گولر اوزلو «ائلمیرا» ابدی‌لیک سوسدو…!
چوخ تاسفله گنج شاعره «ائلمیرا خانیم کریمی» کانسر سببیندن حیاتینی ایتیرمیشدیر. استعدادلی شاعره‌میزین بو آجی ایتگیسی بوتون قلمداشلاری کیمی بیز «ایشیق» امکداشلارینی دا سارسیلتدی. بو آجی ایتگینی آذربایجان ادبی جمعیتینه، شاعره‌میزین مؤحترم عائله‌سینه و دوست تانیشلارینا باش ساغلیغی وئریب خاطیره‌سینی عزیزله‌ییریک.
گولوشلرینی ابدی‌لیک ایتیرمیش قلمداشیمیزین شعرلریندن نمونه‌لری سیز اوخوجولارا تقدیم ائدیریک:
بیزدن سورا…
بیزدن سورا دونیا نئجه اولاجاق؟!
هئچ بیلمیرم
گونش هر سحر دوغاجاق یئنی‌دن
یاشاملا دولو هر یئر
بیر تک بیز
قارانلیق‌لار ایچینده
درین بیر یوخویا گومولوب
اونودولماغا تاپشیریلاجاییق حیاتین ایچینده.
دوشونورم هر دوغولوشدا
بیزی خاطیرلایاجاقمی گونش؟
بیز گئدنده
وارلیق حیس ائلیه‌جک یوخلوغوموزو!!
سرین چای کیمی سس‌سیز گئدنده
تانری اؤزلییه‌جکمی؟
یوخسا اونودوب
یوخلوغوموزدان اینتحار ائده‌جکمی؟
گؤره‌سن تانری نئچه دفعه اینتحار ائدیب؟
بیر حیس ایچیمده دوغور
بلکه ایندی گئتمه‌لییق ….
اوره‌ییمده بیر سانجی باشلاییر
داریخیرام
ایچیمده بیر سس
یوخ ! یوخ !
حاضیر دییرم
بوراخمالییق …
گوجوم اولماز!!
هر شئیی بوراخیب گئتمک!
ایندی گئتمک زمانی اولسا!
نئجه دوردورماق اولار یاشامی؟
وارلیق حیاتلا دولو
نئجه وداع ائتمک اولار؟
آغلاماغیم کسیلمیر
ای ….. گونش….. اؤزلییه‌جه‌یم بوتون وارلیغی
بیر داها گؤره بیلمه‌یه‌جم چوخ شئی وار
توخونورام هر بیر یئره
بیر آنلیق اولمالی اولسادا
ایزی قالسین منده حیاتین
ایچیمه چکه چکه باخیرام
سانکی ایچیمده قازیلیر وارلیق
بیز بو دونیادان گئدنده
یوخلوق بیزی قوجاقلاییب
گومه‌جک ابدییته
دوشونورم بوتون انسانلار دونیادن گئدنده
اؤز دونیاسینیدا گومسه‌لر
نئجه اولار دونیا؟!
تانری نه اولار؟!….
۹۵/۰۵/۰۳
دونیایا گلمه‌یه‌جک قیزیما – ۱
منی باغیشلا
تانریلارین گوناهینی چالدیغیم
و
آنالاریمدان قالان کدری پایلاشدیغیم اوچون
قارا بولودلار گئچیر بوردان
یئنه تاریخ تکرارلانیر
ایستییردیم
سنه بیر گؤی چکه‌م
سن اولاسان گونشی،
رؤیالاریم تؤکولودو خیابانلارا
هئچ بیر قالدیریم جنتدن گئچمه‌دی
سونوندا آنلادیم
بوراسی ساده‌جه جهنمه گئدن یولاردان بیری
بوراسی قارادیر
سئومک یاساقدیر
و حیات
ساواش کیمی، سیاه-بیاز
قازانمالیسان
یوخسا
یاشاماغین ایزی آجی وئره‌جک،
تانری اینسانلاری موتسوز ائتدی
سن موتلو اول دئیه
تانریلاردان گیزلی توتوم
سنی اؤزومه ساخلادیم
ایللردی یاشاماغیم گلمیر
آغلاما
آغلادیقجا سن
گئجه‌مدن تؤکولور اولدوزلار
شهر یالقیزلاشیر
من یالقیزلاشیرام
۲۸/۱۲/۹۲
سورگون یئللر…
سورگون یئللر
تارلالاردا
سئویشنده قیزلارین ساچلاریلا
اؤزلم‌لریم
سیخیشیب باغیریر
چوبان‌لارین سازیندا،
هر گون
اونودماق ایسته‌دییم
حیات
کافه‌لرین سیگارت قوخوسوندا
بیر کپنه‌یین دوغماسی کیمی
دوام ائدیر
مزارلیق‌لاردا
سس‌سیز
۱۸/۱۰/۹۲
یاساق‌لار ایچینده…
بؤیودوک
یاساق‌لار ایچینده
آییردیلار بیزی
دونیایا گلنده
آنامیز آغ
آتامیز قارا
وار لا یوخ آراسیندا،
آسیلدیق حیاتا
ایکی رنگ آراسیندا
آختارارکن اؤزوموزو
گله‌جه‌یی
آزادلیغی …….
یاشام بیر ساواشا دؤندو بیزه
رنگیمیزی
دیلیمیزی سوچلادیلار
بیزی یاساق‌لادیلار
دونیایا گلنده
۱۱/۱۰/۹۲
یک پاسخ
الله رحمت ائلسین