“رقیه کبیری”نین یئنی اثری؛ “یئردن اوجا تورپاق” رومانی یاییلدی
آذربایجانین تانینمیش یازیچی و شاعره‌سی رقیه خانیم کبیری‌نین “یئردن اوجا تورپاق” عنوانلی یئنی اثری ایشیق اوزو گؤردو. علمی، تخیّلی ژانریندا یازیلمیش بو رومانین اساس مضمونو، مدنیّتین طبیعته بوراخدیغی تاثیری و اینسانین ابدی قالماق اوچون آختاریشیدیر.
«یئردن اوجا تورپاق» رومانیندا اسطوره، علم و خیال بیر- بیرینه هؤرولموش؛ آن گلیر رومانین کاراکترلری، مریخدن باش چیخاردیب، مریخین فضاسینی، ناسانین ۲۰۱۱-نجی ایلده مریخه گؤندردییی روبوت، «کیوراسیتی»نی تانیتدیریر. آن گلیر رومانین راویسی، کاراکترلرین سومر دؤورونده، مدنّیت مرکزی، گیل‌گمیش‌ین حؤکمرانلیق شهری، اورک شهرینده گزدیریب، طبیعتین وحشی کیشیسی «انکیدو»نو بیر قادین واسیطه‌سی‌ایله؛ مدنیته تسلیم اولماغینی روایت ائدیر. یازیچی اؤز اثرینده، سومر دؤورنون مدنیتین آنلاتماغا، «گیل گمیش» داستانیندان و گونش‌له مریخین فضاسینا گؤره یازیلمیش مقاله‌لردن، علمی فاکت‌لاردان فایدالانیبدیر.
«یئردن اوجا تورپاق» رومانی‌نین متن ائدیتورو تانینمیش آذربایجان یازیچی و ژورنالیستی حمید بخشمند و جیلد طراحی وقار خانیم آقایی‌دیر. کیتاب ۱۴۴ صحیفه و ۵۰۰ نوسخه‌ده “موغام” نشریاتی طرفیندن یاییلیب و اونو آذربایجانین کیتاب ماغازالاریندان و ایندیلیکده تبریزده قورولان کیتاب سرگیسیندن ۸۰۰۰ تومنه الده ائتمک اولار. کیتابین الکترونیک نوسخه‌سی‌ده Fidibo واسطه‌سیله ساتیشا بوراخیلیبدیر.
کیتابین متنینده نمونه:
– انکیدو، سن ایندی عاغیل‌لانیب، تانریلار جرگه‌سینه کئچیبسن. عاغیلا دولماق، بیر نؤوع تکلیکدن قاچماق دئمکدیر. داها سنه یاراشماز اورمانداکی حئیوانلارلا گزیب- دولانماق.
انکیدونون اوزاناقلی چیلپاق هئیکلی یام‌یاشیل چیمن‌لره قویلانیب. قالخیب اَیله‌شیر. منجیم اینانیلماز باخیشیلا کتابا جوموب. سنسه دایاندیغین یئردن کتابا دوغرو بویلانیبسان. شم‌خت بیر بؤلوم چؤرکله، تاختادان یونولموش بیر فنجانی انکیدویا ساری اوزالدیر.
– انکیدو، چؤرک یاشاییشا لازم اولان قیدالارین بیرینجیسی ساییلیر. چؤرک یئه! یالنیز وحشی حئیوانلارین سودو سنه قانیق وئرمز، ایچکی ایچ. شهرین قیدالانماق عادت- عنعنه‌لری بئله‌دی.
انکیدو چؤره‌یی یئییب، اوستوندن یئددی فنجان ایچکینی دال‌بادال دایانمادان ایچیر.
– انکیدو، گَل سنی اؤزومله هوندور حصارلی اوروک شهرینه آپاریم.
انکیدو ایسه باشینی شم‌ختین دیزی اوسته قویور. شم‌خت بارماقلاریلا اونون باشاق تک ساچینی داراخلاییر.
– انکیدو، ساچلارین دا جانین کیمی بارماقلاریما آلیشیب. گَل بیرلیکده اوروک شهرینه گئدک! انسانلارین گیل‌گمیش آدلی تانریسی اولان بیر شهره.
منجیم کتابدان گؤز دؤندریب، سنه باخیر. زامان بیر نئچه ثانیه‌لیک دایانیر. منجیم الینی اوزونه، ساققالینا چکیب، یئنی‌دن باخیشینی کتابا تیکیر. سنسه دایاندیغین یئردن بولودلارا باخیرسان. گونش گؤیون اورتاسیندا بولودلارین اوره‌یینی یاریب، دونیانی ایشیقلاندیریر. اؤز- اؤزووه میزیلدانیرسان:
– «من، دونیانین هاراسیندا دایانمیشام!؟»*
