«ادبیات سئونلر گروپو»نون یئنی ادبی گؤروشو
میانا شهرینین تانینمیش ادبی شخصیتی دوقتور ارشد نظری، شاعر حسین رزمی(یارای) و نظامی یارادیجیغی اوزره تدقیقاتچی و شاعر رضوان خانیم حاجی قاسملو (جانای) دعوتلری اساسیندا «ادبیات سئونلر گروپو»نون یئنی ادبی گؤروشو اولدو.
۱۳۹۶ینجی ایلین (مرداد) آینین ۲۶سیندا میانا شهرینده کئچیریلن بو ادبی گؤروشده مختلف شهرلردن تدبیره قاتیلان گروپ عضولریندن ۲۰ شاعیر و یازیچی چیخیش ائتمیشدیر. بو صمیمی ادبی تدبیرین آپاریجیسی «ادبیات سئونلر گروپو»نون باشچیسی کریم قربانزاده جنابلاری اولموش و تدبیرین بیرینجی بؤلومونده اوستاد ارشد نظری، حسین رزمی (یارای)، دومان بختیاری، اسماعیل خرمی، بهروز صدیق، جعفر آروینی(تانیش)، مهندس جوادی، ائلیار محمدی، امین ناصری (ائلبان)، محمد شیخ الاسلامی (حاق سئون)، رضوان حاجی قاسملو (جانای)، زکیه ذولفقاری، شهناز صالحی (باهار)، فریده شیخ‌الاسلامی و مرجان منافزاده اؤز شعیر و یازیلارینی اوخوموشلار.
مجلیسین ایکینجی بؤلومو گؤزل سسلی دیکلاماتورلار تایماز میانالی، سالار بی و بهروز صدیقین چیخیشلاریلا باشلانمیش و دوقتور فیروز سیمین‌فرین «گیسو» و «کُشتی» سؤزلرینین ائتیمولوژی باخیمیندان آراشدیریلماسی موضوعسوندا چیخیشی ایله داوام تاپمیشدیر.
تدبیرده آرابیر موسیقی پارچالاری دا سسلنمیش و عاشیق عباس ستاری، خواننده بهلول پزشکی و تارزن حسین سرچمی اؤز گؤزل ایفالاریلا تدبیر اشتراکچیلارینین رغبتینی و آلقیشلارینی قازانمیشلار.
تدبیرین سون حصه‌سینده گروپ عضولرینین بیر نئچه‌سی او جومله‌دن: تکاب شهریندن تدبیره قاتیلان صمد نصرالهی و سوسن خانیم نقدی گروپون تقدیرنامه‌لریله تلطیف ائدیلمیشدیلر.
تدبیرده همچنین زکیه خانیم ذلفقاری و رضوان خانیم قاسملونون یئنی نشره بوراخیلمیش کیتابلاری مجلیس اشتراکچیلارینا تؤحفه وئریلمیشدیر.
بیرینجی ادبی گؤروشونو تیکان‌تپه شهرینده کئچیرمیش «ادبیات سئونلر گروپو»نون بو ایکینجی ادبی گؤروشونون شکیل‌لرینی حؤرمتلی اوخوجولاریمیزا تقدیم ائدیریک.
