“هاشم ترلان” تورپاغا تاپشیریلدی (گزارش)
خالقیمیزین ملی و مبارز شاعری استاد “هاشم ترلان”ین جنازه‌سی بو گون تهرانین بهشت زهرا قبریستانیندا تورپاغا تاپشیریلدی.
دوشنبه گونو آبان آیی‌نین ۲۶ینجی گونو سحر ساعات ۱۰دا تهرانین بهشت زهرا قبریستانی‌نین ۳۱۵ نومره‌لی بؤلومو خالقیمیزین سئویملی اوغلونو ابدی اولاراق اؤز قوینونا آلدی و اوستاد هاشیم ترلان بیر یوللوق اؤز سئونلریله وداعلاشدی.
ادبی جمعیتیمیزی خبردار ائتمک اوچون چوخ آز واخت صرف ائدیلمه‌یینه باخمایاراق بو وداع مراسیمی بیر چوخلارینین اشتراکیله کئچیریلدی. مراسیمده تهران شهرینده فعالیت گؤسترن آذربایجان ادبی- مدنی درنک‌لرینین بیر سیرا عضولری او جومله‌دن: صابر، ساهر، نباتی و خدافرین ادبی انجومنلرینین عضولری، عینی حالدا آذری فصلنامه‌سی و ایشیق الکترون درگیسی‌نین امکداشلاری، هاشیم ترلانین عائیله عضولری و قوهوم- تانیشلاریلا بیرلیکده بو مراسیمده اشتراک ائتدیلر.
ادبی- مدنی درنک‌لر طرفیندن آذری فصلنامه‌سی‌نین باش یازاری شاعر حسن ایلدیریم مزار باشیندا اوستاد هاشیم ترلانین حیات و یارادیجیلیغی باره‌ده قیسا دانیشیب و اوستادین بؤیوک بیر ادبی- مدنی نسیله بوراخدیغی درین معنوی تاثیرینی وورغولادی.
ایندیلیکده آذربایجان ادبی- مدنی درنک‌لری و بیر چوخ اجتماعی شخصیتلری طرفیندن اوستادین شرفلی خاطیره‌سینی عزیزله‌مک اوچون گئنیش تدبیرلر کئچیریلمه‌سی پلانلاشدیریلیر.
اوستادین آغیر ایتگیسی‌ایله علاقه‌دار معلومات ایشیق وبسایتی‌نین واسطه‌سیله یاییلاجاقدیر.
امکداشیمیز مسعود علیپورون بو بو وداع مراسیمیندن حاضیرلادیغی شکیللی گزاریشی سیز عزیز هموطنلریمیزه تقدیم ائدیریک:
2 پاسخ
تانریم رحمت ائله سین. هامی گئده جکدیر قالارگی آزربایجانیمیزا عشق اولسون
« آزربایجان! باشین ساغ اولسون. »
روحو شاد اولسون- مزاری نورلا دولسون.