چئویرن: ایشیق
ترجمه: ایشیق
ایشیق

تبریز شهرینده «عاشیق حسن اسکندری»نین کیتاب مراسیمی کئچیریلدی

مرداد آیی‌نین ۱۹نجی گونو ائل عاشیقی «عاشیق حسن اسکندری»نین یئنی نشر ائدیلمیش «خاطیره‌لر، داستان‌لار، شعرلر» باشلیقلی کیتابی‌نین تانیتدیرما تدبیری کئچیریلدی.
تبریز شهرینده کئچیریلن بو شعرلی- موسیقیلی تدبیرده عاشیق حسن اسکندری‌نین عائله‌ عضولری، یاخین دوست- تانیشلاری اشتراک ائتمیشلر. دؤرد ساعاتلیق بو تدبیرده عاشیق موسیقیسی ایفالاری ایله برابر عاشیق حسن‌ین کیتابی حاقیندا رای‌لر سؤیلنمیش و مجلیسده حاضیر اولان شاعرلر طرفیندن شعرلر اوخونموشدور.
مراسیمین آپاریجیسی «حسن کافی» تدبیری عاشیق حسن اسکندری‌نین نوه‌سی آپاریجی «صنم خانیم»ین دانیشیغی ایله آچمیشدیر. صنم خانیم عاشیق حسن‌ین منظوم بیوگرافیاسینی مجلیس اشتراکچیلارینا چاتدیرمیشدیر. سونرا عاشیق حسن‌ین یاخین یولداشلاریندان اولان تانینمیش آذربایجان صنعتکاری «عاشیق اشرف حسین‌پور» عاشیق حسین جوان‌ین ایکی ماهنیسینی اوخوماقلا مجلیس اشتراکچیلاری‌نین بؤیوک آلقیشلاری و رغبتینی قازانمیشدیر. عاشیق اشرف‌دن علاوه «عاشیق منسوم» و «نبی اسکندری» چیخیش ائتمیشلر و آذربایجانین تانینمیش عاشیق صنعتی تدقیقاتچیسی «دوقتور محمد عبادی(آلیشیق)» آذربایجان عاشیق صنعتی و عاشیق حسن اسکندری‌نین عاشیق صنعتیمیزین انکشافینداکی رولو حاقیندا دانیشمیشدیر.
سسی ‌ایله، سازی ‌ایله وطنیمیزین توی- دویون‌لرینی بزه‌ین، آذربایجان خالقی‌نین معنوی گوزه‌للیک‌‌لرینی دونیا خالق‌لارینا چاتدیران عاشیق «حسن اسکندری»نین کیتابی حاقیندا تبریز ادبی محیطی‌نین تانینمیش شخصیتلریندن «حسن انداچه» اؤز ملاحظه‌لرینی سؤیله‌میش، سونرا آذربایجانین تانینمیش شاعر و اجتماعی شخصیتی «ناصر داوران» مجلیس اشتراکچیلارینا اؤز شعرلریندن اوخوموشدور. مجلیسده حاضیر اولان تبریز ادبی محیطی‌نین دیگر شخصیتلریندن مسعود شریعتی دانیشمیش و گنج صنعتکار تار ایفاچیسی «شریعتی» آذربایجان موغامیندان بیر پارچانی ایفا ائتمیشدیر.
معنالی و شرفلی عؤمرونون ۷۰ ایلینی آرخادا قویان اوستاد عاشیق حسن اسکندری‌نین قیزی مجلیسین دیگر چیخیش ائدنلریندن‌ایدی. او اؤز صنعتکار آتاسی حاقیندا اوره‌ک سؤزلرینی سؤیله‌میشدیر.
اؤز صنعتی و شخصیتی ایله ائل آراسیندا بؤیوک حؤرمت قازانان اوستاد عاشیق‌ حسن اسکندری‌نین عؤمور گون یولداشی «معصومه‌خانیم‌نیک‌خصال» اوستادین یئنی نشر ائدیلمیش «خاطیره‌لر، داستان‌لار، شعرلر» کیتابی‌نین دوواغینی آتمیش و کیتابی مجلیس اشتراکچیلارینا تقدیم ائتمیشدیر.
مجلیسین سون حصه‌سینده «عاشیق حسن» اؤزو چیخیش ائتمیش و اؤز ایفالاریندان «جنگی کوراوغلو»، «صمد عمی گلمه‌دی» و عاشیق حسین جوان‌دان بیر هاوانی قوناقلارا تقدیم ائتمیشدیر. اوستاد عاشیقین سون ایفاسی عاشیق حسین جوان‌ین خاطره‌سینه حصر ائدیلمیش و بو سؤزلرله مجلیس اشتراکچیلارینین حؤرمتینی قازانمیشدیر:

شاه من اونوتمارام سن ده اونوتما
صابینلی کندیری، دار آغاجینی!
من ده کی اونوتسام تاریخ اونوتماز
اوره‌یی داغلانان آنا باجینی!

