دؤرو مطبوعات و داها آرتیق اینترنت صحیفه‌لرینده یاییلمیش و عمومیتله سربست قیسا شعرلردیر. سون واختلار شعر مجموعه‌سینی «دیشلریم تئلگراف وورور» آدیندا نشره حاضیرلامیش، آنجاق تاسفله شاعر اوره‌یی‌نین بیر یوللوق دایانماسی اونا ایلک شعر مجموعه‌سی‌نین نشرینی گؤرمگه امکان وئرمه‌میشدیر.
آذربایجان ادبی گنجلیگی‌نین استعدادلی نماینده‌لریندن اولان شاعر «اسماعیل پیل‌پایه» شهریور آیی‌نین ۱۷نجی گونو موغانین پارس‌آباد شهرینده اوره‌ک انفاکتی نتیجه‌سینده حیاتا گؤز یومموشدور.
