تبریزلی داغچی قادین «ماناسلو» ذیروه‌سینه دوغرو!
تبریزلی داغچی قادین «زهرا نعمتی» هیمالیانین ۸۰۰۰ متردن هوندور اولان «ماناسلو» ذیروه‌سینی فتح ائتمک اوچون «نپال» اؤلکه‌سینده یئرلشدی.
ماناسلو داغی دونیانین ان اوجا داغلاریندان حساب ائدیلیر و اونون هوندورلوگو ۸۱۶۳ متردیر. بو داغ زهرا خانیم نعمتی‌نین اراده‌سینه تسلیم اولدوقدا، بو تبریزلی قادینین آدی دونیادا ماناسلو هوندورلوگونو فتح ائدن ایلک آذربایجانلی قادین و ایراندا ایسه ایکینجی داغچی قادین کیمی چکیله‌جکدیر. زهرا خانیم نعمتی‌دن اؤنجه پروانه خانیم کاظمی ۱۳۹۰نجی ایل بو هوندورلوگو فتح ائتمیشدیر و ایراندا ماناسلونو فتح ائدن بیرینجی داغچی قادین عنوانینی قازانمیشدیر.
زهرا خانیم نعمتی ذیروه‌یه قالخمادان اؤنجه «ایشیق» درگیسینه وئردیگی مصاحبه‌سینده دئمیشدیر:
«سلام عرض ائلیرم همشهری‌لریمه. من زهرا نعمتی‌یم. ایندی بو دیقه کاتماندودایام، نپالین پایتختینده. بوگون سحر شهریورین دوققوزوندا یئتیشمیشم بورا. صاباح یوخ بیر گون آیین اون بیرینده برنامه‌مین استارتینی ووراجاغام قله ماناسلو ۸۱۶۳ متر ارتفاعسیندا . اولین خانیمام کی بو صعودا فدراسیوندان شورای برون مرزی مجوزی آلمیشام. حدودا ۴۵ گون چکه‌جک بو صعودوم. همشهری‌لریمدن ایستیرم کی منی دعا ائله‌سینلر، تا بو داغدا یول وئرسین من صعود ائله‌ییم بو قله‌نی.»
ایشیق درگیسی‌نین امکداشی رقیه خانیم کبیری‌نین آپاردیغی بو مصاحبه، درگینین نوبتی نومره‌سینده یاییلاجاقدیر.