***

ایضاح:
ائل عاشیقی «عاشیق حسن اسکندری»نین یئنی نشر ائدیلمیش «خاطیره‌لر، داستان‌لار، شعرلر» کیتابینی «ائلدار موغانلی» نشره حاضیرلاییب و سون گونلر تهراندا «دنیای‌نو» انتشاراتی طرفیندن یاییلمیشدیر. عزیز اوخوجولارا تقدیم ائدیلن بو کیتاب اوستاد عاشیق حسن اسکندری‌نین ‌یارادیجیلیغی‌نین بیر حصه‌سی‌دیر. بو حصه‌ده اوستادین بعضی خاطیره‌‌لری اونون دانیشیق‌‌لاری اساسیندا حاضیرلانیب‌دیر. عینی حالدا اوستادین یاراتدیغی داستان‌لاردان «آیلار و ائلدار»، «اسکندرخانین ماجراسی» و «عاشیق قشم‌له گؤروش» و اوزون ایل‌لر یازدیغی شعرلری‌نین بیر سیراسی بو کیتابا داخیلدیر. خاطیره‌لر و داستان‌لارین متنی عمومیت‌له اوستادین اؤز دئییم طرزی و دانیشیق شیوه‌سی‌ایله کاغاذا آلینیبدیر. بیر چوخ خاطیره‌لری‌ده معین سبب‌لر اوزره کیتابا داخیل ائدیلمه‌ییبدیر.

***

عنوان و نام پدیدآور: عاشیق حسن اسکندری (خاطیره‌لر، داستان‌لار، شعرلر)
گردآوری و تایپ: یاشار اسکندری
ویراستاری و ترتیب: ائلدار موغانلی.
صفحه‌بندی: ایشیق
‏مشخصات نشر: تهران، دنیای نو‏‫ ‏‫، ۱۳۹۵. ‬‬
‏مشخصات ظاهری: ج. ‏‫؛ ۵/۱۴×۵/۲۱ س‌م. ‬‬
‏یادداشت: ترکی.
‏مندرجات: ج. ۱. خاطیره‌لر، داستان‌لار، شعرلر.
‏موضوع: اس‍ک‍ن‍دری‌، ح‍س‍ن‌، ‏‫۱۳۲۶- خاطرات
‏‏موضوع: داستان‌های ترکی -ایران – قرن ۱۴
‏رده بندی دیویی: ۸۹۴/۳۶۱۱
‏رده بندی کنگره: PL۳۱۴‏‫‭/‮الف‬۴۶۷۶ت۴ ۱۳۹۵‬
‏سرشناسه: اس‍ک‍ن‍دری‌، ح‍س‍ن‌، ‏‫۱۳۲۶ ‏
‏شناسه افزوده: م‍وغ‍ان‍لی‌، ائ‍ل‍دار، ۱۳۳۹، ویراستاری و ترتیب
‏وضعیت فهرست نویسی: فیپا
شابک: ۹۷۸-۹۶۴-۱۷۲-۱۳۰-۷‬‬
‏شماره کتابشناسی ملی: ۴۱۹۲۲۷۶

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

تبریز شهرینده «عاشیق حسن اسکندری»نین کیتاب مراسیمی کئچیریلدی

ایشیق
www.ishiq.net

آذربایجان ادبیات و اینجه‌صنعت سایتی

تبریز شهرینده «عاشیق حسن اسکندری»نین کیتاب مراسیمی کئچیریلدی

ایشیق
www.ishiq.net

آذربایجان ادبیات و اینجه‌صنعت سایتی

تبریز شهرینده «عاشیق حسن اسکندری»نین کیتاب مراسیمی کئچیریلدی

ایشیق
www.ishiq.net

آذربایجان ادبیات و اینجه‌صنعت سایتی